بلوچ وائس فار جسٹس کا جبری گمشدگیوں کے خلاف دھرنوں کی حمایت کا اعلان، عالمی اداروں سے فوری مداخلت کی اپیل

کوئٹہ/ بلوچ وائس فار جسٹس جبری گمشدگیوں کے خلاف حب، سوراب، کوئٹہ اور نال میں دیے جانے والے دھرنوں کی مکمل حمایت کرتی ہے، ہم ان علاقوں کے باضمیر افراد سے اپیل کرتے ہیں کہ وہ دھرنوں میں بڑھ چڑھ کر حصہ لیں اور جبری گمشدگیوں کے خلاف آواز بلند کریں۔

آج دوسرے روز بھی حب بھوانی سے یاسر حمید، جنید حمید، نصیرجان، ندیم بلوچ، احسان بلوچ اور امین بگٹی کی فیملی کی جانب سے دھرنا جاری ہے، ان خاندانوں کچھ روز قبل بھی اپنے پیاروں کے بازیابی کے لئے شاہراہ بند کر چکے ہیں۔ 2 فروری 2025 کو ڈی سی حب، پولیس آفیسران اور دیگر حکام کے ساتھ ان کا معاہدہ ہوا تھا کہ ان کے پیاروں کو 20 دن کے اندر بازیاب کیا جائے گا، مگر افسوس کی بات ہے کہ ریاستی حکام اپنے وعدے سے مکر گئے ہیں اور ان کے پیارے ابھی تک جبری لاپتہ ہیں۔

خضدار زہری سے تعلق رکھنے والے لاپتہ 9 افراد کے لواحقین نے بھی اپنے پیاروں کی بازیابی کے لئے احتجاج کرتے ہوئے سوراب سی پیک زیرو پوائنٹ کو ہر قسم کی آمد و رفت کے لیے بند کر دیا۔ ان افراد میں مجیب الرحمن بوبک، عتیق الرحمن بوبک، محمد حیات مٹازئی، حافظ سراج احمد پندرانی، ذاہد احمد، سردار دودا خان، یاسر احمد، زکریا، نوید احمد اور محمد شفیق شامل ہیں۔ یہ تمام افراد جبری گمشدگی کا شکار ہوئے ہیں، جن کی بازیابی کے لیے ان کے خاندانوں نے اپنے پیاروں کی فوری بازیابی کا مطالبہ کیا ہے۔

کوئٹہ کے علاقے ویسٹرن بائی پاس سے خفیہ اداروں نے رات کے وقت ٹکری بہادر کھیازئی اور اس کے بھائی علی رضا کھیازئی، بشیر احمد کھیازئی کو جبری لاپتہ کر لیا ہے۔ ٹکری بہادر کھیازئی پہلے بھی جبری گمشدگی کا شکار ہو چکے ہیں۔ ان کی گمشدگی کے خلاف ویسٹرن بائی پاس کو ہر قسم کی ٹریفک کے لیے بند کر دیا گیا ہے تاکہ ان کی بازیابی کے لیے عالمی برادری کا دھیان اس طرف مبذول ہو۔

اس کے علاوہ کراچی سے لاپتہ ہونے والے صابر بلوچ کے خاندان نے نال خضدار سے روڈ بلاک کیا تھا، اور یہ احتجاجی دھرنا بھی خاندان کے دکھ اور تکلیف کو اجاگر کرنے کے لیے تھی۔

بلوچ وائس فار جسٹس ان تمام خاندانوں کی حمایت کرتی ہے اور عالمی اداروں بشمول اقوام متحدہ، ہیومن رائٹس واچ، ایمنسٹی انٹرنیشنل اور UN Working Group on Enforced or Involuntary Disappearances سے اپیل کرتی ہے کہ وہ اس سنگین مسئلے پر فوری طور پر ایکشن لیں اور پاکستانی فوج کی جانب سے انسانی حقوق کی پامالیوں کو روکنے کے لیے اپنا بھرپور کردار ادا کریں۔ ہم ان عالمی اداروں سے مطالبہ کرتے ہیں کہ وہ پاکستانی حکومت پر دباؤ ڈالیں تاکہ جبری گمشدگیوں کا سلسلہ فوری طور پر بند ہو اور ان افراد کو بازیاب کرایا جائے۔

جبری گمشدگیوں کے شکار خاندانوں کی اذیت اور درد ناقابل بیان ہیں۔ ان خاندانوں کا ہر دن ایک نئی امید اور تکلیف کے ساتھ گزرتا ہے۔ ان کے پیارے جبری طور پر غائب ہیں اور وہ انصاف کے منتظر ہیں۔ بلوچ وائس فار جسٹس ان خاندانوں کے ساتھ کھڑی ہے اور ان کے پیاروں کی بازیابی تک اپنی جدوجہد جاری رکھے گی۔ ہم عالمی برادری سے مطالبہ کرتے ہیں کہ وہ اس انسانی بحران کے خاتمے کے لیے موثر اقدامات کرے اور ان خاندانوں کو انصاف فراہم کرے۔

ہمیں یقین ہے کہ عالمی سطح پر دباؤ اور تعاون سے ہی یہ مسئلہ حل ہو سکتا ہے اور جبری گمشدگیوں کے شکار افراد کی بازیابی ممکن ہو گی۔