فینن کے ڈسپنسری میں تشدد ایک زہر بھی ہے اور مرہم بھی۔ (اکلیس میمبے)

تحریر : شہیک بلوچ

فینن نے جہاں نوآبادیاتی نظام کے نبض پر ہاتھ رکھا وہی نوآبادیاتی نظام کے خلیوں میں رواں استحصالی خون کے کلیات کی تفصیل بھی بیان کی، جو خون نوآبادکار کو آکسیجن و نشوونما فراہم کرتا ہے وہ خون دراصل دیسی کا کشید کردہ ہے۔ نوآبادکار دیسی کو ایک بے روح مجسم کی صورت میں گلزمین سے، نیشنلزم سے کاٹ کر اپنی کاری گری اس کے جسم میں پیوست کرتا ہے اور یہ سب وہ تشدد کے ذریعے کرتا ہے جس کا اظہار میمبے جیسا دانشور فینن کی تعلیمات سے زہر کے طور پر مستعار لیتا ہے یعنی یہ زہر ہے جو شناخت سے بیگانگی کا شکار بنانے کی ایک کوشش ہے۔ وہی جب یہ تشدد شناخت سے جڑ کر دیسی کے ہاتھوں تاریخ مجسم کی حیٹیت اختیار کر جاتا ہے تو یہ ایک مرہم ہے۔
فینن نے دنیا کو دو حصوں میں تقسیم کیا، دیسی کی دنیا اور نوآبادکار کی دنیا۔ مرہم دیسی کے پاس ہے لیکن دیسی جب اپنے تاریخ مجسم کردار سے آشنا ہو تو وہ مرہم ان رستے ہوئے زخموں پر رکھتا ہے جو اس کے شناخت پر نوآبادکار کی کاری ضرب سے لگے ہیں۔ میمبے جیسے دانشور جو نوآبادکار کے موت کے کھیل کو عیاں کرتے ہیں، جو یہ واضح کرتے ہیں کہ دیسی کو نوآبادکار ایک بے روح جسم میں تبدیل کرکے اس میں اپنی کاری گر روح ڈالنا چاہتا ہے اور وہ روح محض نوآبادکار کے بجا آوری کے علاوہ کوئی کردار نبھا نہ سکے۔
اسی لیے فینن جب Aparthied پر لکھتا ہے تو وہ کہتا کہ "جسے سیاہ آدمی کی روح کہا جاتا ہے وہ دراصل سفید آدمی کی کاری گری ہے۔”
نوآبادکار مذہب، نسل، رنگ مختلف صورتوں میں اپنا وار کرتا ہے جبکہ اس کا مقصد نوآبادیاتی زہر ہی رہتا ہے۔
دیسی کی بیگانگی کی مختلف سطحیں نظر آتی ہیں، پہلی بیگانگی جہاں اسے اپنے شناخت سے دور رکھنے کی کوشش کی جاتی ہے، اسے وہ شناخت اپنانے کی تعلیم۔دی جاتی ہے جو نوآبادکار کا زہر ہے۔ اسے یقین دلانے کے لیے نوآبادکار اس زہر کو شوگر کوٹڈ بناتا ہے۔
دیسی خود کو دیسی نہ سمجھے بلکہ نوآبادکار کا کل پرزا سمجھے، اس خصی پن پر نوآبادکار مذہب سے لے کر ہر طرح کا سہارا لیتا ہے۔ اسی لیے تو فینن کہتا ہے کہ "دیسی اپنے بارے میں بدترین سوچتے ہیں۔” یہ بدتر سوچ اسی زہر کا نتیجہ ہے۔ یہی سوچ دیسی کو تاریخ مجسم کی حیٹیت اختیار کرنے اور نوآبادکار کے زہر کے اثرات کو زائل کرنے میں الجھنوں کا شکار بناتی ہے۔ دیسی کے شعور و خود آگاہی نوآبادکار کے اس زہر کا اینٹی ڈاٹ ہے، اب دیسی اپنے بارے میں وہ زہر نہیں سوچتا جو نوآبادکار نے اس کے روح میں انجیکٹ کرمے کی کوشش کی ہے، وہ نیشنلزم کو لے کر اپنی شناخت سے جڑتے ہوئے تاریخ مجسم کی حیٹیت اختیار کرتا ہے اور مرہم بن جاتا ہے اب تشدد اس کے لیے نہ صرف نجات کا راستہ بن جاتا ہے بلکہ اتحاد کے ذریعے وہ نوآبادکار کی کاری گری پر گہرا وار کرتا ہے، جب نوآبادکار کی عینک اتارتا ہے تو دوسرا دیسی جسے وہ شک کی نگاہ سے دیکھ رہا تھا اس میں اسے اپنا بھائی نظر آتا ہے اور وہ اس کے ساتھ مل کر اتحاد کرتے ہوئے بیگانگی کے تصور کو مزاحمت کی ہوا میں تحلیل کردیتا ہے۔ دیسی نہ صرف اپنے شناخت سے جڑتا ہے بلکہ محفل شریک جرگے میں دیگر محکوموں سے سے بھی اس کا ایک رابطہ بن جاتا ہے۔
نوآبادیاتی نظام کے تناظر میں فینن کے ڈسپنسری کو لے کر میمبے کے موت کی سیاست کو عیاں کرنے پر اگر بلوچ گلزمین کا جائزہ لیا جائے تو پچھتر سالوں میں بلوچ کو اس کے شناخت سے توڑنے کی نوآبادکار کی ناکام کوششوں کا ایک طویل زہریلا سلسلہ نظر آتا ہے، مذہبی سطح سے لے کر زبان و ثقافت کو مسخ کرنے تک نوآبادکار کا گھٹیا کردار بلوچ قوم کو غلامی کے دلدل میں دھکیلتا نظر آتا ہے، وہی مرہم کی صورت میں یوسف عزیز مگسی سے لے کر بابا مری جیسے کردار جو بلوچ کو تاریخ مجسم کی حیٹیت دے کر فینن کے تشدد کو بلوچ قوم کے شناخت سے جوڑ کر مرہم بناتے ہیں، اور آج بلوچ تحریک ایک مستحکم صورت میں سامنے آتے ہوئے نوآبادکار کی کاری گری پر گہری ضرب بن چکی ہے۔ جہاں بالاچ و اسلمی گرج کیساتھ دشمن پر حاوی ہوچکے ہیں وہی اتحاد کی مزید ضرورت بلوچ کو منزل مقصود سے مزید قریب کردیگی۔ بلوچ گلزمین کے جہدکاروں کی یہ بات بھی خوش آئند ہے جہاں وہ نوآبادکار کے زیر اثر دیسیوں کے لیے دروازہ کھلا رکھنے کا اعلان کرچکے ہیں۔ یہ بیگانگی کے زہر کے اثر کو زائل کرنے کی ایک بہترین اینٹی ڈاٹ ہے اور اس کے اثرات دور رس مرہم ہونگے۔
دیسی کو اتحاد کرنا ہوگا چاہے وہ کسی بھی صورت میں ہو وہ دیسی ہی ہے، اور یہی اس کی کامیابی ہے کہ وہ دیسی ہے بشرطیکہ وہ نوآبادکار کے زہر کا نشانہ بننے کی بجائے تاریخ مجسم کی حیٹیت سے اپنے مرہم کا کردار ادا کرے اور اس کے لیے اپنے شناخت سے جڑ کر صرف اور صرف نیشنلزم کی بنیاد پر اتحاد لازمی شرط ہے۔