زیارت، بلوچستان میں پشتونوں کا قتل عام ریاستی دہشتگردی اور پشتون نسل کشی کا تسلسل ہے۔پی ٹی ایم

زیارت، بلوچستان میں پشتونوں کا قتل عام ریاستی دہشتگردی اور پشتون نسل کشی کا تسلسل ہے۔پی ٹی ایم

پشتون تحفظ موومنٹ کے مرکزی ترجمان نے اپنے ایک بیان میں کہا ہے کہ زیارت، بلوچستان میں حالیہ قتل عام ریاستی ناکامی کے ساتھ ساتھ ایک بار پھر اس تلخ حقیقت کو آشکار کر رہا ہے کہ پشتون سرزمین کو مسلسل جنگ اور پراکسی پالیسیوں کی تجربہ گاہ بنایا جا رہا ہے۔

پشتون تحفظ موومنٹ ان واقعات پر گہری تشویش کا اظہار کرتے ہوئے واضح کرتی ہے کہ پشتون عوام مزید جنگ کے متحمل نہیں ہو سکتے۔ گزشتہ تین دہائیوں میں جو تباہی وزیرستان، خیبر، باجوڑ، سوات اور دیگر علاقوں میں دیکھی گئی، آج اسی خطرناک صورتحال کے آثار بلوچستان کے پشتون علاقوں میں بھی نمایاں ہو رہے ہیں۔ اور ہم پاکستانی ریاست کو اسکا زمہ دار سمجھتے ہیں۔

پشتون تحفظ موومنٹ کا مؤقف ہمیشہ سے واضح رہا ہے کہ امن و امان قائم رکھنا اس ریاست کی ذمہ داری ہے۔ کسی بھی ناکامی کا بوجھ عام شہریوں پر ڈالنا، لوگوں کو مسلح جتھوں یا مقامی لشکروں کی طرف دھکیلنا، یا پورے علاقوں کو جنگی ماحول کے رحم و کرم پر چھوڑ دینا کسی مسئلے کا حل نہیں بلکہ ایک نئے بحران کی بنیاد ہے۔ پشتون عوام کو اپنی بقا کے لیے بندوق اٹھانے پر مجبور کرنا دراصل ریاستی ذمہ داری سے دستبرداری کے مترادف ہے۔

پی ٹی ایم ہر اس مسلح گروہ کی مخالفت کرتی ہے جو پشتون سرزمین کو اپنی جنگ کا میدان بناتا ہے، خواہ وہ کسی بھی نام، نظریے یا دعوے کے ساتھ موجود ہو۔ گزشتہ کئی دہائیوں کا تجربہ ثابت کرتا ہے کہ بندوق نے پشتونوں کو امن نہیں بلکہ صرف لاشیں، نقل مکانی، غربت، خوف، تباہ حال معیشت اور برباد نسلیں دی ہیں۔ پشتون عوام کو کسی بھی مسلح منصوبے کا ایندھن بنانا ناقابل قبول ہے۔

ہم سمجھتے ہیں کہ پشتون علاقوں میں امن صرف اس وقت ممکن ہے جب ریاست ہر قسم کی مسلح پراکسی، غیر ریاستی گروہوں اور قانون سے بالاتر مسلح ڈھانچوں کی سرپرستی ترک کرے، قانون کی یکساں عملداری قائم کرے، اور اپنی تمام پالیسیاں آئین کے مطابق تشکیل دے۔ دوہری پالیسیاں اور پراکسیوں پر انحصار نے ماضی میں بھی پورے خطے کو تباہ کیا اور آج بھی اسی المیے کو دہرا رہا ہے۔

ہم مطالبہ کرتے ہیں کہ حالیہ تمام واقعات کی آزاد، شفاف اور غیرجانبدارانہ تحقیقات کی جائیں، پشتون علاقوں میں جاری عدم تحفظ کے اسباب عوام کے سامنے لائے جائیں، شہری آبادی کو ہر قسم کے مسلح تصادم سے محفوظ بنایا جائے، جبری گمشدگیوں، ماورائے عدالت اقدامات کی پالیسیوں کا خاتمہ کیا جائے، اور پشتون عوام کو اپنی سرزمین، وسائل اور سیاسی مستقبل کے بارے میں فیصلہ سازی میں حقیقی اختیار دیا جائے۔

پی ٹی ایم کوئٹہ اور زیارت میں ریاستی دہشتگردی کیخلاف جاری عوامی مزاحمت اور دھرنے کی مکمل حمایت کرتی ہے اور تمام پشتونوں سے درخواست کرتی ہے کہ اس ظلم کیخلاف اتحاد کا مظاہرہ کریں اور مل کر اپنے وسائل اور اپنی قوم کا دفاع کریں۔