ڈیتھ اسکواڈ کی توتک میں غنڈہ گردی ناقابل برداشت ہے. حکومت مجرمانہ سرگرمیوں کا نوٹس لے. یوسف علی خان قلندرانی

ڈیتھ اسکواڈ کی توتک میں غنڈہ گردی ناقابل برداشت ہے. حکومت مجرمانہ سرگرمیوں کا نوٹس لے. یوسف علی خان قلندرانی

قلندرانی قبائل کے سردار علی محمد خان قلندرانی کے فرزند میر یوسف علی خان قلندرانی نے اپنے ایک بیان میں کہا ہے کہ توتک میں ایک بار پھر شفیق مینگل ڈیتھ سکواڈ کی غنڈہ گردی ناقابل برداشت ہو چکی ہے۔ مسلح افراد کی جانب سے مرکزی سڑک پر غیر قانونی چیک پوسٹ قائم کر کے آنے جانے والی گاڑیوں اور موٹر سائیکلوں کو روک کر بے جا تذلیل کی جا رہی ہے، حتیٰ کہ خواتین اور بچوں سمیت پوری فیملیز کو گاڑیوں سے اتار کر گھنٹوں انتظار کروایا جا رہا ہے۔ دو دن قبل مقامی رہائشیوں پر فائرنگ کی گئی ہے، جبکہ پہاڑی چوٹیوں سے گھروں پر ہائی بیم سرچ لائٹس ماری جا رہی ہیں۔ علاقے میں موٹر سائیکلوں اور گاڑیوں میں گشت کر کے خوف و ہراس پھیلایا جا رہا ہے، جسے کسی بھی صورت قبول نہیں کیا جا سکتا۔
میر یوسف علی خان قلندرانی نے کہا کہ توتک پہلے ہی ڈیتھ سکواڈ کے ہاتھوں درجنوں افراد کی جبری گمشدگی، مسخ شدہ لاشیں اور اجتماعی قبروں جیسے ناقابل تلافی نقصانات سہ چکا ہے، اور مزید تباہی کا متحمل نہیں ہو سکتا۔ صوبائی حکومت اور ضلعی انتظامیہ فوری طور پر ڈیتھ سکواڈ کی مجرمانہ سرگرمیوں کا نوٹس لے، بصورت دیگر قبائلی عمائدین سخت لائحہ عمل طے کریں گے، جس کی تمام تر ذمہ داری حکومت اور انتظامیہ پر عائد ہوگی۔