کردستان اور بلوچستان پر کھینچی گئی لکیریں مٹانے کا وقت آچکا ہے، نائلہ قادری بلوچ

کردستان اور بلوچستان پر کھینچی گئی لکیریں مٹانے کا وقت آچکا ہے، نائلہ قادری بلوچ

یورپی پارلیمنٹ میں ایران کے مستقبل کے حوالے سے منعقدہ ایک کانفرنس سے خطاب کرتے ہوئے نائلہ قادری بلوچ نے اپنی گفتگو کا آغاز بلوچی زبان میں مادرِ وطن بلوچستان، کردستان اور شہدائے آزادی کو ہزاروں سلام پیش کرتے ہوئے کیا۔

انہوں نے کہا کہ کانفرنس میں مختلف قوموں کو اقلیت قرار دیا گیا، تاہم وہ اس مؤقف سے اتفاق نہیں کرتیں۔ ان کے بقول کرد، بلوچ، اہوازی، آذری، لر، ترکمن اور آرمینی ایران کی اصل اکثریتی قومیں ہیں، جبکہ فارسی قوم ایک اقلیت ہونے کے باوجود اقتدار اور ریاستی ڈھانچے پر حاوی ہے۔ انہوں نے کہا کہ خطے میں پرامن بقائے باہمی اس وقت تک ممکن نہیں جب تک حکمران طبقہ دیگر قوموں کے بارے میں اپنا رویہ تبدیل نہیں کرتا اور یہ تسلیم نہیں کرتا کہ نہ اس کی نسل برتر ہے اور نہ ہی اس کا مذہب دوسروں پر فوقیت رکھتا ہے۔

پروفیسر نائلہ قادری بلوچ نے کہا کہ بلوچ اور کرد اقوام نے گزشتہ ایک صدی کے دوران تہران کے ساتھ رہنے اور مشترکہ سیاسی مستقبل کی متعدد کوششیں کیں، مگر یہ تمام تجربات ناکام ثابت ہوئے ہیں۔ انہوں نے کردستان فری لائف پارٹی (پژاک) کے کنفیڈرل ماڈل کے لیے نیک خواہشات کا اظہار کرتے ہوئے کہا کہ بلوچ عوام اپنے کرد بہن بھائیوں پر اعتماد کرتے ہیں اور ان کے ساتھ مل کر آگے بڑھنے کے لیے تیار ہیں۔ ان کا کہنا تھا کہ اگر یہ تجربہ بھی کامیاب نہ ہوا تو اس پر افسوس نہیں ہوگا، کیونکہ قومیں اپنی جدوجہد جاری رکھتے ہوئے بالآخر اپنے مقاصد کے حصول میں کامیاب ہوں گی۔

انہوں نے زور دیتے ہوئے کہا کہ موجودہ آئین اور ریاستی نظام کو تبدیل کیے بغیر صرف حکومت کی تبدیلی سے نہ امن قائم ہوسکتا ہے اور نہ ہی مختلف قوموں کے درمیان باعزت بقائے باہمی کی کوئی گنجائش پیدا ہوسکتی ہے۔ ان کے مطابق ایک نئے عمرانی معاہدے کی ضرورت ہے جو ایران کی تمام قوموں کے حقِ خودارادیت کو تسلیم اور محفوظ بنائے۔

انہوں نے مزید کہا کہ صرف ایران ہی نہیں بلکہ پورا مشرقِ وسطیٰ ایک نئے سیاسی اور عمرانی معاہدے کا متقاضی ہے۔ ان کے بقول آج خطے میں جاری تنازعات اور بحران اس بات کا واضح ثبوت ہیں کہ دوسری عالمی جنگ کے بعد خطے پر مسلط کیا گیا سیاسی ڈیزائن مکمل طور پر ناکام ہوچکا ہے۔ انہوں نے کہا کہ وقت آگیا ہے کہ ان مصنوعی سرحدوں اور تقسیم در تقسیم کی ان بدنما لکیروں پر نظرثانی کی جائے جو کردستان اور بلوچستان کے وجود پر کھینچی گئی