ما بلوچ جیڑہ ءَ راج ءِ دیم ءَ گوں سیاسی زانت، سما ءُ منگھیں دْروشمے ءَ ایر کرت کن ایں۔ ڈاکٹر نسیم

ما بلوچ جیڑہ ءَ راج ءِ دیم ءَ گوں سیاسی زانت، سما ءُ منگھیں دْروشمے ءَ ایر کرت کن ایں۔ ڈاکٹر نسیم

بلوچ راجی زْرمبشت (بی این ایم) ءِ بنجاھی پتر سیمی نیاد گل ءِ سرکماش ڈاکٹرنسیم ءِ سروکی ءَ برجم دارگ بیتگ۔ نیاد ءَ بنجاھی اگدھدار ءُ بنجاھی پتر ءِ درسیں باسکاں بھر زرتگ۔
بنگپ گل ءِ سرکماش ءِ تْران،راھبند ءِ بگیری کنگ ءَ کارروائی، دمگی ءُ میان استمانی سیاسی جاور ،چاگردی رسانکدر ءِ ارزشت ءُ مئے شوندات،شرگداری،پارٹی ءِ کارکرد ءُ دیمتر ءِ کارانی بارہ ءَ دُرسیں باسکاں پہ دلجمی سوڑگ کرتگ ءُ گچینی شور کنگ بیتگ۔

گوں بنجاھی پتر ءَ تْران کنان ءَ بی این ایم ءِ سرکماش ڈاکٹر نسیم ءَ گْوشتگ بنجاھی پتر چہ راجمان پتر ءَ پد گل ءِ درساں واکدار ترین ءُ شونداتانی ٹاھینگ ءِ ادارہ اِنت۔ اے ادارہ ءِ تہ ءَ ما ھما بنگپانی سر ءَ گپ ءُ تْران کن ایں کہ آیانی سر ءَ ما ھمک جاہ ءُ نیاداں گپ کرت نہ کن ایں۔اِد ءَ گپ ءُ تْران ءَ پد ھرچی شور کہ کنگ بیت آ گل ءِ شوندات جوڑ بہ اَنت کہ ایشانی پاسداری اُگدھداراں بہ گر داں باسکاں درساں کنگی اِنت۔ اِد ءَ باسک گپ ءُ تْران کن اَنت ءُ راجی زْرمبشت ءِ لوٹ ءُ گل ءِ پرکار کنگ ءُ کارانی گھتر کنگ ءَ نوکیں شودات ٹاھین اَنت۔مئے مروچیگیں شوندات ءُ کارشونی مئے بانداتیگیں کاراں آسان کن اَنت۔

آئی ءَ گْوشتگ کہ گل ءَ گْوستگیں سال ءَ برجم داشتگیں راجمان پتر ءَ نوکیں راہ ءُ راھبند گیشینتگ۔گل ءِ جتائیں بھرگ ءِ کارانی گھتر کنگ ءَ جتائیں ادارہ جوڑ کنگ بیتگ کہ گھتریں رنگے ءَ کار کنگ ءَ اَنت ءُ ما وتی کار ءُ کِرد ءِ نیمگ ءَ دلگوش گْور کن این ءُ بے سیتیں گپ ءُ کارانی بھر جوڑ نہ نہ بہ ایں، وھدے کہ مارا پہ کنگ ءَ کار مہ بیت گڑا ما بےسریں بنگپانی سر ءَ وتی وھد ءَ زیان کن ایں بلکیں چہ ایشی ءَ ھرکس سر پہ وت بیت ءُ گل ءَ تاوان بیت۔ پمیشکا درسیں باسک ءُ اگدھداراں وتی کارکرد ءِ نیمگ ءَ دلگوش دیگی اِنت۔

ڈاکٹر نسیم ءَ بلوچستان ءِ جاورانی سر ءَ تْران کرتگ ءُ گْوشتگ کہ بلوچستان ءَ زور ءُ زوراکیانی تہ ءَ مدام گیشی بیگ ءَ اِنت ءُ داں پنجاب ءِ وانگجاھاں ھم بلوچ پھریز نہ اَنت۔بلوچ وتی گْوستانک ءِ بدتریں چکچینی ءُ مچی سزا ءِ دیمپان اِنت۔اے زور ءُ زوراکیانی پدر کنگ ءَ بی این ایم ءِ ادارہ پانک ءُ ریڈیو زرمبش بلائیں کردے پیلو کنگ ءَ اَنت ءُ سپارتکاری ءپڑ ءَ ھم ھمبلاں جْوانیں کِردے پیلو کرتگ۔

آئی ءَ گْوشتگ کہ دژمن بلوچ راجی زْرمبشت ءِ لپاشگ ءَ بلاھیں کارشونی یے ءِ سر ءَ کار کنگ ءَ اِنت۔دُژمن جُھد کنگ ءَ اِنت کہ بلوچ راجدوستی ءِ تچکیں لیکہ ءُ بلوچ راجی بستار ءَ گوں یکشلیں پروپیگنڈہ ءُ وتی جوڑ کُرتگیں لیکہ ءَ الگرد بہ کناں چے ءَ کہ بلوچ راجدوستی ءِ لیکہ ءَ بلوچ راج یک لڑے ءِ تہ ءَ کماتگ۔ اے بابت ءَ پاکستان ءَ گْوست ءَ ھم جُھد کُرتگ ءُ مرچی گوں تیرزی ءَ کار کنگ ءَ اِنت۔ایشانی تہ ءَ یکے مزھب ءِ کارمرز کنگ اِنت، کہ بلوچ راجی زْرمبشت ءِ ھلاس کنگ ءَ پاکستان گوں شریں شوربندی یے ءَ بلوچستان ءِ تہ ءَ اسلام ءِ نام ءَ کارمرد کنگ ءَ اِنت کہ ایشی ءَ گوں اسلام ءَ ھچ سیادی نیست بلے مزھب ءِ نام ءَ گوں مردمانی جوزگ ءَ ارزانی ءَ گوازی کنگ بیت۔

بی این ایم ءِ سرکماش ڈاکٹر نسیم ءَ گْوشتگ کہ بلوچ راجدوستی انچوش توانمند اِنت کہ آئی ءِ لیکہ ءَ پاکستان ءِ دُرسیں جوڑ کُرتگیں لیکہ ءُ پاکستان ءِ جوڑ کُرتگیں مزھب رَد کُرتگ۔ بلوچ آ مردمانی سر ءَ بَدکیت کہ آ پہ پاکستان ءِ سیتان کارمرد بیگ ءَ اَنت۔ایشی ءِ درور مئے دیم ءَ اِنت کہ وھدے پنجاب ءَ یک سری لنکن مھمانے ءَ وتگڑیں مزھب ءِ ایرادگیپتگ اَت ءُ مردماں چو رسترانی وڑ ءَ بیڑ بُرت ءُ آ مردم مانداشت۔بلے بلوچستان ءَ شھید ابدُلرؤپ ءِ سر ءَ ھم انچیں بھتامے جنگ بوت گڑا بلوچ راج ءَ ھچ نہ گْوشت، وھدے کہ پاکستانی ملایانی کُشندہ ٹولی ءَ ابدُلرؤپ کُشت گڑا مردماں بازیں کچے ءَ زھرشانی کُرت ءُ پیشداشت کہ اِد ءَ پاکستان ءِ آؤرتگیں مزھب ءُ لیکہ ءَ ھچ جاگہ نیست بلکیں بلوچ وتی راجی ارزشت ءُ اسلام ءِ جند ءِ ارواہ ءِ رندگیر اِنت ءُ راج ءِ گْوستانک ءِ واھُند اِنت۔ چہ ایشی ءَ مارا دلجم بیگی نہ اِنت چے ءَ کہ پاکستان ءِ نیمگ ءَ مدام جُھد بیگ ءَ اِنت۔پہ ایشی ءِ ھلاس کنگ ءَ مارا داں وتی مردماں راجدوستی ءِ لیکہ ءُ آجوئی ءِ لوٹ ءُ آشوبی زانشت ءِ سرکنگ ءَ جنگی بنیادانی سر ءَ کار کنگ ھژدری اِنت۔

آئی ءَ سیاسی جاورھالانی سر ءَ تران کُرتگ ءُ گْوشتگ کہ بلوش زْرمبشت مدام جنجالانی دیمپان بیتگ بلے گْوستگیں بیست سال اِنت کہ زْرمبشت ءِ تہ ءَ یک تْرامکاری ءُ راھبندے ھست ءُ مُدام دیم ءَ روگ ءَ اِنت۔ مرچی پاکستان جیڑہ ءُ جنجالانی دیمپان اِنت۔ پاکستان ءِ تھی بگیری تچکی ءَ دیم ءَ آھگ ءَ اَنت۔ پاکستان سیاسی، مالی ، آمیدگسی ءُ راھبندی ناگیگانی دیمپان اِنت۔چہ ایشی ءَ ابید پاکستانی لشکر ھم چہ تہ ءَ بھر ءُ بانگ اِنت ءُ آئی ءِ جتائیں ٹولی جتائیں پارٹیانی پارست ءَ پہ پاکستان ءِ واکدار بیگ ءَ زور جنگ ءَ اَنت۔ چہ ایشی ءَ ھمے پدر بیت کہ پاکستان ءَ یک ریاستے ءِ بستار ءَ وتی مزرو شموشتگ۔ اے بھر ءُ بانگی دْروشم بلوچ ءَ ھوار پہ درسیں چیردستیں راجاں موہ ودی کنگ ءَ اِنت۔نو گوں ما بندوک اِنت کہ چہ اے جاوراں ما چینچو سیت زرت کن ایں۔

آئی ءَ گْوشتگ کہ پاکستان بلوچ زْرمبشت ءِ لپاشگ ءَ بے سوب بیتگ۔پمیشکا دژمن گْوستگیں بیست سال بیت کہ یکے ءَ پد دگہ جتائیں دْروشمے ءُ کارشونی یے ءِ سر ءَ کار کنگ ءَ اِنت۔ اے چیز پدر اِنت کہ بلوچ راجی زْرمبشت ءِ ھلاس کنگ ءُ بلوچ راج ءِ چہ آجوئی ءَ دزکش کنگ ءَ دُژمن ءِ کارشونی مدام بےسوب بیگ ءَ اَنت۔ وھدے کہ دژمن مدام کارشونی ءِ مَٹ کنگ ءَ لاچار بوت گڑا اے گپ پدر اِنت کہ ھچ کارشونی کار ءَ آھگ ءَ نہ اِنت ءُ ما چہ آئی ءَ گیش ایں۔اے گھتری مارا مئے گْوستانک، زْرمبشت ءِ تہ ءَ گلانی کارکرد ءُ بلوچ راج ءِ گرانبھائیں دیمونیانی برورد اِنت۔

بی این ایم ءِ سرکماش ڈاکٹر نسیم ءَ گْوشتگ کہ بلوچ ءَ ابید چاگردی رسانکدر ءَ دگہ ھچ رسانک ءَ دزرسی نیست ءُ چاگردی رسانکدر ءِ سیت باز اَنت۔چاگردی رسانکدر ءِ پارست ءَ ما وتی گپ ءَمردم ءُ جھان ءَ سر کرت کن این ءُ ایشی ءِ رد کارمرد کنگ ءِ تاوان سک باز اَنت۔گْوست ءَ ما ایشی ءِ آسر دیستگ بلے مروچاں من گندگ ءَ آں کہ چاگردی رسانکدر رد کارمرد کنگ بیگ ءَ اِنت۔اے بارو ءَ ما زمہ وار، گل ءُ سروک سرپد کرتگ اَنت۔بلے وھدے کہ ما آدگہ گلاں چاگردی رسانکدر ءِ گھتر کارمرد کنگ ءِ گپ ءَ کن ایں گڑا مئے ھم زمہ واری بیت کہ ما ھم چاگردی رسانکدر ءِ گھتر کارمرد کنگ ءَ دیمروی بہ دئے ایں۔ زمہ واریں گلے ءِ بستار ءَ ما وتی توان ءَ زوال مہ کن ایں۔ما گوں یک بلائیں دژمنے ءَ دیم پہ دیم این ءُ ما یک بلائیں سیت مندیں کارے کنگ ءَ ایں۔ وھدے کہ مردم ءِ مول ٹوہ بہ اَنت گڑا پہ آئی ءِ دزگِرگ ءَ سیاسی زانت، سما ءُ گھتریں مارشت ءِ دیم ءَ برگ ءَ گوں باز دلسیاھی ءَ کار کنگ ھژدری اِنت۔ پہ اے منگہ ءُ سیت مندیں کار ءَ ھزارانی کچ ءَ مئے مردم دیمون بیگ ءَ اَنت، بندیگجاھاں زوراکیانی دیمپان اَنت گڑا مارا آیانی دیمونیانی جھگیری پہ دیم کنگی نہ اٰنت بلکیں پہ سیاسی زانت ءُ منگھیں دْروشمے ءَ کنگی اِنت۔گوں زْرمبشت ءَ بندوکیں درسیں واکاں زانگ لوٹ ایت کہ ایوک ءَ سیاسی زانت، سما ءُ منگھیں دْروشم ءَ ما جھان ءِ دیم ءَ وتی راجی جیڑہ ءَ ایر کرت کن ایں۔

بنجاھی پتر ءِ نیاد ءَ گچینی شور کنگ بیتگ اَنت کہ سرکولر ءَ نبیسگ ءُ باسکاں دیم دیگ بہ اَنت۔