‏شہیدانِ حق — انقلابی ماتم ۔تحریر ہیروف بلوچ 

‏شہیدانِ حق — انقلابی ماتم

"تحریر ہیروف بلوچ”

یہ کیسا دستور ہے،

کہ جو لب "سچ” کی صدا بلند کریں،

انہی لبوں کو گولیوں سے سی دیا جاتا ہے؟

یہ کیسی زمین ہے،

جہاں جو بیج انصاف کا بوئے،

اسی کو مٹی میں دفنا دیا جاتا ہے؟

لیکن یاد رکھو!

قتل کر کے چراغ بجھایا نہیں جا سکتا،

لہو سے جلنے والی شمعیں کبھی مدھم نہیں ہوتیں،

بلکہ وہ اور بھڑکتی ہیں،

اور ہر قطرہِ خون ایک انقلاب کی ندی بن کر بہتا ہے۔

تم نے سمجھا کہ ایک لاش سے کہانی ختم ہو گئی،

لیکن تم نہیں جانتے—

لاشیں نہیں گرتیں، پرچم بنتی ہیں۔

خون بہتا نہیں، تاریخ کے صفحات پر انقلابی تحریر بن جاتا ہے۔

وہ جو سچ کے قافلے میں گرے،

وہ آج بھی ہمارے دلوں میں زندہ ہیں۔

ان کی چیخیں ہماری آواز ہیں،

ان کا خواب ہمارا فرض ہے۔

یاد رکھو!

ظلم کی عمر چند دنوں کی ہے،

مگر سچائی کا سورج صدیوں تک جلتا ہے۔

تم ایک آواز کو خاموش کر سکتے ہو،

لیکن صداؤں کے طوفان کو کیسے روکو گے؟

"جو سچ کے لیے مر گئے، وہ زندہ ہیں —

جو ظلم کے ساتھ جی رہے ہیں، وہ مرے ہوئے ہیں۔”