کراچی: ایک شخص پاکستانی فورسز کے ہاتھوں لاپتہ

کراچی کے علاقے ماری پور بڑا بورڈ کے رہائشی فاروق گدور کو گزشتہ شب تقریباً 7 بجے ماری پور مین اسٹاپ پر واقع ان کی دکان سے سادہ لباس میں ملبوس اہلکار اپنے ہمراہ لے گئے۔

تفصیلات کے مطابق فاروق گدور گزشتہ شب اپنی دکان پر موجود تھے کہ اس دوران سادہ لباس میں ملبوس اہلکار وہاں پہنچے اور انہیں اپنے ہمراہ لے گئے۔ اہل خانہ کے مطابق واقعے کے بعد سے فاروق گدور کے بارے میں کوئی معلومات سامنے نہیں آسکی ہیں۔

فاروق گدور ماری پور بڑا بورڈ کے رہائشی ہیں۔ ان کے لاپتہ کیے جانے کے واقعے پر اہل خانہ اور علاقہ مکینوں میں تشویش پائی جاتی ہے۔

اہل خانہ نے متعلقہ حکام اور اعلیٰ حکومتی عہدیداروں سے مطالبہ کیا ہے کہ فاروق گدور کی فوری بازیابی یقینی بنائی جائے اور اگر انہیں کسی قانونی معاملے میں حراست میں لیا گیا ہے تو قانون کے مطابق عدالت میں پیش کرکے اہل خانہ کو ان کی موجودگی سے آگاہ کیا جائے۔