اہل پنجاب خدارا بلوچستان کے کرب کومحسوس کریں، وفود بناکر بلوچستان جائیں، بلوچوں کے آنسو پونچھیں۔ الطاف حسین

اہل پنجاب خدارا بلوچستان کے کرب کومحسوس کریں، وفود بناکر بلوچستان جائیں، بلوچوں کے آنسو پونچھیں۔ الطاف حسین

اہل پنجاب وہ طرزِ عمل اختیار نہ کریں جوانہوں نے 1971ء میں سانحہ مشرقی پاکستان کے وقت اپنایا تھا

جس طرح ایک خاندان کے افراد ایک دوسرے کےلئے فکرمند ہوتے ہیں اسی طرح ملک بھی ایک خاندان کی مانند ہوتا ہے جس میں آباد اکائیاں خاندان کے فردکی طرح ایک دوسرے کےدرد اورتکلیف کااحساس کرتے ہیں او راس کے غم میں شریک ہوتے ہیں اور اگر ملک کے کسی صوبے یا کسی صوبے کے کسی شہرمیں کوئی قدرتی آفت یاسانحہ پیش آجائے تو ملک کےدوسرے صوبےکے شہری اس مصیبت میں متاثرہ صوبے یاشہر کے عوام کی مدد کرتے ہیں۔
پاکستان کے تمام صوبے اور اکائیاں بھی ایک خاندان کی طرح وفاق پاکستان کے خاندان کاحصہ ہیں جن کی مدد کرنا، ان کے دکھوں کااحساس کرناوفاق کی تمام اکائیوں کافرض ہے۔آج جغرافیائی لحاظ سے پاکستان کے سب سے بڑے صوبے بلوچستان میں ایک آگ لگی ہوئی ہے،وہاں کے لوگ ریاستی مظالم کے خلاف سراپااحتجاج ہیں، بلوچستان کے ضلع مستونگ کے علاقے لکپاس میں بلوچستان نیشنل پارٹی نے بلوچ خواتین کی گرفتاریوں اورلاپتہ بلوچوں کی بازیابی کےلئے دھرنا دیا ہوا ہے لیکن ان کے مطالبات پر توجہ دینے کے بجائے حکومت نے لانگ مارچ کوکوئٹہ کی طرف جانے سے روکنے کےلئے سڑک میں خندقیں کھود دی ہیں، یہ ایک قابل مذمت اقدام ہے۔ دوسری طرف تمام الیکٹرانک اور پرنٹ میڈیاپر بلوچستان نیشنل پارٹی کے لانگ مارچ اوردھرنے کی کوریج پرپابندی لگادی گئی ہے تاکہ ان کی آواز دوسرے صوبوں تک نہ پہنچے۔
میں آج پنجاب کے سیاسی ومذہبی رہنماؤں، صحافیوں، تجزیہ نگاروں، شاعروں، ادیبوں، دانشوروں، قلم کاروں اورتمام شعبہ ہائے زندگی سے تعلق رکھنے والے پنجاب کے عوام سے سوال کرتاہوں کہ بلوچوں کی فریادوں کو سننے، ان سے ہمدردی اوریکجہتی کااظہار کرنے اوران کے زخموں پرمرہم رکھنے کےلئے پنجاب سے کتنے وفود بلوچستان گئے؟ بلوچستان کے عوام نے دوسری قوموں اور دیگر وفاقی اکائیوں کےلئے ہمیشہ نیک جذبات کااظہارکیا، وہ دوسرے صوبوں کے لئے نکلے، تحریک انصاف نے احتجاج کا اعلان کیاتوبلوچستان میں بھی مظاہرے ہوئے، وہاں کے عوام پر گولیاں چلائی گئیں،آج بلوچستان میں قیامت ڈھائی جارہی ہے، وہ سراپا احتجاج ہیں، آج ان کےلئے پنجاب کیوں نہیں نکل رہاہے؟ کیا اہل ِ پنجاب کایہ طرز عمل ٹھیک ہے؟
میں پورے ملک خصوصاًاہل پنجاب سے دردمندی کے ساتھ اپیل کرتاہوں کہ وہ خدارا بلوچستان کےکرب کومحسوس کریں، وفود بناکربلوچستان جائیں، بلوچوں کے آنسو پونچھیں اوراپنے عمل سے بلوچ عوام کو بتائیں کہ وہ اکیلے نہیں ہیں بلکہ ریاست پاکستان کے خاندان کاحصہ ہیں۔
اہل پنجاب کوخیبرپختونخوا کے ان خاندانوں کے کرب کوبھی محسوس کریں جن کے بچوں کوگزشتہ دنوں ڈرون حملوں میں ماراگیا۔اہل پنجاب وہ طرزِ عمل اختیار نہ کریں جوانہوں نے 1971ء میں سانحہ مشرقی پاکستان کے وقت اپنایا تھا۔
پنجاب سے تعلق رکھنے والے صحافیوں، تجزیہ نگاروں اوراینکرزسے بھی کہتاہوں کہ وہ بلوچستان میں ڈھائے جانے والے مظالم کوبیان کریں اوران پر صدائے احتجاج بلند کریں خواہ ان کی نوکری ہی کیوں نہ ختم ہوجائے، ملک کوبچانے کے لئے یہ بہت ہی معمولی قیمت ہے۔
میں پنجاب کے طلبہ وطالبات سے بھی کہتاہوں کہ وہ پاکستان بچانے کےلئے آگے آئیں،بلوچستان کے عوام سے اظہاریکجہتی کےلئے احتجاج کریں، جلوس نکالیں۔
میں مسلسل اپیلیں کررہاہوں اورآج ایک بار پھر چیف آف آرمی اسٹاف جنرل عاصم منیر، تمام کورکمانڈرزاورآپریشنل کمانڈرز سے دردمندانہ اپیل کرتاہوں کہ بلوچوں سے مذاکرات کریں، ان کے زخموں پر مرہم رکھیں، بلوچستان نیشنل پارٹی کے سربراہ سرداراخترمینگل سے مذاکرات کریں، ان کے جائزمطالبات کوتسلیم کریں، پختونوں سے مذاکرات کریں،پختونخوا میں ڈرون حملے بند کریں، امریکہ سے چند مخصوص افراد کو بلا کر بات کرنے کے بجائے تحریک انصاف کے سربراہ عمران خان سے براہ راست مذاکرات کریں۔