اسلام آباد میں بلوچ لواحقین کا احتجاج تیسری روز بھی شدید بارش اور تپتی دھوپ میں جاری

پاکستان کے دارالحکومت اسلام آباد میں بلوچ لواحقین کا جاری دھرنا آج جمعہ کے روز بھی کھلے آسمان تلے، چلچلاتی دھوپ اور کیچڑ میں لپٹے نیشنل پریس کلب کے سامنے خالی زمین پر بغیر کسی سائبان کے جاری ہے۔ یہ دھرنا تیسری روز بھی اسی حالت میں جاری ہے، جس میں مظاہرین اپنی حق تلفی کے خلاف احتجاج کر رہے ہیں۔

یہ احتجاج بلوچ یکجہتی کمیٹی کے اسیر رہنماؤں کے اہل خانہ اور لاپتہ افراد کے لواحقین کی طرف سے دیا جا رہا ہے۔ مظاہرین ان کی غیر قانونی حراست اور ان کے کیسز کی قانونی کارروائی میں غیر ضروری تاخیر کے خلاف آواز بلند کر رہے ہیں۔ ان کا مطالبہ ان کے پیاروں کو انصاف دلوانا اور انہیں بازیاب کرانا ہے۔

گذشتہ روز یہ دھرنا شدید موسلا دھار بارش کے دوران بھی جاری رہا۔ پولیس کی بھاری نفری تعینات تھی تاکہ مظاہرین کو ٹینٹ لگانے سے روکا جا سکے، لیکن مظاہرین نے شدید بارش میں بغیر کسی چھت کے اپنا احتجاج جاری رکھا۔ ان حالات میں، کوئی سائبان یا پناہ گاہ فراہم نہ کیے جانے کے سبب، مظاہرین کو بہت مشکلات کا سامنا کرنا پڑا۔

بغیر ٹینٹ اور سائبان کے، بچے، بزرگ اور خواتین کو سخت مشکلات کا سامنا ہے۔ ان مظاہرین کو بارش اور تپتی دھوپ دونوں میں ننگے پاؤں کیچڑ میں بیٹھنے پر مجبور کیا جا رہا ہے، جو ان کی صحت اور سلامتی کے لیے خطرناک ہے۔

بلوچ یکجہتی کمیٹی نے اپنے ایک بیان میں کہا ہے کہ 16 جولائی 2025 کو، جبری گمشدگی کے متاثرین اور حراست کے خلاف احتجاج کے لیے، بلوچستان سے اسلام آباد تک سینکڑوں میل کا سفر طے کیا گیا۔ کمیٹی کا کہنا ہے کہ گزشتہ دو دنوں سے اسلام آباد میں موسلادھار بارش اور شدید گرمی کے باوجود، مظاہرین اپنی جدوجہد جاری رکھے ہوئے ہیں، اور حکام ان کے لیے کوئی سہولت فراہم نہیں کر رہے۔