‏بلوچ وائس فار جسٹس کی جانب سے جاری پریس ریلیز بیان میں قلات میں بڑے پیمانے پر جبری گمشدگیوں پر تشویش کا اظہار

‏بلوچ وائس فار جسٹس کی جانب سے جاری پریس ریلیز بیان میں قلات میں بڑے پیمانے پر جبری گمشدگیوں پر تشویش کا اظہار اور ریاستی جبر کی شدید مذمت کرتے ہوئے کہا گیا ہے کہ قلات میں ریاستی فورسز کی جانب سے گزشتہ رات گھروں پر چھاپے، خواتین اور بچوں پر تشدد اور 35 سے زائد بلوچ نوجوانوں اور بزرگوں کو غیر قانونی طور پر حراست میں لے کر جبری لاپتہ کرنے کے واقعات کی بلوچ وائس فار جسٹس شدید الفاظ میں مذمت کرتی ہے۔ گزشتہ ایک ماہ کے دوران بلوچستان کے مختلف علاقوں سے سینکڑوں افراد کو جبری گمشدگی کا نشانہ بنایا گیا جن میں بڑی تعداد نوجوانوں اور طالب علموں کی ہے۔

ریاست نے گزشتہ کئی دہائیوں سے بلوچ نوجوانوں، طالب علموں اور سیاسی کارکنوں کے خلاف جبر اور جارحیت کا سلسلہ جاری رکھا ہوا ہے۔ بلوچ قوم کی افرادی قوت کو نشانہ بنا کر خاموش کرانے کی کوشش کی جا رہی ہے، جبری لاپتہ کیے گئے افراد کے اہلِ خانہ کئی دنوں سے سوراب اور کردگاپ میں دھرنے پر بیٹھے ہیں جبکہ حب میں دھرنا مظاہرین کے ساتھ معاہدہ کیا گیا کہ ان کے پیاروں کو 15 دن کے اندر بازیاب کیا جائے گا اس کے برعکس جبری گمشدگیوں میں مزید شدت لائی گئی ہے اور متاثرہ خاندانوں کے مسلسل احتجاج اور طویل دھرنوں کے باوجود ریاستی ادارے اور بلوچستان حکومت غیر سنجیدہ رویہ اپنائے ہوئے ہیں۔

بلوچستان میں انسانی حقوق کی بدترین پامالیوں پر مقامی اور بین الاقوامی انسانی حقوق کی تنظیموں کی خاموشی انتہائی تشویشناک ہے، ہیومن رائٹس واچ، ایمنسٹی انٹرنیشنل اور ہیومن رائٹس کمیشن آف پاکستان جیسے معتبر اداروں کا غیر مؤثر کردار قابلِ افسوس ہے۔ دوسری جانب پاکستانی میڈیا نے بلوچستان کو مکمل طور پر بلیک آؤٹ کر رکھا ہے۔ بلوچ عوام کو درپیش مظالم اور جبری گمشدگیوں کی خبریں قومی میڈیا میں جگہ نہیں پاتیں جبکہ دیگر معاملات کو غیر ضروری طور پر بڑھا چڑھا کر پیش کیا جاتا ہے۔ پاکستانی میڈیا کی اس جانبدارانہ اور مجرمانہ خاموشی نے اسے ریاستی جبر کے سہولت کار کے طور پر بے نقاب کر دیا ہے۔

بلوچ وائس فار جسٹس عالمی میڈیا، اقوامِ متحدہ اور بین الاقوامی انسانی حقوق کی تنظیموں سے اپیل کرتی ہے کہ وہ بلوچستان میں جاری انسانی حقوق کی سنگین خلاف ورزیوں پر توجہ دیں، جبری لاپتہ افراد کے اہلِ خانہ کی آواز دنیا تک پہنچائیں اور ریاستِ پاکستان پر دباؤ ڈالیں کہ وہ جبری گمشدگیوں کا سلسلہ فوری طور پر بند کرے۔ بلوچستان کے عوام کو ان کے بنیادی انسانی حقوق سے محروم رکھنا عالمی برادری کے لیے ایک لمحۂ فکریہ ہے اگر اس جبر کے خلاف مؤثر آواز نہ اٹھائی گئی تو یہ مظالم مزید شدت اختیار کر سکتے ہیں جس کے نتائج پورے خطے کے لیے تباہ کن ثابت ہوں گے۔