بلوچستان کے ضلع ڈیرہ بگٹی اور گوادر سے چوبیس گھنٹوں میں 16 افراد جبری لاپتہ

بلوچستان کے ضلع ڈیرہ بگٹی میں پچھلے کئی دنوں سے فورسز آپریشن تیزی کے ساتھ جاری ہے۔
اطلاعات کے مطابق دوران آپریشن فورسز نے بڑی تعداد میں لوگوں کو حراست میں لیا ہے۔ڈیرہ بگٹی اور گوادر سے 24 گھنٹوں کے دوران 16 سے زائد افراد پاکستانی فورسز کے ہاتھوں لاپتہ ہوئے ہیں۔
تفصیلات کےمطابق پاکستانی فورسز نے سوئی، ڈیرہ بگٹی میں چھاپوں کے دوران پانچ شہریوں کو جبری طور پر لاپتہ کردیا۔
فوج نے ڈیرہ بگٹی اور سوئی کو مکمل اپنے محاصرے میں لیکر چادر و چار دیواری کی پامالی کرتے ہوئے بلوچوں کے گھر میں گھس کر نہ صرف خواتین بچوں سے بدتمیزی کی انھیں غیر انسانی تشدد کا نشانہ بنا کر وہاں لوٹ مار کرکے پانچ افراد کو جبری لاپتہ کر دیا۔
فورسز کے ہاتھوں جبری گمشدگی کا شکار ہونے والوں میں توطا ولد موسیٰ بگٹی، غازی ولد چیڈو بگٹی اور جنگل ولد جعفر بگٹی کو بگٹی کالونی سے لے جایا گیا جبکہ جمعہ ولد محمود بگٹی کو خفیہ اداروں کے اہلکاروں نے دودوانی پل سے جبری طور پر لاپتہ کر دیا، سیف اللہ ولد کوہی بگٹی کو فورسز اہلکاروں نے سوئی شہر سے اپنے گھر جاتے ہوئے عاشقانی کے مقام سے جبری طور پر لاپتہ کردیا۔
اسی طرح کل پسنی سے گیارہ لاپتہ افراد کو گھروں سے اٹھا کر لاپتہ کیا گیا تھا ۔
جن میں سے آٹھ افراد کی شناخت ساجد، فیصل ،احمد رضا، سلیم رضا، نصیب، مقبول اکرم، زمان بلوچ اور علی بلوچ کے ناموں سے ہوئی۔
دریں اثنا تربت کے علاقے شاہی تمپ سے اکتوبر 2024 کو پاکستانی فورسز کے ہاتھوں لاپتہ کیے گئے سمیع اللہ ولد خلیل احمد پیر کی رات بازیاب ہوکرآ گئے۔
ان کی بازیابی کی تصدیق ان کے اہل خانہ نے کی ہے۔