قلات میں سرکاری ٹھیکیدار تین محافظوں سمیت اغوا، واشک اور خاران میں فورسز پر حملوں کی اطلاعات

قلات میں سرکاری ٹھیکیدار تین محافظوں سمیت اغوا، واشک اور خاران میں فورسز پر حملوں کی اطلاعات

قلات کے قریب جعفرآباد سے تعلق رکھنے والے ایک سرکاری ٹھیکیدار کو ان کے تین محافظوں سمیت نامعلوم مسلح افراد نے اغوا کر لیا۔

خاندانی ذرائع کے مطابق گورنمنٹ کنٹریکٹر میر ثناء اللہ بہرانی کو قلات کے قریب سے ان کے تین محافظوں سمیت اغوا کرکے نامعلوم مقام پر منتقل کردیا گیا۔ ذرائع کا کہنا ہے کہ میر ثناء اللہ بہرانی وزیراعلیٰ بلوچستان کی مشیر ہادیہ نواز بہرانی کے کزن ہیں۔ واقعے کے بعد پولیس نے نامعلوم افراد کے خلاف مقدمہ درج کرکے مغویوں کی بازیابی اور ملزمان کی گرفتاری کے لیے تلاش شروع کردی ہے۔

دوسری جانب واشک کے علاقے بسیمہ کے مقام جُر میں پاکستانی فورسز کو مسلح افراد کے حملے کا سامنا کرنا پڑا۔ ذرائع کے مطابق فورسز علاقے میں مارٹر فائر کررہی تھیں اور پیش قدمی کی کوشش کر رہی تھیں کہ گھات لگائے مسلح افراد نے راکٹوں اور دیگر ہتھیاروں سے حملہ کردیا۔ حملے کے نتیجے میں ہونے والے نقصانات کے بارے میں تاحال کوئی سرکاری تفصیلات سامنے نہیں آئیں، تاہم ذرائع کا کہنا ہے کہ فورسز کو پسپائی اختیار کرنا پڑی۔

ادھر خاران کے علاقوں ساراوان، نوروز قلات اور زورزئی میں بھی مسلح افراد کی سرگرمیوں کی اطلاعات موصول ہوئیں، جہاں شاہراہ پر موجود دو پل دھماکوں سے تباہ کیے گئے۔ جبکہ کوئٹہ سے متصل ڈغاری کے علاقے میں ناکہ بندی کے دوران فورسز کی ایک گاڑی کو راشن سمیت تحویل میں لینے کی بھی اطلاعات ہیں۔