افغان وزیر خارجہ بگرام تو کیا، افغانستان کی ایک انچ زمین بھی امریکہ کو نہیں دی جائے گی

افغان وزیر خارجہ بگرام تو کیا، افغانستان کی ایک انچ زمین بھی امریکہ کو نہیں دی جائے گی

کابل: افغان وزیر خارجہ امیر خان متقی نے امریکی صدر کے حالیہ بیانات پر ردعمل دیتے ہوئے کہا ہے کہ اگر امریکہ ہمارے ساتھ تعلقات قائم کرنے یا امارت اسلامیہ کو تسلیم کرنے کے بدلے بگرام کا مطالبہ کرے تو یہ کسی صورت ممکن نہیں۔ انہوں نے واضح کیا کہ "وہ چاہے پورے افغانستان کو دوبارہ تعمیر کرے، تب بھی بگرام کیا ایک انچ زمین بھی کسی کو نہیں دی جائے گی۔”

امیر خان متقی نے کہا کہ امارت اسلامیہ اسلامی اصولوں اور معیشت پر مبنی متوازن خارجہ پالیسی کے تحت دنیا کے تمام ممالک کے ساتھ ایسے تعمیری تعلقات قائم کرنا چاہتی ہے جو باہمی احترام اور مشترکہ مفادات پر استوار ہوں۔

انہوں نے یاد دہانی کرائی کہ دوحہ معاہدے کے تحت امریکہ نے اس بات کا عہد کیا تھا کہ وہ افغانستان کی آزادی، خودمختاری اور ارضی سالمیت کے خلاف نہ طاقت استعمال کرے گا اور نہ ہی افغانستان کے داخلی معاملات میں مداخلت کرے گا۔ افغان وزیر خارجہ کے مطابق امریکہ کو ان وعدوں کی پاسداری کرنا ہوگی۔

امارت اسلامیہ نے زور دیا ہے کہ امریکہ ماضی کی ناکام پالیسیوں کو دہرانے کے بجائے حقیقت پسندی، دانشمندی اور عقلانیت پر مبنی رویہ اختیار کرے تاکہ خطے اور دنیا میں پائیدار امن و استحکام قائم ہو۔