بلوچستان میں جبری گمشدہ بلوچ نوجوانوں ک ماورائے عدالت قتل اور مسخ شدہ لاشوں کی دریافت روز کا معمول بن گیا ہے

بلوچستان میں ماورائے عدالت قتل، بلوچ نوجوانوں پر تشدد اور متاثرین کے خاندانوں کو ہراساں کرنے میں اضافہ ہوا ہے۔
مسخ شدہ لاشوں کی دریافت روز کا معمول بن گیا ہے جو بلوچوں کی نسل کشی کی واضح یاد دہانی ہے۔
آواران کے علاقے مشکے میں پاکستانی فورسز نے جبری گمشدگی کے شکار چار بلوچ نوجوانوں کامران علیم، معراج، مومن اسلم اور حفیظ کو ماورائے عدالت قتل کر دیا ہے۔ یہ افراد 28 فروری کی رات کو پاکستانی فوج کے ہاتھوں دیگر پانچ افراد سمیت جبری طور پر لاپتہ کیے گئے تھے۔ دیگر پانچ افراد تاحال پاکستانی فوج کی غیر قانونی حراست میں ہیں، جن کی زندگیوں کو بھی شدید خطرات لاحق ہیں۔
بلوچ یکجہتی کمیٹی کے سربراہ ڈاکٹر ماہ رنگ بلوچ نے اپنے ایک بیان میں کہا ہے کہ بلوچ نسل کشی میں انتہائی شدت اور ریاستی جبر کے خلاف اس وقت پورا بلوچستان سراپا احتجاج ہے۔
انہو ں نے کہا کہ صرف اس سال کے ابتدائی دو مہینوں میں تقریباً دو سو بلوچوں کو جبری طور پر لاپتہ کیا گیا اور درجنوں بلوچوں کو ماورائے عدالت قتل کیا گیا ہے۔ محض ان دو مہینوں میں جبری گمشدگی اور ماورائے عدالت قتل کے خلاف بلوچستان میں سیکڑوں احتجاجی مظاہرے، ریلیاں اور دھرنے دیے جا چکے ہیں۔
بلوچ یکجہتی کمیٹی کے رہنما سمی دین بلوچ نے ریاستی فورسز کے ہاتھوں بلوچوں کے ماورائے عدالت قتل کو دہشت گردی کی سب سے لرزہ خیز شکل قرار دیدیاہے
جہاں پہلے لوگوں کو جبری طور پر لاپتہ کیا جاتا ہے، انہیں وحشیانہ جسمانی و ذہنی تشدد کا نشانہ بنایا جاتا ہے، اور پھر جعلی مقابلوں میں قتل کر کے انہیں دہشت گرد قرار دے دیا جاتا ہے۔ اس کے باوجود، یہ مظالم کسی بھی مرکزی میڈیا میں نمایاں نہیں کیے جا رہےاور نہ ہی کسی حکمران کے لئے فکر کا باعث ہیں۔