انسانی حقوق کی سرگرم رہنمااور بلوچ یکجہتی کمیٹی کی سربراہ ڈاکٹرماہ رنگ بلوچ کےخلاف بدامنی پھیلانے کےالزام کا مقدمہ درج کرنے کی شدید مذمت کرتا ہوں۔ الطاف حسین

اس سے قبل ڈاکٹر ماہ رنگ بلوچ ‎کو کراچی ائیرپورٹ پربلاجواز روک کرنیویارک میں منعقدہ کانفرنس میں شرکت نہیں کرنے دی گئی،ان کا پاسپورٹ چھین لیا گیا اورپاسپورٹ چھیننے کی ایف آئی آر تک درج نہیں کی گئی اور اب انکے خلاف جھوٹا مقدمہ قائم کردیا گیا ہےجس کی جتنی مذمت کی جائے کم ہے۔

ڈاکٹرماہ رنگ بلوچ کے خلاف ایف آئی آر میں الزام عائد کیا گیا ہے کہ ماہ رنگ بلوچ اور ان کے ساتھی پڑھے لکھے مرد و خواتین کو ورغلاتے ہیں، انہیں نامعلوم مقامات پر پناہ دینے کے بعد سکیورٹی اداروں پر الزامات لگاتے ہیں اور انصاف کے ایوانوں میں ان اداروں کو نیچا دکھانے کی ناکام کوشش کرتے ہیں۔

متحدہ قومی موومنٹ کے سبراہ نے مزید کہا ہے کہ ڈاکٹرماہ رنگ بلوچ پر عائد کردہ ان بھونڈے الزامات کو مسترد کرتا ہوں اور انہیں قطعی جھوٹ اور گمراہ کن قرار دیتا ہوں،اس قسم کے بھونڈے اور جھوٹے الزامات سے حقوق کی جدوجہد کرنے والوں کو نہ تو خوف زدہ کیاجاسکتا ہے اور نہ ہی انہیں مظلوموں کے حقوق کی جدوجہد سے باز رکھا جاسکتا ہے۔

پیپلزپارٹی اقتدار کی ہوس اور فوجی اسٹیبلشمنٹ کی کاسہ لیسی میں اخلاقی دیوالیہ پن کامظاہرہ کررہی ہے اور ایک نہتی لڑکی سے خوف زدہ ہے اسی لئے اوچھے ہتھکنڈوں پر اُتر آئی ہے۔

وفاقی وصوبائی حکومتیں ،مظلوم بلوچوں ،پشتونوں ،مہاجروں اور دیگر مظلوموں کے زخموں پر مرہم رکھنے کے بجائے نمک پاشی کرتی رہیں گی اور معاملات کو فہم وفراست اور دانشمندی سے حل کرنے کے بجائے ان کی آواز کو ریاستی طاقت سے دباتی رہیں گی تو یہ عمل مظلوم عوام میں مزید نفرتیں پیدا کرنے کاسبب بنے گاجس کانتیجہ ریاست کوبھگتنا پڑے گا۔

میں ارباب اختیار سےمطالبہ کرتا ہوں کہ عقل کے ناخن لیے جائیں اور مظلوم بلوچوں، پشتونوں، سندھیوں، مہاجروں اور دیگر مظلوموں کی داد رسی کی جائے،ان سے مذاکرات کیے جائیں، تمام لاپتہ افراد کو بازیاب کیاجائے اور مظلوموں کے حقوق کیلئے جدوجہدکرنے والوں پر ریاستی مظالم کاسلسلہ بند کیاجائے۔ میں یہ بھی مطالبہ کرتا ہوں کہ ڈاکٹرماہ رنگ بلوچ پر قائم مقدمہ فی الفورواپس لیاجائے اوران کا پاسپورٹ واپس کیاجائے۔