شھمیریں کندیل واجہ سباء دشتیاری ءُ بلوچ راجکاریں رھشون شھمیریں یوسپ ازیز مگسی ءَ را سِتک شانی ءُ سُھریں دروت نَدر کن اَیں۔

بلوچ اسٹوڈنٹس فرنٹ

بلوچ اسٹوڈنٹس فرنٹ ءِ جارکش ءَ وتی شنگ کُرتگیں درشان ءِ تہ ءَ بلوچ راج ءِ رژنائیں چراگ شَھمیریں کندیل پروپیسر سباء دشیاری ءُ بلوچ راج ءِ بُنشتی راجکاریں سروک واجہ یوسپ ازیز مگسی ءَ را آیانی شھمیری ءِ روچ ءِ درگت ءَ سُھرچکیں دروت ندر کنان ءَ گْوشت کہ سباء دشتیاری بلوچ راجی کواسانی ھما لَڑ ءَ ھوار اِنت کہ آئی ءَ وتی زند ءِ درستیں آسراتی پہ بلوچ راج ءِ باندات ءَ ندر کُتگ اَنت، واجہ ءَ کسانیں وھد ءِ تہ ءَ بلوچ راج ءُ ورنایانی دلانی تہ ءَ جاہ کتگ۔ لبزانکی پڑ ءَ چہ ابید سیاسی پڑ ءَ بلوچ ورنایانی رھشونی ءَ بلاھیں کردے پیلو کُتگ۔ ھمے چیز ءَ چہ دژمن ءَ را بے کساس تُرس بوتگ سباء ءِ باندات ءِ زندگ بوگ پہ آئی ءَ وبا ءِ جانے بیت، گُڑا دژمن ءَ 1 جون 2011 ءَ ماں شال ءِ سریاب دگ ءَ واجہ ءَ سَر اُرش کنت ءُ شھید کنت، واجہ ءِ لیکہ ءُ پنت ءُ سوج تاں مرچی بلوچ راج ءِ رھشونی ءَ کنگ ءَ اَنت، شھمیریں سبا ءِ پِھر ءُ لیکہ انگت راج ءِ ھوناں ھوار اِنت ءُ گام پہ گام ورنایاناں جُنزگ ءِ ھوسلہ ءُ تاگت ءَ دنت۔

جارکَش ءَ دیمتر ءَ تران کناں ءَ گْوشت بلوچ راجی سروک یوسپ ازیز مگسی ھما بلوچ راجکاری رھشون بوتگ کہ آئی ءَ ترامگیجی بنیادت (ادارہ جاتی) ءَ بلوچ ءِ راجکاری ءِ بنھِشت ایر کتگ۔ واجہ نوکیں اھد ءِ بلوچ راجدوستی ءِ بانی ءِ نام ءَ ھم زانگ بیت۔

برتانیہ ءِ سامراجی لشکر ءُ سرداری ربیت ءِ بگیری ءَ واجہ یوسپ ازیر مگسی ءَ ھالتاک ءُ پنتاک ءِ وسیلہ ءَ بلوچ راج ءِ تہ ءَ سرپدی ودی کرتگ۔ الم ءُ زانت ءِ پڑ ءَ آئی ءِ مُدامی جُھد بوتگ کہ بلوچ ورنا بہ وان اَنت ءُ باسماھیں دابے ءَ راجی دیمروئی ءُ برتانوی سامراجی لشکر ءِ بگیری ءَ جھد بہ کن اَنت ءُ وتی سرڈگار ءَ را چہ زوراک ءِ دستاں آجو بہ کن اَنت۔ بَلے بلوچ راج ءِ بد بھتی بیت کہ 31 جُلکان (مئی) 1935 ءَ شال ءِ زمین جُمب ءَ آئی ءَ را چہ راج ءَ گِستہ کرت۔ یوسپ ازیز مگسی ءِ پِگر ءُ شھزانتی بلوچ ورنایانی یک رژنائیں کشکے ءِ بسِتار ءَ اِنت کہ آ کِشک ءِ رھادگی ءَ بلوچ راجی پجّار ءُ بلوچ راج ءِ رژنائیں باندات گِندگ بیت۔ اِے زوراک ءِ وتگڑی ءُ بے سماھی اَت کہ آئی ءَ اِے جْیڑ اِت کہ بلوچ راجی رھشوناں گِستہ کن اِیں بِہ گند ئے آیانی پِگر ءُ شھزانتی اوشت ءِ آماچ بیت، بلے آئی ءَ اِے نہ جْیڑ اِت کہ شمھیر کدی نہ مِر اَنت آ انگت زِندگ اَنت۔

جارکش ءَ وتی درشان ءِ گُڑ سر ءَ بلوچ راج دویں بامردیں شھمیرانان سِتک شانی ندر کرت ءُ گْوشت کہ شھمیریں استاد واجہ سبا دَشْتیاری بلوچ ءُ واجہ یوسب ازیر مگسی ءَ را آیانی بے بھائیں دیمونیانی سوَب ءَ سُھر چکیں دروت ندر کن اَیں ءُ آیانی پِگر ءُ شھزانتی ءَ را برجاہ دارگ ءِ ھاتر ءَ وتی جُھد ءِ درچ یکشلا برجاہ دار اَیں۔