بلوچستان ءَ دائش ءِ بنجلانی بیگ بے تاھیر کنوک اِنت، بی این ایم ءِ سرکماش ڈاکٹر نسیم ءِ ماں راجانی سنت ءِ ھمگْوریں مراگشے ءَ تْران

ماں راجانی سنت ءِ کارگس ءَ ، بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ بلوچ مردمی اگبالانی پتر ( بی ایچ آر سی ) ءِ ھمگْوریں نیادے ءَ بھر زرتگ ۔ نیاد ءِ بنگپ ’’ پاکستان ءَ مردمی اگبالانی بگیری : بلوچستان ءِ سر ءَ دلگوش‘‘ اَت۔

گوں مراگش ءَ تْران کنان ڈاکٹر نسیم ءَ بلوچستان ءِ بے تاھیر کنوکیں جاورانی سر ءَ دلگوش پرینتگ۔ آئی ءَ اے ناگیگیں جاورانی بن زورگری ءِ بگیری ءَ بلوچ گھگیری ءِ پدگوانک لیک اتگ ، آئی ءَ گْوشتگ ، ’’ بژنی گپے کہ بلوچستان ءِ سر ءَ پاکستان ءِ زورگری ءِ بگیری مئے روائیں گھگیری ءِ پسو ءَ پاکستانی مھترھند مئے راستیں من ءُ مولانی دیم ءِ دارگ ءَ مردمی اگبالانی لگتمالی کنگ ءَ اِنت۔پمیشکا بلوچستان ءَ مردمی اگبالانی لگتمالی ءِ بن ءِ سرپد بیگ المی اِنت۔

گْوستانکی رد ءَ آئی ءَ 76 سال پیش پاکستانی لشکر ءِ بلوچستان ءِ سر ءَ ارش ءِ بارہ ءَ گْوشتگ ، آئی ءِ گْوشگ اَت 76 سال پیش ھمے روچ ءَ پاکستانی لشکر ءَ گوں مزنیں زورے ءَ بلوچستان ءِ سر ءَ ارش کرتگ ءُ گوں زور گپتگ ئِے۔76 سال اِنت کہ 27 مارچ ءَ سیاھیں روچ دارگ بیت، اے گْوستانک ءِ سھرائیں پیچے۔بلوچستان ءِ گْوستانک ناں ایوک ءَ مارا سیاھیں درے ءِ تْرانگ ءَ گیج ایت بلکیں مئے آجوئی ءِ جھد ءِ آس ءَ ھم جُمبلاس کنت۔ 1948 ءَ ھمے روچ ءَ پاکستان ءَ میان راجی راھبند ڈالچار کرتگ اَنت ءُ آجوئیں بلوچستان پہ زور گپتگ ءُ مئے آزاتی ءِ واھگ اشکند کرتگ۔

آئی ءَ وتی تْران ءِ دیمتر ءَ بلوچستان ءِ آجوئی ءُ چہ آئی ءَ پد پاکستان ءِ زورگری ءِ گْوستانک ءِ پژدر ءَ گپ جنان ءَ گْوشتگ مارا گْوستانک شموشگی نہ اِنت۔ 11 اگست 1947 ءَ چہ دمگ ءَ برتانیا ءِ درکپگ ءَ پد بلوچستان ءَ وتی آجوئی ءِ جار جتگ۔گْوستانکی مسامانی پد ءَ بلوچستان ءِ گوں برتانیا ءَ نزیکی ودی بوت، آئی ءَ ھمے مسامانی بنیاد ءَ بلوچستان ءِ آزاتی من اتگ۔نوک آزاتی رسک ءَ پد بلوچستانءِ پارلیمان جوڑ بوت اَنت ، وھدے چہ پاکستان ءِ نیمگ ءَ بلوچستان ءِ گوں پاکستان ءَ ھوار گیجگ ءِ لوٹ کنگ بوت گڑا بلوچ پارلیمان ءِ جھلادی پارلیمان ءُ بالادی پارلیمان ، دوئیناں گوں ھم پتی ءَ پاکستان ءِ اے لوٹ رد کرت۔ بلے بلوچ راج ءِ واھگ ءُ وتواکیں مھترھند ءَ ڈالچار کنان پاکستان ءَ بلوچستان زور گپت۔انیگیں سالاں برتانیا ءَ بلوچستان ءِ سر ءَ پاکستان ءِ زورگری ءِ تہ ءَ وتی کرد من اتگ ، اے زورگری ءَ بلوچستان چہ آئی ءِ آجوئی ءِ اگبال ءَ زبھر کرتگ۔

بلوچ راج ءِ سر ءِ بیوکیں زوراکیاں سھرا کنان ، بی این ایم ءِ سرکماش ءَ پاکستانی مھترھند ءِ یکشلیں زوراکیانی سر ءَ دلپدری درشانتگ ، ’’ چہ ھمے شومیں روچ ءَ پد ، بلوچستان یکشل ءَ پاکستان ءِ زوراکیانی دیمپان اِنت۔اے تباہ کنیں زرواکی اَنت : کھولانی مردم بے ڈس ءُ نشان گار کنگ بہ اَنت ، کھول شنگ اَنت ، مئے گْرانھادیں مڈی پہ پاکستان ءِ گزرانک ءِ پزور کنگ ءَ کارمرد کنگ بہ اَنت چہ ایشی ءَ مئے مردم گژن ءُ بزگی ءِ آماچ اَنت۔گوں ایشاں ھوار پاکستانی مھترھند تْرام اتگیں رنگے ءَ مئے زبان ، مئے دودمان ءُ مئے پجار ءَ کار کنگ ءِ کوشست کنگ ءَ اِنت۔‘‘

’’ اے ایوک ءَ گپ ءُ دانک نہ اَنت ، بلکیں مئے زرداں نگاریں ٹپ اَنت کہ پشت ماں پشت بلوچ راج ءِ پدریچاں پر اَنت۔ بلوچستان ءَ برجاھیں زوراکی پاکستان ءِ زورگریں واکداری ءُ زورگری ءِ تچکیں آسر اَنت ، بلے ھمے جاورانی تہ ءَ بلوچ راج گوں بھادری ءَ اے زوراکیانی دیم ءَ میلانک اِنت۔ مئے گھگیری ءِ روتگ ، سیکولرازم ، جنین ءُ مردین ءِ میان ءَ برابری ءُ جھانی تک ءَ گوں مردمی اگبالانی راھبنداں ھم رد اَنت۔ مئے زْرمبشت پہ آجوئی ءِ جھانی جنگ ءَ سھرا ءُ سانمندیں بستارے دار ایت۔‘‘

بلوچستان ءِ جاورانی میان استمانی تک ءَ بدیں سان ءِ نیمگ ءَ دلگوش گْور کنان ڈاکٹر نسیم ءَ میان استمانی آگاھی ءُ ھمکاری ءِ لوٹ ءِ سر ءَ زور داتگ۔آئی ءَ گْوشتگ ، ’’ زوراکیانی دیمپانی پد ھم ، بلوچ راج گوں وتی مھکمیں گھگیری ءَ چہ پیسر ءَ مردمی اگبالانی جھد ءَ پرارزشتیں کرد پیلو کنگ ءَ اِنت۔ کمو بہ جیڑ اِت کہ آجوئیں بلوچستان ءِ چونیں پرانکی ئیں سان بیت کن اَنت۔ مئے زمین ءِ اسٹرٹیجک بستار، جھلیں دودمانی ریشگ ءُ گْوستانک۔ پہ سیکولر ربیدگاں مئے ھدوناکی مارا ما میان استمانی تک ءَ پرارزشتیں بائیوارے ءِ بستار دے اَنت۔ آجوئیں بلوچستان دمگ ءِ تاھیر ءُ داشت ءَ ردوم دنت چہ پاداریں دیمروئی ،ایمنی ءُ ھم سنتی ءَ چکاریں باندات ءِ راہ ءَ ھموار کرت کنت۔‘‘

آئی ءَ ماں بلوچستان ءَ میان استمانی ناشرکاریں گل دائش ءِ بنجلانی سر ءَ بے تاھیری درشان کرتگ ، کہ آیاں پاکستانی لشکر ءَ تچکے ءَ پلہ مرزی کنگ ءَ اِنت، آئی ءَ جست کرتگ ، ’’ بلوچستان ءَ میان استمانی ناشرکاریں گل دائش بنجل ھست اَنت ءُ پرکار اَنت۔ آ پاکستانی لشکر ء چیردستی ءُ کمک ءَ کار کنگ ءَ اَنت۔اے لشکری توان ءِ گوں تانسرپسندیں دینی باورانی نزیک ءُ جھلیں سیادی ھست ءُ بلوچستان ءَ دیناداسی مردمی اگبالانی بگیری کنگ ءَ اِنت، اے جست المی اِنت باریں جھان ءَ اے سما ھست کہ بنگلہ دیش ءَ گوں دو لک جنیناں جنسی زوراکی ءُ سی لک بنگالیانی کوش ءِ زمہ واریں ھما پاکستانی لشکر اِنت ؟َ ، مروچی ھما زوراکیاں کہ ما بلوچستان ءَ گندگ ءَ ایں آ بنگلہ دیش ءَ اے لشکر ءِ بیمناکیں کارپدانی چھرگ ءَ جن اَنت۔‘‘

وتی گْوشتانک ءِ گڈی ءَ آئی ءَ گْوشتگ من ءَ اوست اِنت کہ شما بلوچ راجی جھد ءِ پلہ مرزی کنان ، مئے ھمراھداری کن اِت۔ما پجیگ ءَ انچیں بانداتے ءِ نیمگ ءِ جز اِت کن ایں کہ آ اود ءَ ھمک بلوچ ماں وتی زند ءَ ایمنی ءُ مڑا ءِ واھند بہ بیت۔