بلوچ اسٹوڈنٹس فرنٹ اوتھل ھنکین ءِ ھنکینی لس مجلس ءِ دیوان برجم دارگ بوتگ، فیصل بلوچ ھنکینی کماش ءُ عمر جان بلوچ ھنکینی کارگشاد گچین کنگ بوتگ اَنت۔

بلوچ اسٹوڈنٹس فرنٹ اوتھل ھنکین ءِ ھنکینی لس مجلس ءِ دیوان برجم دارگ بوتگ، فیصل بلوچ ھنکینی کماش ءُ عمر جان بلوچ ھنکینی کارگشاد گچین کنگ بوتگ اَنت۔

بلوچ اسٹوڈنٹس فرنٹ اوتھل ھنکین ءِ ھنکینی لس مجلس ءِ دیوان ھنکینی کمک کارمستر دروشم بلوچ ءِ سروکی ءَ برجم دارگ بوتگ، اِے دیوان ءِ مِھمانِ ھاس بی ایس ایف ءِ بُنجاھی کماش ڈاکٹر شکیل بلوچ ءُ بنجاھی کمک کارگشاد جاوید بلوچ بوتگ اَنت، دیوان ءِ گچینی مھمان بنجاھی پتّر ءِ باسک بانک آسیہ بلوچ ، سنگت عیسیٰ اکبال ءُ ڈاکٹر لطیف لعل بوتگ اَنت۔
بنجاھی لس مجلس ءِ دیوان ءِ تہ ءَ بنجاھی سرکولر، ھنکین ءِ گْوستگیں کارکردگی رپورٹ، شرگداری نشست، گل ءِ کار (تنظیمی امور)، آیوکیں گامگیج (آئندہ لائحہ عمل) ءِ سرھال ءِ سر ءَ گپ ءُ باوست کنگ بوتگ،

دیوان ءِ تہ ءَ بلوچ اسٹوڈنٹس فرنٹ ءِ بنجاھی رھشوناں دمگی ءُ میان استمانی جاور هالانی سر ءَ تران کنان ءَ گْوشت کہ سرجمیں دنیا ءَ زوراکیں تاکتانی مُلکاری ءُ گزرانکی گپچل ، ایردستیں راجانی لُٹ ءُ پُل، آیانی گْواجنانی سر ءَ کبزه، وتی لوٹانی رکینگ ءِ واست ءَ وت ماں وت ءَ مِڑگ ءَ انت۔ یک رندے پد ءَ هستیں مُلکاری ءُ گزرانکی میان استمانی آرڈر ترندی ءَ گوں مٹ بوگ ءَ انت ءُ جُتائیں سامراجی لوٹانی گرد ءَ نوکیں ٹولی بندیانی نیمگ ءَ روگ ءَ انت، دومی نیمگ ءَ دنیا ءِ جاورھال گْوں ترندی ءَ مَٹ بوگ ءَ انت۔ امریکہ دیوالیہ بوگ ءَ انت۔ مِڈل ایسٹ ءِ تہ ءَ آئی ءِ واکداری نِزور بوگ ءَ اِنت، چین نوکیں منزل ءَ سپَر کنگ ءَ انت، وتی پنجگاں مڈل ایسٹ ءِ تہ ءَ مُهکم کنگ ءَ انت۔ روس یوکرین ءَ گوں گِر ءُ چِیل انت۔ برتانیہ ءِ گُزرانک (معیشت) چو برپ ءِ رنگ ءَ آپ بوگ ءَ انت۔ تیل پیداک کنوکیں مُلک وتی آیوکیں گامگیج ءَ ٹاهینگ ءَ انت۔ انڈیا ءِ دیمروی امریکہ ءُ چین ءَ پریشان کنگ ءَ انت، امریکہ ءَ همے ترس انت دومی چین جوڑ مہ بیت، چین ترسگ ءَ انت انڈیا منی مکابلہ ءَ مہ اوشتیت، بلوچستان ءِ تہ ءَ بلوچ راجی جنز ءِ بگیری ءَ اِستان نیکراھی شدت پسندی ءَ دَم (آکسیجن) دیگ ءَ انت، گوستگیں لهتیں وهداں مکران ءَ یکشل ءَ جنکانی دربرجاھانی سوچگ، راجکاری ءِ پڑ ءَ ناشرکاریں ٹولیانی دیم ءَ آرگ، نودربر ابدلرؤپ ءِ توہین ءِ مذهب ءِ نام ءَ کُشگ، اے درستیں گامگیج بلوچ ورناهانی دیمروی دوستیں پِگر ءِ دارگ ءِ واست ءَ یک سرشونی یے کہ بلوچ چاگرد ءِ ربیدگ ، زبان، ربیّت ءُ دیمروی لوٹوکیں سِنچ ءَ ژانگول کنگ ءِ یک بے سوبیں پندلے ٹاهینگ بوگ ءَ انت۔ گل ءِ سرهال ءِ سر ءَ سنگتاں تْران کنان ءَ گْوشت کہ گل چاگردی جْیڑهانی توجیل کنگ ءِ واست ءَ سِرین ءِ هَڈ ءِ ارزشت ءَ دار ایت، گل راجمانی جیڑهاں یکجاه کنت آیاں راجکاری دروشم دات کت کنت۔ ایردستیں راجانی اگبالانی پچ گرگ ءِ واست ءَ راجی گلانی بوگ سک باز هژدری انت، ایردستیں راجانی وانگجاھانی تہ ءَ ورنایانی تاگت نودربر گل اَنت کہ آیانی اگبالانی واست ءَ جھد کن اَنت ءُ آیانی سر ءَ بوؤکیں زوراکیانی بگیری ءَ توار چست کن اَنت۔ یک راجدوستیں گلے ءِ تلو ءِ سر ءَ ورنایانی المی ءُ زانشتی ردوم گیش بیت، آ وت ءَ را زانت، وتی اگبال ءُ راجی جْیڑھاں سرپد بیت ءُ اگبالانی پچگرگ ءِ ھاتر ءَ جھد کنت، نودربر گل ھما درسگاہ اَنت کہ آ زانت ءُ سرپدی کہ ورنایاناں چہ نودربر گلانی وانگی گردانکاں رس اِیت آ سرپدی چہ سرکاری وانگجاھاں کدی ھم رس اِت کرت نہ کنت۔ پرچے کہ ایردستیں راجانی وانگجاھاں وانگ ءِ کورس ءَ ھما ھساب ءَ ٹاھین اَنت کہ نودربرانی جْیڑگ ءِ بود نِزور بیت، آ کدی ھم وتی سر ءَ بوؤکیں نا انساپیاں سرپد نہ بیت۔

آیوکیں گامگیج سرھال ءِ سر ءَ باسکانی داتگیں سر ءُ سوجانی سر ءَ جُتائیں پیسلہ زورگ بوت۔ گْوستگیں ھنکینی جوڑشت ھلاس کنگ بوت، چہ گچین کاری ءِ وسیلگ ءَ نوکیں ھنکینی جوڑشت اڑ کنگ بوت۔ ھنکینی کارمستر فیصل بلوچ، کمک کارمستر ظاہر لعل، کارگشاد عمر جان بلوچ ، کمک کارگشاد بانک مُسکان بلوچ ، شنگکار شیردل بلوچ گچین کنگ بوت اَنت۔
دیوان ءِ گُڈ سر ءَ بنجاھی کماش ڈاکٹر شکیل بلوچ ءَ نوک گچیں بوتگیں ھنکینی جوڑشت ءِ سنگتاناں گل ءِ سوگند دات ءُ سنگتاں اھد کرت کہ ما گل ءِ کارانی ءُ راج ءِ دیمروی ءِ ھاتر ءَ وتی جھد ءَ برجم دار اَیں۔