بی این ایم ءِ سروک ءِ کماش ءُ ناکوانی زور بیگواھی بلوچ راج ءِ بگیری ءَ مچانکی ڈنڈ ءِ دْرچ اِنت۔ جارکش ، بی این ایم

بلوچ راجی زْرمبشت ( بی این ایم ) ءِ جارکش ءَ گْوشتگ بی این ایم ءِ سرکماش ءِ پت ءُ ناکوانی زور بیگواھی نوکیں گپے نہ اِنت بلکیں اے تْرام اتگیں شوندات ءِ بھر اَنت ، ایشی ءِ رد ءَ بلوچ راج مچانکی ڈند دیگ بیگ ءَ اِنت۔سرجمیں بلوچستان ءَ سیاسی کارکنانی لوگ ءِ مردم پہ زانت نشانگ کنگ بیگ ءَ اَنت ، زور بیگواھی اے زوراکی ءِ بنکی ءُ برجاھیں رنگے جوڑ بیتگ۔

جارکش ءَ سھرا کرتگ کہ گْوستگیں باز سال اِنت بی این ایم ءُ دگہ سیاسی گلانی راھشون ءُ باسکاںی کھولاں زور گر دلسیاہ کنگ ءَ اِنت ، آ زوراکیی ءُ مچانکی ڈند ءِ دیمپان اَنت۔اے گامگیجانی مول ھمیش اِنت کہ گوں ترس ءُ بیھار ءَ سیاسی گھگیری نگٹ کنگ بہ بیت۔بلے اے کارپد وتی مولاں بے سوب اَنت۔

آئی ءَ گْوشتگ بی این ایم ءِ راھشون ءُ باسک چہ اے رنگیں کاراں نہ ترس اَنت۔پاکستانی مھترھند میان راجی تک ءَ پہ بلوچ آجوئی زْرمبشت ءِ پلہ مرزی ءَ کرتگیں بی این ایم ءِ کاراں ناوش اِنت۔ سرکماش ڈاکٹر نسیم ءِ سروکی ءَ گْوستگیں سالاں بلوچ راجی جیڑہ سانمندیں رنگے ءَ جھانی تلواں سھرا کنگ بیتگ۔بی این ایم ءِ یکشلیں کوشستانی برورد ءَ یورپی ڈیھاں بلوچ راجی زْرمبشت ءَ دلگوش رسگ ءَ اِنت ،پمیشکا پاکستانی لشکر بی این ایم ءِ راھشون ءُ باسکانی کھولاں دلسیاہ کنگ ءَ اِنت۔

جارکش ءَ گْوشتگ سرکماش ڈاکٹر نسیم بلوچ ءِ کھول ءِ نشانگ کنگ اے راستی ءَ پدر کت کہ بلوچستان ءَ پرایمنیں سیاسی گلانی راھشون ءُ باسک ھم چہ مھترھندی زوراکی ءُ مچانکی ڈن ءَ پھریز نہ اَنت۔جھانی تک ءَ یکشل ءَ جست نہ گرگ ءَ پاکستانی لشکر مردمی اگبالانی اے مزنیں بگیریانی کنگ ءَ چد ءُ گیش ناترس اِنت۔پاکستان ءَ جست ءُ پرس ءِ ترس نیست پمیشکا گوں ناترسی ءَ شھرمنند نشانگ کنگ بیگ ءَ اَنت ءُ انچیں تْرام اتگیں کار کنگ بیگ ءَ اِنت کہ گوں بلوچ راج ءِ چکچینی ءَ ھم سنگ اَنت۔اے کارانی کنگ ءَ پاکستانی لشکر ھچ رنگیں کردانکی ( اخلاقی ) ءُ راھبندی سیمسر مان نہ یار ایت۔

جارکش ءَ گْوشتگ بی این ایم اے گپ ءِ سر ءَ زور دنت کہ بلوچستان زور گپت ءُ اڑیں دمگے ، اد ءَ بلوچ راج زورگر ءِ بگیری ءَ پہ وتی وتواجھی ءَ جھد ءَ اِنت۔ زوراکی ءُ زور ءِ بے کچیں کارمرد ءَ پد ھم پاکستان بلوچ ءِ آجوئی ءِ زْرمبشت ءِ دارگ ءَ بے سوب اِنت۔بلوچ سرمچارانی ھمک ارش ءَ پد پاکستانی لشکر وتی زھر ءَ مردمانی سر ءَ کش ایت۔ دومی نیمگ ءَ پاکستانی سیاستدان لشکر ءَ گر ءُ دار کنگ ءِ جاہ ءَ آیانی کارانی تہ ءَ آسراتی دیگ ءُ پلہ مرزی کنگ ءَ اَنت۔

جارکش ءَ چد ءُ دیم گْوشتگ بی این ایم پاکستان ءِ زوراکیانی دیم ءَ بے توار نہ بیت۔بلوچستان ءَ برجاھیں مردمی اگبالانی مزنیں بگیری ءُ زوربیگواھیانی سر ءَ 7 فروری ءَ ماں جرمنی ءَ زھرشانی کنگ بیت۔ ایشی ءِ پجیگ ءَ تْرام اتگیں رسانکی مھمے ھم ھلائینگ بیت ، ایشی ءِ تہ ءَ تامری درشان ، دستاویزی تامر ، پوسٹر ءُ مراگش ھوار بیت داں راجی ءُ جھانی تک ءَ سنچ ودی کنگ بہ بیت۔

آئی ءَ پاکستانی واکدارانی انیگیں درشانانی سر ءَ بے تاھیری درشانتگ ءُ گْوشتگ پاکستان ءِ دیمپانی وزیر ءُ دگہ واکدانی نیمگ ءَ بلوچستان ءَ چد ءُ گیش لشکر دیم ءِ دیگ گپاں پد اے ترس گیش بیتگ کہ چہ پیسر ءَ ھرابیں جاور چد ءُ گیش ھراب بہ اَنت۔ پاکستانی واکدار ءُ کاسگ چٹیں مزن وزیر سرفراز بگٹی وتی درشانانی تہ ءَ اے پیش دارگ ءِ کوشست ءَ اَنت کہ مھترھندی واک پہ راھدار ءُ کمیں رنگے ءَ کارمرد بیگ ءَ اِنت ، بلے راستی چہ ایشی ءَ چپ اِنت۔ راستی ایش اِنت کہ بلوچستان ءَ درآمیدگسی کوش ، زور بیگواھی ، شھر ءُ بازارانی سر ءَ ڈرون ارش ، بمب گواری ، سیاسی ، چاگردی ءُ زانشتی سرگرمیانی سر ءَ پابندی ، سیاسی راھشون ءُ کارکنانی ناراھیں دزگیری ھم روچیگیں کار اَنت۔

جارکش ءَ گْوشتگ چد ءُ گیشتر لشکری بیڑ ءُ دیناداستی مچانکی ڈنڈ دیگ ءِ بیھاراں پد اے ترس ودی بیگ ءَ اِنت بلوچ چاگرد چد ءُ گیش ترندیں پابندی ءُ زوراکیانی آماچ کنگ بیت۔

انیگیں ویلانی درور دیان جارکش ءَ گْوشتگ 2 فروری ءَ بانگواہ ءَ پاکستانی لشکر ءَ ھب ءَ بلوچ راجی زْرمبشت ( بی این ایم ) ءِ سرکماش ءِ کھول نشانگ کرت۔ دزگیری ءَ پد سرکماش ءِ پت محمد بخش ساجدی ، آئی ءِ دو ناکو نعیم ساجدی ءُ انجینئر رفیق زور بیگواہ کرت اَنت۔

گوادر ءَ پاکستانی لشکر ءَ گوں مزنیں سلاھاں لوگے ءِ سر ءَ ارش کرت ، چہ ایشی ءَ جنین ءُ چکانی پجیگ ءَ 12 کس بیران بوت۔چہ کشگ بیتگیں مردمانی تہ ءَ نور محمد زھری ء ملا جورک ءُ آئی ءِ چک یاسمین گون اَنت۔

پل آباد تربت ءَ پاکستانی لشکر ءَ میتگ ءِ سر ءَ مارٹر جت ، چہ ایشی ءَ 15 سالی ئیں انس ء ابراھیم بیران بوت۔

چار روچ اِنت کہ سرجمیں بلوچستان ءَ دامگ سرجم ءَ بند اِنت ، چہ ایشی ءَ گیشتریں جاھانی گوں جھان ءَ راھوت سستگ اَنت ءُ پاکستانی لشکر لشکر ءِ بیڑاں مردماں بیتگیں تاوانانی بارہ ءَ سرپدی رسگ سکا گْران اِنت۔

دلجمیں حالانی رد ءَ نوشکے ءَ پاکستان ءَ دھاں ڈرون ارش کرتگ ، اے ارشاں میتگ نشانگ کنگ بیتگ اَنت ۔2 فروری ءَ جمالدینی ءَ بیتگیں ڈرون ارشے ءَ سئے سالی ئیں جنکیں چکے ، دیدگ ء عبداللہ منان۔

جارکش ءَ گْوشتگ بی این ایم چہ میان راج ءَ دزبندی کنت کہ آ بلوچستان ءِ جاورانی سر ءَ زیت ءُ سنگینیں وڑے ءَ دلگوش بہ دنت۔ پاکستان پہ زانت میان راج ءَ گمراہ کنگ ءَ اِنت داں بلوچ راج ءِ بگیری ءَ برجاھیں چکچینی چیر دیگ بہ بیت۔بلوچستان ءِ تیاب ، زمین ءُ ابرمی مڈیانی دستیگ کنگ ءَ پاکستان بلوچ راج ءِ وتواکی ءِ اگبال ءَ رد کنگ ءَ اِنت ءُ پہ آیانی راجی پجار ءِ گمسار کنگ ءِ رند ءَ اِنت داں وتی زورگری ءَ پادار بہ کنت۔

آئی ءَ گْوشتگ مردمی اگبالانی بارہ ءَ میان راج ءِ دودیمی اے دمگ ءِ جیڑھاں چد ءُ گیش کنت۔ بی این ایم لوٹ ایت کہ پاکستان میان راجی تک ءَ جست کنگ بہ بیت۔ گوں پاکستان ءَ بازرگانی بائیواری ، گچینی بلوچستان ءِ شورانی تہ ءَ سرمایہ کاری ءِ سر ءَ چار ءُ بہ چار کنگ بہ بیت۔میان راجی دزمانجنی ءُ مردمی اگبالانی پھازگ ءَ دیر کنگ ، اے مردمی جیڑہ ءَ گیشتر کنت۔

جارکش ءَ گْوشتگ انیگیں ویلانی سر ءَ بی این ایم وتی سیاسی ، زھرشانی ءُ رسانکی سرگرمیاں گیش کنت۔بلوچستان ءِ جاورانی سھرا کنگ ءَ ھمگرنچ ، یکشلیں زھرشانی ءُ رسانکدری مھمے بندات کنگ بیت۔مھترھند ھمینچک گیش زور کارمرد کنت ، بی این ایم ءِ آشوبی باسک گوں ھمینچکیں مگیمیں باور ءُ داشت ءَ آئی ءِ دیمپانی کن اَنت۔

آئی ءَ گْوشتگ بی این ا یم ءِ رسانک ، آئی ٹی ءُ ربیدگی تک ھمک ھپتگ یکشل ءَ آنلائن مراگشانی پارست ءَ بلوچستان ءِ جیڑھاں سھرا کنت۔ پہ رسانکی کارانی گھتر کنگ ءَ گوں درسیں تک ءُ ھنکیناں شور کنگ بیت داں بلوچ راج ءِ توار جھان ءَ گیش اتگ ءُ سانمندیں رنگے ءَ رسینگ بہ بیت۔