ڈاکٹر ماہ رنگ بلوچ کو سزا دینا انصاف نہیں بلکہ سیاسی انتقام ہے، نادیہ بلوچ

ڈاکٹر ماہ رنگ بلوچ کو سزا دینا انصاف نہیں بلکہ سیاسی انتقام ہے، نادیہ بلوچ

بلوچ یکجہتی کمیٹی کی سربراہ ڈاکٹر ماہ رنگ بلوچ کی بہن نادیہ بلوچ نے انسدادِ دہشت گردی عدالت کی جانب سے ڈاکٹر ماہ رنگ بلوچ اور صبغت اللہ شاہ جی کو عمر قید کی سزا سنائے جانے کی شدید مذمت کرتے ہوئے اسے سیاسی انتقام قرار دیا ہے۔

اپنے بیان میں نادیہ بلوچ نے کہا کہ گوادر احتجاج کے دوران ایک سیکیورٹی اہلکار کی ہلاکت سے متعلق مقدمہ ابتدا ہی سے متنازع اور سوالات سے بھرپور رہا ہے۔ ان کے مطابق ایک ہی واقعے پر دو مختلف تاریخوں میں دو الگ الگ ایف آئی آرز کا اندراج پورے مقدمے کو مشکوک بناتا ہے اور یہ انصاف کے بجائے قانون کو سیاسی مقاصد کے لیے استعمال کرنے کی مثال ہے۔

انہوں نے کہا کہ ڈاکٹر ماہ رنگ بلوچ کو پہلے تھری ایم پی او کے تحت حراست میں لیا گیا، پھر ان پر دہشت گردی کے الزامات عائد کیے گئے اور بعد ازاں ایک ایسا مقدمہ چلایا گیا جس پر جانبداری کے الزامات موجود تھے۔ ان کا کہنا تھا کہ ریاست کا مقصد انصاف فراہم کرنا نہیں بلکہ ہر صورت میں ماہ رنگ بلوچ کو سزا دینا تھا۔

نادیہ بلوچ نے کہا کہ ڈاکٹر ماہ رنگ بلوچ کا واحد "جرم” بلوچ عوام کے حقوق، جبری گمشدگیوں کے خلاف آواز بلند کرنا اور انسانی حقوق کی جدوجہد کرنا ہے۔ انہوں نے دعویٰ کیا کہ ریاست ماہ رنگ بلوچ کی قومی اور بین الاقوامی سطح پر بڑھتی ہوئی پذیرائی سے خوفزدہ تھی، جنہیں گزشتہ برسوں میں عالمی سطح پر مختلف اعزازات اور شناخت حاصل ہوئی۔

انہوں نے مزید کہا کہ گرفتاریاں، قید اور سزائیں نظریات کو ختم نہیں کر سکتیں اور ڈاکٹر ماہ رنگ بلوچ اپنے مؤقف اور جدوجہد پر پہلے سے زیادہ ثابت قدم ہیں۔ نادیہ بلوچ نے بلوچ عوام سے استقامت، اتحاد اور منظم جدوجہد جاری رکھنے کی اپیل کرتے ہوئے کہا کہ جبر اور سزاؤں کے ذریعے کسی تحریک کو خاموش نہیں کیا جا سکتا۔

انہوں نے کہا کہ ڈاکٹر ماہ رنگ بلوچ اُن خواتین رہنماؤں کی روایت کا تسلسل ہیں جنہوں نے ظلم کے سامنے سر جھکانے کے بجائے مزاحمت کا راستہ اختیار کیا، اور قید ان کے جسم کو محدود کر سکتی ہے لیکن ان کی آواز اور نظریے کو نہیں۔