اسلام آباد بی وائی سی رہنماؤں اور لاپتہ افراد کے اہل خانہ کا احتجاج 63ویں روز بھی جاری

اسلام آباد بی وائی سی رہنماؤں اور لاپتہ افراد کے اہل خانہ کا احتجاج 63ویں روز بھی جاری

اسلام آباد: بلوچ یکجہتی کمیٹی کے رہنماؤں اور جبری طور پر لاپتہ افراد کے اہل خانہ کا احتجاج اسلام آباد نیشنل پریس کلب کے سامنے 63ویں روز بھی جاری ہے ۔ مظاہرین نے کہا کہ وہ اپنے پیاروں کی بازیابی تک کسی بھی دباؤ کے باوجود دھرنا ختم نہیں کریں گے۔

احتجاج میں شریک خواتین، بزرگ اور بچے لاپتہ افراد کی تصاویر اٹھائے نعرے لگاتے رہے۔ ان کا کہنا تھا کہ کئی ماہ اور سال گزرنے کے باوجود ان کے پیارے گھروں کو واپس نہیں آئے، جس سے خاندان شدید ذہنی و معاشی اذیت کا شکار ہیں۔

بی وائی سی رہنماؤں نے الزام عائد کیا کہ ریاستی ادارے اس مسئلے پر جواب دہ نہیں، جبکہ حکومت کے وعدے اب تک محض بیانات تک محدود ہیں۔ رہنماؤں نے واضح کیا کہ جبری گمشدگیاں آئین اور قانون کی کھلی خلاف ورزی ہیں اور یہ طرزِ عمل شہری آزادیوں اور بنیادی انسانی اقدار کے منافی ہے۔

انہوں نے مطالبہ کیا کہ تمام لاپتہ افراد کو فوری طور پر عدالتوں میں پیش کیا جائے اور جبری گمشدگیوں کے خلاف ٹھوس اقدامات اٹھائے جائیں۔

انسانی حقوق کے علمبرداروں نے بھی اس احتجاج کی حمایت کرتے ہوئے کہا ہے کہ جبری گمشدگیاں ایک سنگین انسانی بحران میں تبدیل ہو چکی ہیں، اور عالمی برادری کو اس مسئلے پر آواز بلند کرنی چاہیے۔