بی وائی سی رہنماؤں کو چھٹی بار 15 روزہ ریمانڈ پر جیل بھیج دیا گیا

بی وائی سی رہنماؤں کو چھٹی بار 15 روزہ ریمانڈ پر جیل بھیج دیا گیا

کوئٹہ: عدالت نے بلوچ یکجہتی کمیٹی (بی وائی سی) کی رہنما ڈاکٹر ماہ رنگ بلوچ اور ان کے ساتھیوں کو چھٹی بار مزید 15 روز کے ریمانڈ پر جیل بھیج دیا۔ ذرائع کے مطابق یہ مسلسل چھٹا موقع ہے کہ انہیں ریمانڈ پر بھیجا گیا ہے، تاہم پچھلے پانچ ریمانڈز کے دوران نہ تو کوئی تفتیش مکمل ہوسکی اور نہ ہی الزامات ثابت ہو سکے۔

ڈاکٹر ماہ رنگ بلوچ کو 22 مارچ کو بلوچستان یونیورسٹی کے باہر جبری گمشدگیوں کے خلاف دھرنے کے دوران گرفتار کیا گیا تھا۔ گرفتاری کے بعد ان کے خلاف امن عامہ کے تحفظ کے آرڈیننس (ایم پی او) کے تحت مقدمات درج کیے گئے۔ پولیس کا مؤقف ہے کہ مظاہروں کے دوران ہسپتال میں توڑ پھوڑ کی گئی اور کچھ افراد پر تشدد ہوا، تاہم تاحال اس حوالے سے کوئی ثبوت عدالت میں پیش نہیں کیے گئے۔

بین الاقوامی انسانی حقوق کی تنظیمیں، جن میں فرنٹ لائن ڈیفنڈرز اور ایمنسٹی انٹرنیشنل شامل ہیں، ڈاکٹر ماہ رنگ بلوچ کی فوری اور غیر مشروط رہائی کا مطالبہ کر رہی ہیں۔ ان تنظیموں کا کہنا ہے کہ انسانی حقوق کے کارکنان کے خلاف یہ مقدمات سیاسی نوعیت کے اور غیر منصفانہ ہیں۔

آج کی پیشی میں عدالت نے ایک بار پھر ڈاکٹر ماہ رنگ بلوچ اور ساتھیوں کا ریمانڈ بڑھاتے ہوئے انہیں مزید 15 دن کے لیے جیل بھیجنے کا حکم دیا۔