بلوچستان سمیت دنیا بھر میں یوم شہداء بلوچستان منایا گیا

ہر سال کی طرح رواں سال بھی بلوچستان سمیت دنیا بھر میں آباد بلوچوں نے 13 نومبر کو یوم شہداء بلوچستان منایا۔ اس دن کے مناسبت سے بلوچستان سمیت یورپ اور دیگر ممالک میں مختلف تقریبات کا انعقاد کیا گیا، اور شمعیں روشن کیئے گئے۔

بلوچ شہدا کمیٹی کی جانب سے بلوچستان، خلیجی ممالک میں شہداء کو خراج تحسین پیش کرنے کے لئے تقاریب میں شہدا کو خراج عقیدت پیش کیا گیا۔
بلوچ خواتین اور بچوں کی بڑی تعداد نے شہیدوں کی تصاویروں پر پھول نچھاور کیئے۔

اس دوران تقریبات سے خطاب کرتے ہوئے مقررین نے کہاکہ بلوچ شہید مزاحمت کی علامت ہیں، شہیدوں کی عظیم قربانیوں سے آج بلوچستان میں قربانی کا شعور بیدار ہوچکا ہے.
تیرہ نومبر کا دن بلوچ قوم کے لئے ایک اعزاز سے کم نہیں، اس مقدس دن بلوچ قُوم بہ سر فخر بُلند ہوکر اپنے شہدا کی قربانیوں، جرأت اور مادر وطن بلوچستان کی حصولِ آزادی کے لئے بہائے جانے والے خون کے نذرانے کو ایک اعزاز و شان کے طور پہ مناتی اور یاد کرتی ہے۔

بلوچستان کے دارالحکومت کوئٹہ میں جبری گمشدگیوں کے خلاف احتجاجی کیمپ میں بھی شہدا دن کی مناسبت سے شمع روش کیے گئے اور شہدا کو خراج عقیدت پیش کیا گیا۔
دریں اثناء شہداء ڈے کی مناسبت سے ایک بلوچی دیوان منعقد کیا گیا۔ جس میں بلوچی اور براہوئی زبان کے نامور گلوکار میر احمد بلوچ، ساول کندیل اور میرل بلوچ نے شہدا کی جدوجہد اور انکی قربانیوں پر گیت گائے ۔

اس خصوصی دن کا چناو قوم پرستوں نے اس بنا پر کیا تھا کہ 13 نومبر 1839 کو انگریز حملے کے خلاف مزاحمت کرتے ہوئے بلوچ ریاست کے حاکم خان محراب خان اپنے ساتھیوں سمیت شہید ہوئے تھے۔ قوم پرستوں کے مطابق قبضے کے خلاف یہ شہادتوں کا نقطہ آغاز تھا جو آج تک جاری ہے۔