”ہم بے بس ہیں مگر خاموش نہیں“ — ملیر کے خاندان کی میڈیا کے ذریعے فریاد

معزز صحافی حضرات، السلام علیکم

ہم ملیر کراچی کے رہائشی ہیں اور آج آپ کے سامنے انصاف کی پکار لے کر آئے ہیں۔ یہ ہمارے لیے انتہائی افسوس اور دکھ کی بات ہے کہ ہم ایک ایسے ملک میں رہ رہے ہیں جسے جمہوری کہا جاتا ہے، مگر جہاں حکومت، عدلیہ اور میڈیا سب اپنے اصل کردار سے غافل ہیں۔ ایسا نظام قائم کیا گیا ہے جس میں عام شہریوں سے جینے کا بنیادی حق بھی چھین لیا گیا ہے۔

آج علی الصبح تقریباً 5 بج کر 30 منٹ پر سی ٹی ڈی، پولیس اور سول کپڑوں میں ملبوس افراد ڈاکوؤں کی طرح ہمارے گھر پر ٹوٹ پڑے۔ دروازے توڑ کر اندر داخل ہوئے، بزرگوں اور بچوں کو تشدد کا نشانہ بنایا، اور ہمارے بیٹے صادق کو زبردستی اپنے ساتھ لے گئے۔ ہمارا دکھ یہ ہے کہ ہم انہیں روک نہ پائے، کیونکہ ہمارے ہاتھ خالی تھے جبکہ ان کے ہاتھوں میں بندوقیں تھیں۔

ہم اس وقت اتنے بے بس ہو چکے ہیں کہ جانوروں کی مثال بھی ہمارے حق میں نہیں آتی۔ ایک باز جب مرغی کے بچوں پر جھپٹتا ہے تو مرغی اپنے پنجوں سے مزاحمت کرتی ہے، مگر ہم اس حالت میں بھی نہیں رہے کیونکہ ننگے ہاتھ بندوق کے سامنے کچھ نہیں کر سکتے۔

ریاست آج ڈاکوؤں اور بدمعاشوں کے ہاتھوں عوام کے گھروں کو اجاڑ رہی ہے۔ ہمیں سمجھ نہیں آ رہا کہ کہاں جائیں؟ کس سے بات کریں؟ اور کون ہے جو ہمارے بیٹے کو واپس دلائے؟ ریاست ہمیں کیوں اس قدر بے بس کر رہی ہے؟ کیا عوام کو اپنی حفاظت کے لیے بندوق اٹھانی پڑے گی؟ کیونکہ عدلیہ سے امیدیں دم توڑ رہی ہیں اور وہی ادارے جو ہماری حفاظت کے نام پر وجود رکھتے ہیں، وہی ہمیں اجاڑنے میں مصروف ہیں۔

اس بے بسی اور کرب کے عالم میں ہم میڈیا کے ذریعے اپنی فریاد اہلِ شعور تک پہنچا رہے ہیں۔ ہم اپنے بیٹے کی سلامتی چاہتے ہیں۔ حکام کے لیے شاید وہ ایک مشتبہ شخص ہو، مگر ہمارے لیے وہ ہمارے گھر کا چراغ ہے۔ ہم یقین رکھتے ہیں کہ اس پر کوئی جرم ثابت نہیں ہوگا۔ ہماری حکام سے مؤدبانہ درخواست ہے کہ ہمارے بیٹے صادق کو فی الفور باحفاظت رہا کیا جائے۔

ساتھ ہی ہم عوام الناس سے اپیل کرتے ہیں کہ وہ انصاف کے حصول میں ہمارا ساتھ دیں۔

شکریہ۔