نوا اغوا ہونے والی کمسن لڑکی تاحال بازیاب نہ ہو سکی، پولیس پر جانبداری اور رشوت لینے کے الزامات

نوا اغوا ہونے والی کمسن لڑکی تاحال بازیاب نہ ہو سکی، پولیس پر جانبداری اور رشوت لینے کے الزامات

خضدار: نوا سے مبینہ طور پر اغوا کی جانے والی 15 سالہ مری قبیلے سے تعلق رکھنے والی لڑکی کو اغوا ہوئے بیس روز گزر چکے ہیں، لیکن تاحال پولیس مغویہ کو بازیاب کرانے میں مکمل طور پر ناکام رہی ہے۔متاثرہ خاندان نے مری اتحاد کے صدر کے ہمراہ پریس کانفرنس کرتے ہوئے پولیس پر شدید الزامات عائد کیے۔ مغویہ کی والدہ اور بھائی نے میڈیا سے گفتگو کرتے ہوئے بتایا کہ اغوا کے باوجود متعلقہ تھانے میں درج ایف آئی آر میں نامزد چاروں ملزمان تاحال آزاد گھوم رہے ہیں، جبکہ پولیس ان کی گرفتاری کے لیے کوئی سنجیدہ کوشش نہیں کر رہی۔

ذرائع کے مطابق، واقعے میں پولیس کی مبینہ جانبداری اور دونوں فریقین سے رشوت لینے کے شواہد بھی سامنے آئے ہیں۔ متاثرہ خاندان نے الزام لگایا کہ ملزمان شہر میں کھلے عام گھوم رہے ہیں، لیکن قانون نافذ کرنے والے ادارے خاموش تماشائی بنے ہوئے ہیں۔مری اتحاد کے صدر نے اس موقع پر مطالبہ کیا کہ اگر پولیس فوری کارروائی میں ناکام رہتی ہے تو اعلیٰ سطح پر انکوائری کا آغاز کیا جائے اور ایس ایچ او سمیت ذمہ دار اہلکاروں کو معطل کر کے شفاف تحقیقات کی جائیں ۔انہوں نے وزیراعلیٰ بلوچستان، آئی جی پولیس اور دیگر اعلیٰ حکام سے فوری نوٹس لینے اور مغویہ کی بحفاظت بازیابی کے لیے مؤثر اقدامات اٹھانے کا مطالبہ کیا ہے