بلوچ وائس فار جسٹس کے زیر اہتمام انسانی حقوق کے عالمی دن کے موقع پر مہم چلائی جائے گی

بلوچ وائس فار جسٹس کے جاری کردہ بیان میں کہا گیا ہے کہ بلوچ وائس فار جسٹس 10 دسمبر کو انسانی حقوق کے عالمی دن کی مناسبت سے بلوچستان میں جبری گمشدگیوں، فیک انکاونٹرز اور انسانی حقوق کی پامالیوں”کوعالمی سطح پر اجاگر کرنے کے لئے ایک مہم چلائے گی۔
بیان میں کہا گیا ہے کہ بلوچ قوم طویل عرصے سے ریاستی جبر کا شکار ہے اور انہیں درج ذیل مظالم کا سامنا ہے:
جبری گمشدگیاں اور غیر معینہ مدت تک حراست،
جعلی مقابلوں میں ماورائے عدالت قتل،
منظم ظلم و ستم اور نسل کشی،
تعلیم اور روزگار کے بنیادی حقوق کی محرومی،
سرحدی تجارت، ماہی گیری اور دیگر روزگار کے وسائل پر پابندیاں۔
بلوچ وائس فار جسٹس نے تمام انسانی حقوق کے کارکنوں، طلبہ، وکلا، صحافیوں، اور سماج کے تمام افراد سے اپیل کی ہے کہ وہ بلوچ عوام کی حمایت میں آواز بلند کریں اور انصاف، جوابدہی، اور انسانی وقار کے لیے جاری جدوجہد کا حصہبن کر لاپتہ افراد کی بازیابی کو یقینی بنانے، جبری گمشدگیوں، فیک انکاونٹرز اور بلوچستان میں انسانی حقوق کی پامالیوں کے روک تھام کا مطالبہ کریں۔
بیان کے مطابق بلوچ عوام کو زندگی، اظہار رائے، اور اجتماع جیسے بنیادی انسانی حقوق سے بھی محروم رکھا جا رہا ہے۔
بیان میں کہا گیا ہے کہ ہم سب کو مل کر مظلوم بلوچ عوام کے دکھ اور ان کی جدوجہد کو دنیا کے سامنے پیش کرنا چاہیے تاکہ عالمی برادری ان مظالم کا ادراک کرے اور انصاف کے عمل کو یقینی بنانے میں اپنا کردار ادا کرے۔