اسلام آباد میں دھرنا مظاہرین کو سخت ریاستی ہراسانی اور جبر کا سامنا – نادیہ بلوچ

نادیہ بلوچ، بلوچ یکجہتی کمیٹی کے اسیر سربراہ ڈاکٹر ماہ رنگ بلوچ کی بہن، نے ایکس (سوشل میڈیا) پر اپنے ایک بیان میں کہا ہے کہ اسلام آباد جیسے شہر میں بغیر نمبر پلیٹ والی گاڑیاں مسلسل ہمیں فالو اور ہراساں کر رہی ہیں، جبکہ ریاستی ادارے اس معاملے میں مجرمانہ خاموشی اختیار کیے ہوئے ہیں۔ انہوں نے وضاحت کی کہ یہ بحث اب بے معنی ہو چکی ہے کہ یہ گاڑیاں کس کی ہیں، کیونکہ ہمیں علم ہے کہ یہ کون لوگ ہیں اور ان کا مقصد کیا ہے۔ اصل سوال یہ ہے کہ کیا اس ملک میں بلوچوں کے لیے کوئی قانون موجود ہے یا نہیں؟ کیا ہم دشمن ریاست کے شہری ہیں؟

نادیہ بلوچ نے بتایا کہ انہوں نے جو دوسرا گھر کرائے پر لیا تھا، اسے بھی آج اس کے مالک کو ریاستی دباؤ کے تحت مجبور کر کے ہمیں نکالنے پر مجبور کیا گیا ہے۔ اب ان کے خاندان کی ضعیفائیں، بہنیں، اور نوجوان بے گھر، بے سہارا، اور کھلے آسمان تلے بے پناہ مشکلات کا سامنا کر رہے ہیں، اور صرف اپنے لاپتہ پیاروں کی بازیابی کے لیے امید لیے ہوئے ہیں۔ ان کا کہنا تھا کہ ریاستی ہراسانی اور بے گھر کرنے کا عمل اس حد تک پہنچ چکا ہے کہ شاید دشمن ملک بھی اپنے قیدیوں کے ساتھ ایسا سلوک نہ کرے۔

نادیہ بلوچ نے مزید کہا کہ اگر ہمیں دارالحکومت میں کرائے کا گھر لینے کی اجازت نہیں دی جاتی، تو کم از کم ہمیں نیشنل پریس کلب کے سامنے خیمہ لگا کر پرامن احتجاج کرنے کی اجازت دی جائے۔ یا پھر ہمیں واضح طور پر بتایا جائے کہ اس ریاست میں بلوچوں کے لیے نہ زمین ہے، نہ آواز، اور نہ ہی سانس لینے کا حق۔ انہوں نے یہ بھی نشاندہی کی کہ ریاستی ظلم و ستم سے بلوچ عوام کا حوصلہ کم ہونے کے بجائے، وہ اپنی حق کی آواز بلند کرنے پر مصر ہیں۔

انہوں نے ایک حالیہ واقعہ کا ذکر کرتے ہوئے بتایا کہ چند گھنٹے قبل ایک پی ٹی آئی رہنما صرف کھانا دینے کے لیے آیا تھا، جس کے ڈرائیور اور گاڑی کو غائب کر دیا گیا۔ یہ عمل صرف ہراسانی نہیں بلکہ ایک ریاستی منصوبہ ہے تاکہ بلوچوں کو سبق سکھایا جائے۔ وہ کہتی ہیں کہ ایسے اقدامات بلوچ عوام کو دبا کر خاموش کرانے کی کوشش ہیں، مگر یہ سب ناکام ہوگا۔

نادیہ بلوچ نے یہ بھی واضح کیا کہ ریاست کو یاد رکھنا چاہیے کہ جو قومیں انصاف کی مانگ پر دھتکار دی جاتی ہیں، وہ ایک دن خاموش نہیں رہتیں، بلکہ چیختی بھی ہیں اور لڑتی بھی ہیں۔ انہوں نے خبردار کیا کہ بلوچوں کو دیوار سے لگانا بند کریں، کیونکہ اگر دیوار گر گئی، تو اس کے ملبے تلے ریاست خود دفن ہو سکتی ہے۔ ان کا کہنا تھا کہ یہ ظلم و ستم اب بند ہونا چاہیے اور بلوچ عوام کے حقوق کو تسلیم کیا جائے۔