سرکماش بی این ایم برتانیا ءَ سر بیتگ ، گوں پارلیمانی باسک ، برتانیا ءِ جاھمنندیں بلوچ ءُ چیردستیں راجانی جھگیراں گندک کنت

اے سرگرمی پہ بی این ایم ءِ تھی تک ءَ مھکم کنگ ءُ پہ زْرمبشت ءِ داشت ءِ چد ءُ گھتر کنگ ءَ ارزشت دار اَنت

بلوچ راجی زْرمبشت ( بی این ایم ) ءِ سرکماش ڈاکٹر نسیم پہ سیاسی تر ءُ تاب ءَ برتانیا ءَ سر بیتگ۔ اے تر ءُ تاب ءِ مول میان استمانی تک ءَ بلوچ راجی زْرمبشت ءُ بلوچستان ءَ برجاھیں مردمی اگبالانی لگتمالیانی سھرا کنگ اِنت۔ وتی تر ءُ تاب ءِ میان ءَ ، ڈاکٹر نسیم گوں بی این ایم ءِ اگدہ دار ءُ باسکاں گندک کنت۔ اے گند ءُ ننداں گل ءِ کار ، شور ءُ پہ باندات ءِ کاراں سوڑگ بیت۔اے سرگرمی پہ بی این ایم ءِ تھی تک ءَ مھکم کنگ ءُ پہ زْرمبشت ءِ داشت ءِ چد ءُ گھتر کنگ ءَ ارزشت دار اَنت۔

وتی تر ءُ تاب ءِ میان ءَ ڈاکٹر نسیم گوں برتانیا ءِ پارلیمانی باسکاں ھم گندگ کنت۔ اے گند ءُ نندانی مول برتانیا ءِ سرکار ءُ مردمانی جھگیراں بلوچ راج ءِ جیڑہ ءُ آیانی جھد ءِ بارہ ءَ سھی کنگ اِنت۔ سرکماش ھمے دم ءُ درگت ءَ بلوچانی جیڑہ، مردمی اگبالانی بگیری ، سیاسی ءُ گزارانکی اگبالانی جھد ءُ بلوچ آجوئی ءِ زْرمبشت ءِ بارہ ءَ دلجمی ءَ گپ جنت۔

اے دزگٹیاں ابید ، ڈاکٹر نسیم گوں دگہ چیردستیں راجانی جھگیراں ھم گند ءُ نند کنت۔ اے گند ءُ نندانی مول جتائیں چیردستیں راجانی میان ءَ کہ پہ وتی آجوئی ءُ اگبالاں جھد ءَ اَنت، یکجھتی ءُ ھم کاری ءِ سکین اِنت۔

ڈاکٹر نسیم اے میان ءَ گوں برتانیا ءَ نندوکیں بلوچاں ھم گندک کنت۔ ھمیشانی پجیگ ءَ بلوچ راجی زْرمبشت برتانیا تک ءِ کونسل نیاد ءَ ھم بھر زیر ایت ءُ درسیں بنزھاں تر ءُ تاب کنت داں گل ءُ گل ءِ باسکانی میان ءَ راھوت چد ءُ گیش مھر کنگ بہ بہ اَنت۔

بی این ایم ءِ سرکماش ءِ اے تر ءُ تاب میان استمانی تک ءَ پہ بلوچ راجی زْرمبشت ءِ پلہ مرزی ءَ توار چست کنگ ءُ پہ بلوچ راج ءِ آجوئی ءِ جھد ءَ پلہ مرزی گرگ ءِ واھگ ءُ ھل ءَ سھرا کنت۔اے ناں ایوک ءَ پہ بلوچ زْرمبشت ءَ ارزشت دار ایت بلکیں جتائیں چیردستیں راجانی میان ءَ یکجھتی ءِ گیش کنگ ءَ ھم کمک کنت۔