‏بلوچستان میں ریاستی جبر کی انتہا – پرامن مظاہرین پر تشدد، گرفتاریاں اور جبری گمشدگیاں

‏بلوچستان میں ریاستی جبر کی انتہا – پرامن مظاہرین پر تشدد، گرفتاریاں اور جبری گمشدگیاں

کوئٹہ/ بلوچ وائس فار جسٹس کوئٹہ میں جبری لاپتہ افراد اور ایکٹوسٹوں کی رہائی کے لیے ہونے والے پرامن مظاہرے پر ریاستی تشدد، لاٹھی چارج، آنسو گیس شیلنگ اور متعدد مرد و خواتین مظاہرین کی گرفتاری کی سخت الفاظ میں مذمت کرتی ہے۔ پرامن احتجاج ہر شہری کا بنیادی حق ہے مگر ریاستی ادارے طاقت کے استعمال سے مظاہرین کی آواز دبانے کی کوشش کر رہے ہیں، جو کہ انسانی حقوق کی سنگین خلاف ورزی ہے۔

ریاست ایک طرف جبری لاپتہ افراد کو غیر قانونی حراست میں رکھ کر انہیں جعلی مقابلوں اور آپریشنوں میں قتل کر رہی ہے اور دوسری طرف ان کی لاشیں لواحقین کے حوالے کرنے کے بجائے ایدھی کے ذریعے دفنائی جا رہی ہیں جو ایک غیر انسانی عمل ہے۔ جبری لاپتہ افراد کے اہلخانہ سالوں سے اپنے پیاروں کی بازیابی کے لیے سراپا احتجاج ہیں مگر انہیں انصاف دینے کے بجائے ریاست انہیں مزید ظلم و جبر کا نشانہ بنا رہی ہے۔

گزشتہ روز سول ہسپتال کوئٹہ میں جبری لاپتہ افراد کے لواحقین کو اپنے پیاروں کی شناخت اور حوالگی کے لیے جانے پر تشدد کا نشانہ بنایا گیا۔ جبری لاپتہ ظہور اور سجاد کے لواحقین ایکٹوسٹ سعیدہ بلوچ اور ان کی بہن کو گرفتار کر لیا گیا جبکہ 20 مارچ کی صبح بی وائی سی کے رہنما بیبرگ بلوچ اور ان کے بھائی ڈاکٹر حمل کو گھر سے جبری گمشدگی کا نشانہ بنایا گیا۔ اس کے علاوہ ڈاکٹر الیاس بلوچ کو تھری ایم پی او کے تحت غیر قانونی طور پر قید کیا گیا ہے۔

گزشتہ شب پروفیسر نوشین قمبرانی کے گھر پر چھاپہ مار کر ان کے خاندان کو ہراساں کیا گیا اور آج جبری گرفتاریوں اور گمشدگیوں کے خلاف لواحقین اور بی وائی سی کے رہنماؤں نے بلوچستان یونیورسٹی کے سامنے دھرنا دے رہے تھے جسے منتشر کرنے کے لیے ریاستی فورسز نے سرفراز بگٹی کے حکم پر خواتین، بچوں اور بزرگوں پر طاقت کا بے دریغ استعمال کیا۔

بلوچ وائس فار جسٹس اقوام متحدہ، انسانی حقوق کی تنظیموں اور عالمی برادری سے مطالبہ کرتا ہے کہ وہ بلوچستان میں جاری ریاستی جبر، جبری گمشدگیوں اور ماورائے عدالت قتل کا نوٹس لیں، تمام گرفتار شدہ مظاہرین کو فوری رہا کروائیں اور جبری لاپتہ افراد کی بازیابی کے لیے مؤثر اقدامات کریں۔

ہم یہ واضح کرنا چاہتے ہیں کہ ریاستی تشدد اور طاقت کے استعمال سے بلوچ عوام کی آواز دبائی نہیں جا سکتی۔ جبری لاپتہ افراد کے لواحقین اور مظلوم عوام انصاف کے حصول کے لیے اپنی جدوجہد جاری رکھیں گے۔