بی وائی سی دھرنے پر پولیس کا دھاوا: ڈاکٹر ماہ رنگ بلوچ سمیت متعددخواتین و دیگر مظاہرین کو تشدد کا نشانہ بنا کر حراست میں لے لیا گیا

رمضان کےپاک مہینے میں جبری گمشدہ افراد کے لواحقین اپنے پیاروں کی بازیابی کے لئے سراپا احتجاج ہیں ۔اور اہم ترین شاہراؤں پر جبری گمشدہ افراد کے خاندان اور بلوچ یکجہتی کمیٹی کے اراکین دھرنہ دے رہے ہیں۔
گزشتہ روز بی وائی سی کے مرکزی رہنما بیبگر بلوچ، ڈاکٹر حمل ڈاکٹر الیاس اور سعید بلوچ سمیت دیگر خواتین کی اغوا نما گرفتاری کے خلاف کوئٹہ سریاب میں ایک پرامن مظاہرہ کیا گیا تھا۔ اس مظاہرے پر پولیس اور ریاستی اداروں نے آنسو گیس، واٹر کینن اور گولیوں کا استعمال کیا، جس کے نتیجے میں تین بلوچ نوجوان شہید اور درجنوں زخمی ہوئے۔
آج پولیس ودیگر فورسز نے علی الصبح سحری کے وقت ایک بار پھردھاوا بول کر لاشوں کو زبردستی اپنی تحویل میں لے لیا جبکہ ڈاکٹر ماہ رنگ بلوچ سمیت متعددخواتین و دیگر مظاہرین کو تشدد کا نشانہ بنا کر حراست میں لینے کے بعد نامعلوم مقام پر منتقل کردیئے گئے ہیں جن کے حوالے سے کوئی اطلاعات موصول نہیں ہوسکی ہے۔

بی وائی سی نے اپنے بیان میں کہا ہے کہ ریاست کی دہشت گردی کے خلاف بی وائی سی نے شہید نوجوانوں کی لاشیں لے کر کل رات سے کوئٹہ کے سریاب علاقے میں دھرنا شروع کیا تھا۔ آج صبح 5:30 بجے پولیس اور دیگر اداروں نے دھرنے پر حملہ کیا، مظاہرین سے لاشیں چھین لیں اور بی وائی سی کے مرکزی رہنما ڈاکٹر ماہ رنگ بلوچ کو ان کے ساتھیوں سمیت گرفتار کر لیا۔
بلوچ نیشنل موومنٹ ( بی این ا یم ) کے ترجمان نے کہا ہے کہ شال میں نہتے مظاہرین پر کریک ڈاؤن، تین مظاہرین حبیب ، امداد اور نعمت کا قتل ۔ مطاہرین کا قتل اور آج بلوچ یکجہتی کمیٹی کی سربراہ ڈاکٹر ماہ رنگ بلوچ سمیت دیگر لوگوں کی گرفتاری اور جبری گمشدگی ریاست پاکستان کی بلوچ نسل کشی میں ایک نئے باب کا اضافہ ہے، نا صرف رہنماؤں کو لاپتہ کیا گیا ہے بلکہ شہدا کی میتیں اور ورثا بھی ریاستی جبر کے بھینٹ چڑھ چکے ہیں، یہ پاکستان کی نفسیاتی گراوٹ اور اخلاقی پستی کا واضح ثبوت ہے۔
بی این ایم کے رہنما رحیم بلوچ ایڈووکیٹ نے سوشل میڈیا پلیٹ فارم ایکس پر اپنے ایک پوسٹ میں کہا ہے کہ جبری گمشدگیوں، جعلی فوجی کارروائیوں میں لاپتہ بلوچ فرزندوں کے قتل، اور ان بلوچ شہداء کی لاشوں کو شناختی عمل سے گذارے بغیر رات کی تاریکی میں دفنانے جیسے ریاستی جرائم کے خلاف بلوچوں کے پُر امن احتجاج پر جس طرح آج شال میں ریاست کے وحشی فورسز نے فائرنگ اور تشدد کرکے تین معصوم بلوچوں کو شہید اور درجنوں کو زخمی کرکے کوئٹہ کو خون میں نہلایاہے اس سے ریاست کی بوکھلاہٹ ظاہر ہوتا ہے۔
ایمنسٹی انٹرنیشنل نے کوئٹہ میں پرامن بلوچ مظاہرین پر تشدد اور فائرنگ کے واقعے کی شدید مذمت کرتے ہوئے تحقیقات کا مطالبہ کیا ہے۔

ایمنسٹی انٹرنیشنل نے کوئٹہ میں پرامن بلوچ مظاہرین پر تشدد اور فائرنگ کے واقعے کی شدید مذمت کرتے ہوئے تحقیقات کا مطالبہ کیا ہے۔
ایمنسٹی انٹرنیشنل نے اپنے ایک بیان میں کہا ہے کہ کوئٹہ سے اطلاعات ہیںکہ پولیس کی فائرنگ سے کم از کم 3 مظاہرین ہلاک اور درجن سے زائد زخمی ہوئے ہیں۔
تنظیم نے اس واقعے کو پاکستانی حکام کی انسانی زندگی کی بے قدری اور شہری حقوق کی سنگین خلاف ورزی قرار دیا ہے۔
انسانی حقوق کی تنظیم کا کہنا ہے کہ حکام نے پرامن احتجاج کے حق کی صریح خلاف ورزی کرتے ہوئے بڑے پیمانے پر گرفتاریاں کیں اور آنسو گیس کا استعمال کرتے ہوئے پرامن اور نہتے مظاہرین پر مہلک ہتھیاروں کا غیر قانونی استعمال کیا گیا جو کہ ایک افسوسناک اور غیر انسانی عمل ہے۔

ایمنسٹی انٹرنیشنل کے مطابق کوئٹہ میں موبائل نیٹ ورک کی معطلی نے معلومات کے آزادانہ بہاؤ کو روک دیا ہے۔
ایمنسٹی انٹرنیشنل نے پاکستانی حکام سے مطالبہ کیا ہے کہ وہ پرامن مظاہرین کے خلاف غیر قانونی کریک ڈاؤن فوری طور پر بند کریں اور پرامن احتجاج اور اظہار رائے کی آزادی کے حق کو یقینی بنائیں جو کہ پاکستان کی بین الاقوامی انسانی حقوق کی ذمہ داریوں کے مطابق ہے۔
تنظیم نے حکام سے مطالبہ کیا ہے کہ ان تمام مظاہرین کو جو صرف احتجاج کے حق کو استعمال کرنے کی وجہ سے گرفتار کیے گئے ہیں فوری طور پر رہا کیا جائے اور غیر قانونی طاقت کے استعمال کی فوری مکمل اور غیر جانبدارانہ تحقیقات کر کے ذمہ داروں کو انصاف کے کٹہرے میں لایا جائے۔