ماں برتانیائی پارلیمان ءَ بلوچستان ءِ جاورانی سر ءَ بی این ایم ءِ نیاد

بلوچ راجی زْرمبشت ( بی این ایم ) ءَ مردمی اگبالانی جھانی روچ ءِ دم ءُ درگت ءَ جرمنی ءِ دو شھر کولن ءُ کیمنٹس ءَ زھرشانی کرتگ۔ زھرشانی ءِ میان ءَ بی این ایم ءِ باسکاں جرنبشت ءُ تاک گون بیتگ ، آیاں وتی لوٹ ءُ بلوچستان ءِ ناگیگیں جاورانی سر ءَ گپ جتگ۔

گپ جنوکاں بلوچستان ءَ برجاھیں مردمی اگبالانی بگیری ءِ نیمگ ءَ دلگوش پرینتگ ، کہ آ اود ءَ پاکستانی مھترھند ءَ تْرام اتگیں رنگے ءَ زوراکیانی دْرچ برجاہ داشتگ۔

بی این ایم جرمنی تک ءِ سرکماش شرھسن ، ءَ درائینتگ بلوچستان ءِ شھرمنند چہ بنکی مردمی اگبالاں زبھر ءُ زوراکی ءِ نشانگ کنگ بیگ ءَ اَنت۔آئی ءَ گْوشتگ پاکستانی اسٹبلشمنٹ دیناداسی ءُ پہ زانت بلوچ راج ءَ چکچین کنگ ءَ اِنت۔

بی این ایم جرمنی ءِ کلیتدار امجد مراد ، ءَ چہ میان استمان ءَ لوٹ اتگ کہ آ مردمی اگبالانی پھریزگ ءِ وتی واھگ ءَ برجاہ بہ دار ایت ءُ بلوچ راج ءِ جاور ءِ سر ءَ دلگوش گْْور بہ کنت کہ پاکستان ءِ زورشاھی شونداتانی رد ءَ یکشل ءَ زوراکی سگگ ءَ اِنت۔

بی این ا یم ءِ باسک ، ھزیر ءَ ماں بلو چستان ءَ مھترھندی زوراکیانی سر ءَ دلجمی ءَ گپ جتگ کہ پاکستان بلوچانی سر ءَ چونیں زوراکی کنگ ءَ اِنت۔آئی ءَ گْوشتگ پاکستانی لشکر زور بیگواھی ، در آمیدگسی کوش ءُ بے میاریں مردمانی آوار جنگ ءَ گون اَنت ، آیاں ناشرکار لیک اَنت ءُ دروگیں میڑاں کش اَنت۔آئی ءَ اے کارپد مردمی اگبالانی مزنیں بگیری لیک اتگ اَنت ءُ چہ میان استمان ءَ زیت دزمانجنی ءِ لوٹ کرتگ۔

بی این ایم ءِ باسک ءُ لچہ کار شئے جامی ، ءَ بلوچستان ءِ جاورانی پد ءَ میان استمانی بے تواری ءِ سر ءَ ایراد گپتگ۔آئی ءَ گْوشتگ میان استمانی پترانی سر ءَ باز بر ءَ بلوچستان ءِ اے جیڑھانی سر ءَ گپ بیتگ بلے چہ ایشی ءَ پد ھم بلوچ راج ءِ جاور ءِ نیمگ ءَ دلگوش دیگ نہ بیتگ۔

بی این ایم ءِ باسک ، آسپ ، ءَ مردمی اگبالانی روچ ءِ ارزشت سھرا کرتگ ءُ گْوشتگ ، اے روچ ءَ کہ جھان مردمی اگبالانی روچ ءَ دارگ ءَ اِنت ، بلوچستان ءَ کھول پہ وتی کس ءُ مردمانی زور بیگواھی ءِ بگیری ءَ مزدانک ءِ لوٹ کنگ ءُ دگانی سر ءَ زھرشانی کنگ ءَ اَنت۔

بی این ایم ءِ باسک ، بھتاور زاھد ، ءَ گْوشتگ بلوچستان ءَ زوراکی بے گت ءُ گمانی نہ اِنت بلکیں بلوچ آجوئی ءِ زْرمبشت ءِ دارگ ءَ شر جیڑاتگیں شوندات ءِ بھر اِنت۔ آئی ءَ زور داتگ کہ بلوچ راجی وتواجھی منگ بہ بیت داں ایمنی ءُ مزدانک برجاہ بیت بہ کنت۔

بی این ایم ءِ باسک ، شلی ذاکر ءَ شیوار کرتگ کہ اگاں زوراکی ءِ دارگ ءَ گامگیج زیرگ مہ بیت گڑا ایشی ءِ دیرمانیں سان پشت کپ اَنت۔ آئی ءَ چہ میان استمان ءَ دزبندی کرتگ کہ زیت دزمانجنی بہ کنت۔

بی این ایم ءِ باسک ھمیدہ ، ءَ زور بیگواھیں مردمانی کھولانی جیڑھانی سر ءَ گپ جتگ ءُ گْوشتگ کہ زور بیگواھی ءِ ویلانی پد ءَ بلوچ راج رنج ءُ ترس ءِ تہ ءَ اِنت۔

بلوچ زْرمبشت ءِ دزواہ ، آبد ھسین ، ءَ گْوشتگ کہ گوں مھترھندی زوراکیاں بلوچ راج ءِ توار ءِ نگٹ کنگ ءِ کوشست برجاہ اِنت۔ آئی ءَ وتی سرگْوست ءِ رد ءَ ھم گْوشتگ کہ آئی ءَ پاکستانی بیڑ دیستگ ءُ سگ اتگ اَنت ءُ چہ میان استمان ءَ اے زوراکیانی بگیری ءَ گامگیج ءِ لوٹ کرتگ۔