باہیس اگست دو ہزار سولہ کو میرے اور ایم کیو ایم کےخلاف اسٹیبلشمنٹ کی جانب سے سازش کی گئی۔ الطاف حسین

باہیس اگست دو ہزار سولہ کو میرے اور ایم کیو ایم کےخلاف اسٹیبلشمنٹ کی جانب سے سازش کی گئی۔ الطاف حسین

22  اگست 2016ء کومیرے اور MQM کےخلاف اسٹیبلشمنٹ کی جانب سے سازش کی گئی، یہ سازش پہلی بارنہیں ہوئی تھی اس سےپہلےبھی اسٹیبلشمنٹ نےMQM کو کمزور کرنےکےلئے MQM کےنام سےکئی جعلی تنظیمیں بنائیں۔ چاہےجتنی بھی جعلی MQM بنالی جائیں، دنیاجانتی ہےکہ MQM کابانی الطاف حسین ہے۔

22  اگست 2016ء کی رات فوج نے MQM کے خلاف جواقدامات اٹھائے، اس پرآج بھی اسی طرح عمل درآمد جاری ہے۔فوج نے 22  اگست 2016ء کو MQM کےخلاف جوآپریشن کیااس کی تیاریاں پہلےسے کی جارہی تھیں، MQM کے کئی رہنماؤں، اراکین رابطہ کمیٹی اورارکان اسمبلی کو مختلف مفادات کا لالچ دیکرپہلے ہی خریدا جاچکا تھا۔23اگست 2016ء کی صبح انہوں نےپریس کانفرنس کرکے تحریک کے بانی و قائد سے لاتعلقی کا اعلان کردیا۔انہوں نے اپنےظرف وضمیر کاسودا کرلیامگر کارکنان ثابت قدم رہے ۔جوکارکنان اپنی وفاداری کا سودا کرنے کیلئے تیار نہ ہوئے انہیں غداروں نے مخبریاں کرکے جبری لاپتہ کروایا جن میں سے بیشتر کارکنان کو ماورائے عدالت قتل کرکےان کی مسخ شدہ لاشیں ویرانوں میں پھینک دی گئیں۔ میں وفاپرست کارکنان کووصیت کرتا ہوں کہ قوم کے غداروں سےان شہید کارکنان کے لہو کا حساب ضرور لینا۔ 22، اگست 2016ء کو میری رہائش گاہ ”نائن زیرو”، خورشید بیگم میموریل سیکریٹریٹ سمیت کراچی اور حیدرآباد سمیت سندھ بھرکےتمام زونل، سیکٹراور یونٹ آفسز seal کردیئے گئے جوآج تک وفاپرست کارکنان کو واپس نہیں ملے۔ تحریک کے خلاف یہ سب کچھ اس شخص کی موجودگی میں ہواجسے میں نے اعتماد کرتے ہوئے سندھ کا گورنر بنایا تھا اورجس نےمیری پیٹھ میں چھرا گھونپنے کاعمل کیا اور تحریک اورقوم کے مفادات کےلئےکام کرنےکے بجائے ان کےخلاف کام کیا۔

تمام تر پابندیوں کے باوجود پاکستان اور اوورسیز میں تحریک کا ایک ایک کارکن یوم ِ عزم ِ وفامنا رہا ہے۔گھٹن زدہ ماحول میں بھی تحریک کی مائیں، بہنیں اور بیٹیاں شہداء کےایصال ثواب کیلئے قرآن خوانی کے اجتماعات منعقد کرتی رہیں اور اپنے الطاف بھائی سے عہدِ وفا نبھاتی رہیں۔میں رابطہ کمیٹی کےکنوینر، ڈپٹی کنوینر، سابقہ اراکین، انٹرنیشنل سیکریٹریٹ کےمعاونین، میرے گھرپر ڈیوٹیاں دینے والےساتھیوں ، پاکستان اور اوورسیز یونٹوں میں موجود ایک ایک کارکن اورذمہ دار کو دل کی گہرائی سے شاباش اور خراج تحسین پیش کرتا ہوں۔

22 اگست کوجوسازش الطاف حسین اور اس کی MQM کے خلاف کی گئی وہی سازشی عمل آج 9برس بعد عمران خان کے خلاف دہرایاجارہاہے۔ الطاف حسین ، اس کی تحریک اوراس کی فیملی کے خلاف یہ سازشی اورظالمانہ عمل برسوں سےکیاجارہا ہے1979ء میں الطاف حسین کوگرفتارکرکےجنرل ضیاء الحق کی سمری ملٹری کورٹ نے 9ماہ قید اور پانچ کوڑوں کی سزا دی، پھر مزید 2مرتبہ جنرل ضیا کے دورمیں ہی الطاف حسین کوگرفتارکرکے ذہنی وجسمانی اذیتیں دی گئیں، مجھ پر قاتلانہ حملےکئے گئے، میری پارٹی کے خلاف فوجی آپریشن کئے گئے، میرے ہزاروں کارکنوں کوماورائے عدالت قتل کیاگیا، لیکن کسی نے اس ظلم کےخلاف آواز نہیں اٹھائی، جب ان مظالم سے مجھے نہیں جھکایا جاسکا تومجھے توڑنےکےلئے 1995ء میں میر ے بڑے بھائی ناصرحسین اور بھتیجے عارف حسین کوگرفتارکرکے تین روز تک تشدد کا نشانہ بنانے کے بعد کراچی میں گڈاپ کے علاقے میں لیجا کر گولیاں مار کر شہید کردیا، میرے بہنوئی اسلم ابراہانی کوگھرسےگرفتارکرکے اڈیالہ جیل میں اذیتیں دی گئیں اورادھ مرا کرکے پھینک دیا گیا،بعد میں وہ بھی شہید ہوگئے۔میرے باقی بہن بھائیوں کو بھی مسلسل چھاپوں کی وجہ سے اپنا گھر بار چھوڑ کر بیرون ملک جاناپڑا۔یہ ظلم میرے خاندان کے ساتھ ہوتارہا لیکن سب خاموش رہے،کاش اس وقت عمران خان اوردیگرسیاسی ومذہبی رہنماان مظالم کے خلاف آواز اٹھاتے۔

ستمبر 2015ء میں اسٹیبلشمنٹ نے لاہور ہائیکورٹ کے ذریعےمیری تقریراوربیانات کی نشرواشاعت پر پابندی لگادی، اس غیرآئینی وغیرقانونی پابندی کے خلاف بھی سب خاموش رہے، 2018ء میں عمران خان وزیراعظم بنے،انہوں نے بھی یہ پابندی ختم نہیں کرائی۔ عمران خان کو اقتدارسے باہرکرنےکےبعد ان پر قاتلانہ حملہ کیا گیا، وہ بچ گئے توگرفتار کرکے جیل میں ڈال دیا گیا، پھر بھی عمران خان نہ ٹوٹاتوان کا اعصاب توڑنےکے لئے ان کی فیملی کونشانہ بنایا جارہا ہے۔کل جب عمران خان کی سپریم کورٹ سے ضمانت منظورہوئی اورتحریک انصاف کےرہنما اور کارکنان اس پر خوشیاں منارہے تھےکہ دوسری طرف عمران خان کی بہن علیمہ خان کے گھر پرچھاپہ مار کران کےبھانجے شاہ ریز کو گرفتارکیا گیا اوردوسرے دن عدالت سے واپسی پر عمران خان کےدوسرے بھانجے شیرشاہ کوبھی گرفتارکرلیاگیا۔

کاش کہ جب الطاف حسین کی فیملی کو ریاستی مظالم کانشانہ بنایاجارہاتھا، اس وقت اگر عمران خان اور دیگرسیاسی ومذہبی رہنما اس ظلم کےخلاف آواز اٹھاتے تو آج عمران خان کی فیملی کونشانہ نہ بنایاجارہا ہوتا

دوسری طرف الطاف حسین کاعمل یہ ہے کہ جب عمران خان، پر قاتلانہ حملہ ہوا، انہیں گرفتارکیا گیا اوران کی پارٹی کوریاستی مظالم کانشانہ بنایا گیا تو پورے ملک میں واحد الطاف حسین تھا جس نے اس ظلم کے خلاف کھل کرآواز بلند کی اور آج تک آوازاٹھارہا ہے۔ اسی طرح جب نوازشریف اوران کی صاحبزادی مریم نواز پرظلم ہواتو میں نے ان کیلئے بھی آواز اٹھائی۔

جہاں جہاں جس جس پر ظلم ہوا الطاف حسین نے اس ظلم کے خلاف آواز بلند کی۔ جب تک میرے جسم میں سانس ہے میں ہر ظلم کے خلاف آواز احتجاج بلند کرتا رہوں گا کیونکہ اللہ تعالیٰ نے میرا دل ایسا بنایا ہے کہ مجھ سے کسی پرظلم دیکھا نہیں جاتا۔ میں عمران خان کی ہمشیرہ محترمہ علیمہ خان کے صاحبزادوں کی گرفتاریوں کی شدید الفاظ میں مذمت کرتا ہوں اوران کی رہائی کامطالبہ کرتاہوں۔

پی ٹی آئی کے کارکنان اپنے رہنماؤں کے بجائےمحترمہ علیمہ خان پر اعتماد کرتے ہیں، وہ اچھی طرح سمجھ چکے ہیں کہ ان کے لیڈران دوسال سے وزارت اعلیٰ اور اسمبلیوں کی رکنیت کےمزے لے رہے ہیں، مراعات وصول کررہے ہیں جبکہ کارکنان کو 10، 10 سال قید کی سزائیں دی جارہی ہیں مگر پی ٹی آئی کی لیڈرشپ خاموش ہے، علیمہ خان صاحبہ کےگھر پر چھاپے اوران کے بیٹوں کی گرفتاری پر PTI کی لیڈرشپ کو احتجاجی مظاہرے یا احتجاجی دھرنے کا اعلان کرنا چاہیے تھا مگر یہ لیڈرشپ خاموش ہے۔ میں پی ٹی آئی کے کارکنوں سے کہتا ہوں کہ وہ مصلحت پسندی کا شکارلیڈروں کی طرف نہ دیکھیں بلکہ تحریک کو اپنے ہاتھوں میں لےلیں۔

بلوچوں کو غدار کہاجارہا ہےجبکہ بلوچ غدار نہیں بلکہ اپنے جائز حقوق کی جدوجہد کررہے ہیں،انہیں غدار کہنے والے اوربلوچوں کوظلم کانشانہ بناکر انہیں دیوار سے لگانے والے فوجی جرنیل خود ملک کے غدار ہیں۔

الطاف حسین

ٹک ٹاک پر 304 ویں فکری نشست سے خطاب

22، اگست2025