‏بلوچ وائس فار جسٹس کا بلوچستان میں جبری گمشدگیوں کے خاتمے اور انسانی حقوق کی بحالی کا مطالبہ

‏بلوچ وائس فار جسٹس کا بلوچستان میں جبری گمشدگیوں کے خاتمے اور انسانی حقوق کی بحالی کا مطالبہ

بلوچ وائس فار جسٹس کی جانب سے جاری کردہ بیان میں کہا گیا ہے کہ 11 جنوری 2024 کو چنگیز بلوچ کی جبری گمشدگی کو 11 سال مکمل ہونے پر ایکس پر ایک مہم چلائی جائے گی۔ چنگیز بلوچ، جو مشکے کے رہائشی تھے، کو 11 جنوری 2014 کو خضدار سے جبری طور پر لاپتہ کیا گیا تھا۔ ان کے اہلِ خانہ گزشتہ 11 سال سے ان کی بازیابی کے لیے مسلسل جدوجہد کر رہے ہیں، لیکن اب تک ان کے بارے میں کوئی معلومات نہیں مل سکی ہیں، جس کی وجہ سے ان کے خاندان کو شدید کرب اور پریشانی کا سامنا ہے۔

بیان میں انسانی حقوق کی تنظیموں اور متعلقہ اداروں سے اپیل کی گئی ہے کہ وہ چنگیز بلوچ کی بازیابی کے لیے مؤثر اقدامات کریں۔ اس کے ساتھ ساتھ یہ بھی کہا گیا ہے کہ ایسے واقعات بلوچستان میں انسانی حقوق کی سنگین خلاف ورزیوں کی عکاسی کرتے ہیں۔ بلوچ وائس فار جسٹس نے عالمی برادری اور انسانی حقوق کی تنظیموں پر زور دیا ہے کہ وہ اس مسئلے پر فوری توجہ دیں۔

بیان میں یاسر حمید اور جنید حمید کی جبری گمشدگی کی شدید مذمت کی گئی، جنہیں اکتوبر 2024 میں لاپتہ کیا گیا تھا۔ ان کے اہلِ خانہ نے اعلان کیا ہے کہ وہ 10 جنوری سے 12 جنوری تک لسبیلہ پریس کلب حب کے باہر احتجاجی کیمپ لگائیں گے اور 12 جنوری کو ایک احتجاجی مظاہرہ کریں گے۔ بلوچ وائس فار جسٹس نے اس احتجاج کی حمایت کرتے ہوئے بلوچ عوام سے اپیل کی ہے کہ وہ اس کیمپ اور مظاہرے میں شرکت کرکے جبری گمشدگیوں کے خلاف آواز بلند کریں۔

اس کے علاوہ گوادر سے لاپتہ نعمان اسحاق کے اہلِ خانہ نے جی ٹی گوادر پر دو دن دھرنا دیے، انہیں یقین دہانی کرائی گئی 5 دن کے کے اندر نعمان کے متعلق معلومات فراہم کی جائے گی، امید ہے کہ ان کا مطالبہ پورا کیا جائے گا اور نعمان سحاق کو فوری طور پر بازیاب کیا جائے۔ بلوچ وائس فار جسٹس نے ان کے مطالبات کی حمایت کرتے ہوئے انسانی حقوق کی تنظیموں، حکومت اور متعلقہ اداروں سے اپیل کی ہے کہ وہ ان مظلوم خاندانوں کی آواز سنیں اور لاپتہ افراد کی بازیابی کے لیے فوری اقدامات کریں۔

بیان میں کہا گیا ہے کہ بلوچستان میں انسانی حقوق کی پامالیاں روز بروز بڑھ رہی ہیں، جن میں جبری گمشدگیاں، ماورائے عدالت قتل، اور دیگر سنگین خلاف ورزیاں شامل ہیں۔ انسانی حقوق کی تنظیموں اور عالمی برادری کو چاہیے کہ وہ بلوچستان میں جاری ان زیادتیوں کے خاتمے کے لیے عملی اقدامات کریں۔