سرویچ سرگانی جبری گمشدگی کا شکار، اہل خانہ پر تشدد کی لرزہ خیز تفصیلات

سرویچ سرگانی جبری گمشدگی کا شکار، اہل خانہ پر تشدد کی لرزہ خیز تفصیلات

کراچی: ملیر میں سرویچ سرگانی کو 12 اگست کی رات ایک بجے گھر پر پاکستانی فورسز نے چھاپے کے دوران جبری طور پر لاپتہ کر دیا گیا۔ متاثرہ خاندان نے انکشاف کیا ہے کہ چھاپے میں تقریباً 16 رینجرز اہلکار، ایک لیڈی رینجر، چار سول کپڑوں میں ملبوس ایجنسی اہلکار اور دو مخبر شریک تھے۔

سرویچ سرگانی کی والدہ محترمہ عائشہ سرگانی کے مطابق نہ صرف اُن کے بیٹے کو زبردستی حراست میں لے جایا گیا بلکہ اُن کی بیٹی کو بھی گھر کے اندر بدترین تشدد کا نشانہ بنایا گیا۔ اہل خانہ نے اس کارروائی کو غیر قانونی، غیر آئینی اور بنیادی انسانی حقوق کی سنگین خلاف ورزی قرار دیا ہے۔

بلوچستان اور سندھ میں جبری گمشدگیوں کے بڑھتے ہوئے واقعات پہلے ہی انسانی حقوق کی سنگین صورتحال کو ظاہر کرتے ہیں۔ لیکن یہ واقعہ اس حقیقت کو مزید اجاگر کرتا ہے کہ نہ صرف نوجوانوں کو لاپتہ کیا جا رہا ہے بلکہ اہل خانہ کو بھی خوف و ہراس اور تشدد کا سامنا کرنا پڑ رہا ہے۔

اہلِ خانہ نے چیف جسٹس، انسانی حقوق کمیشن آف پاکستان، اقوامِ متحدہ اور بین الاقوامی انسانی حقوق کے اداروں سے فوری مداخلت کی اپیل کی ہے تاکہ سرویچ سرگانی کو بازیاب کرایا جائے اور ذمہ داران کے خلاف قانونی کارروائی عمل میں لائی جائے۔