کھڈ کوچہ، زہری، نوشکی اور جیونی میں طویل کرفیو، انٹرنیٹ بندش اور نقل و حرکت پر پابندیاں لاکھوں شہریوں کو اجتماعی سزا دینے کے مترادف ہیں – بلوچ وائس فار جسٹس

بلوچ وائس فار جسٹس کے جاری کردہ بیان میں کہا گیا ہے کہ کھڈ کوچہ میں تاحکمِ ثانی کرفیو کا نفاذ بنیادی انسانی حقوق اور شہری آزادیوں پر ایک سنگین قدغن ہے۔ اس سے قبل زہری، نوشکی اور جیونی میں بھی کرفیو نافذ کرکے شہریوں کو گھروں تک محدود کر دیا گیا، جس کے نتیجے میں معمولاتِ زندگی بری طرح متاثر ہوئے۔

بیان کے مطابق مسلسل کرفیو کے باعث ادویات، خوراک اور دیگر ضروری اشیائے زندگی کی فراہمی متاثر ہو رہی ہے، مریض بروقت اسپتالوں تک نہیں پہنچ پا رہے، طلبہ کی تعلیمی سرگرمیاں معطل ہیں، روزانہ اجرت پر کام کرنے والے مزدوروں اور چھوٹے کاروباری طبقے کا روزگار ختم ہو چکا ہے، جبکہ تجارتی سرگرمیوں، نقل و حمل اور مواصلاتی نظام پر بھی منفی اثرات مرتب ہو رہے ہیں۔ اجتماعی پابندیوں کے نتیجے میں خواتین، بچوں، بزرگوں اور بیمار افراد کو شدید مشکلات کا سامنا ہے، جو انسانی وقار اور بنیادی انسانی حقوق کے منافی ہیں۔

بیان میں کہا گیا کہ بلوچستان حکومت اور وزیرِ اعلیٰ سرفراز بگٹی اپنی انتظامی نااہلی اور امن و امان برقرار رکھنے میں ریاستی اداروں کی ناکامی کا بوجھ عام شہریوں پر ڈال رہے ہیں۔ ریاستی فورسز کی ناکامی اور بلوچستان حکومت کی نااہلی کا ملبہ عام شہریوں پر ڈالنا، اور اجتماعی سزا کے ذریعے پورے علاقوں کو محصور کرکے لاکھوں شہریوں کو مشکلات میں مبتلا کرنا، قانون کی حکمرانی، آئین اور انصاف کے بنیادی اصولوں سے متصادم ہے۔

مزید کہا گیا کہ کھڈ کوچہ کے مقام پر ایف سی اور دیگر سکیورٹی فورسز کی جانب سے مسافر کوچوں پر بلاجواز فائرنگ اور بے گناہ شہریوں کی ہلاکتیں نہایت تشویش ناک ہیں اور ان کی غیر جانبدارانہ تحقیقات ہونی چاہییں۔ شہریوں کے جان و مال کا تحفظ ریاست کی بنیادی آئینی ذمہ داری ہے، اور ایسے واقعات کی شفاف تحقیقات کے ذریعے ذمہ داران کا تعین کرکے انہیں قانون کے کٹہرے میں لایا جانا چاہیے۔

بیان میں کٹھ پتلی وزیرِ اعلیٰ سرفراز بگٹی کے اس دعوے پر بھی سوال اٹھایا گیا کہ بلوچستان میں حالات اتنے خراب نہیں جتنے پیش کیے جاتے ہیں۔ اگر واقعی حالات معمول کے مطابق ہیں اور حکومت کی رٹ قائم ہے، تو پھر مختلف اضلاع میں طویل اور غیر معینہ مدت کے کرفیو، آمدورفت پر سخت پابندیاں، شہریوں کی نقل و حرکت اور انٹرنیٹ کی بندش، نیز اجتماعی سزاؤں کا جواز کیا ہے؟ حکومت کو چاہیے کہ وہ طاقت اور پابندیوں کے بجائے آئین، قانون، شفاف طرزِ حکمرانی اور انسانی حقوق کے اصولوں کے مطابق مسائل کا حل تلاش کرے، کیونکہ مسلسل کرفیو نہ صرف عوامی اعتماد کو مجروح کرتا ہے بلکہ معاشی، سماجی اور تعلیمی بحران کو بھی مزید گہرا کرتا ہے۔