کوئٹہ: خدیجہ بلوچ کی بازیابی کے لیے بی ایم سی طلباء کا دھرنا تیسرے روز میں داخل

کوئٹہ: خدیجہ بلوچ کی بازیابی کے لیے بی ایم سی طلباء کا دھرنا تیسرے روز میں داخل

کوئٹہ کے بولان میڈیکل کالج کی میڈیکل طالبہ خدیجہ بلوچ کو پاکستانی فورسز کی جانب سے حراست میں لے کر نامعلوم مقام پر منتقل کیے جانے کے خلاف طلباء گزشتہ تین روز سے بی ایم سی کے سامنے دھرنا دیے ہوئے ہیں۔

طلباء کا مطالبہ ہے کہ خدیجہ بلوچ کے حوالے سے انہیں معلومات فراہم کی جائیں اور انہیں بازیاب کیا جائے، جبکہ طلباء نے پاکستانی فورسز کی جانب سے کالج کے ہاسٹل میں داخل ہونے اور چھاپے مارنے کی بھی مذمت کی ہے۔

طلباء کے احتجاج کے بعد سرکاری حکام نے ان کی گرفتاری کا دعویٰ کیا تھا، تاہم لواحقین کے مطابق حکام نے تاحال خدیجہ کے خلاف کوئی ایف آئی آر یا مقدمہ درج نہیں کیا.

بلوچ یکجہتی کمیٹی نے کہا ہے کہ بی ایم سی کے سامنے خدیجہ بلوچ کی رہائی کے لیے جاری دھرنا آج اپنے تیسرے دن میں داخل ہو گیا ہے اور ان تین دنوں کے دوران انتظامیہ کی جانب سے کوئی پیش رفت نہیں ہوئی۔

بی وائی سی کے مطابق مذاکرات کے نام پر انتظامیہ مظاہرین کو ہراساں کر رہی ہے دھرنے میں شریک افراد کی پروفائلنگ کی جا رہی ہے اور ان کی تصاویر لی جارہی ہیں۔

تنظیم نے کہا ہے کہ ایک بات واضح ہے کہ اگر دھرنے کے کسی بھی شریک کو کوئی نقصان پہنچا تو اس کی مکمل ذمہ داری کوئٹہ پولیس پر عائد ہوگی، پولیس نے اپنی ذمہ داریاں ترک کر دی ہیں اور اس کے بجائے عوام کو اذیت دینا شروع کردیا ہے۔

پولیس کا یہ غیر قانونی رویہ ناقابلِ برداشت ہے، اسی دوران بی وائی سی بلوچ قوم اور بین الاقوامی تنظیموں سے پُرزور اپیل کرتی ہے کہ وہ اس ظلم کے خلاف اپنی آواز بلند کریں۔