تربت: بازیاب ہونے کے بعد نوجوان کو جبری گمشدگی کا نشانہ بنا کر قتل کیا گیا

بلوچستان کے ضلع کیچ کے مرکزی شہر تربت میں پیر کی صبح نامعلوم مسلح افراد نے فائرنگ کرکے ایک نوجوان کو قتل کر دیا۔ یہ واقعہ پارک ہوٹل کے قریب صبح تقریباً گیارہ بجے پیش آیا۔ پولیس کے مطابق مقتول کی شناخت عدیل ولد ماسٹر اقبال کے طور پر ہوئی ہے، جو تربت کے علاقے آپسر کا رہائشی تھا۔

مقتول عدیل کو قبل ازیں جبری گمشدگی کا سامنا رہا تھا اور طویل عرصے تک لاپتہ رہنے کے بعد حال ہی میں بازیاب ہوا تھا۔ رہائی کے بعد ہی آج اسے دن دیہاڑے فائرنگ کر کے قتل کر دیا گیا، جس سے علاقے میں خوف و ہراس پھیل گیا ہے۔ یہ واقعہ بلوچستان میں اس نوعیت کا پہلا نہیں ہے، بلکہ اس سے قبل بھی جبری گمشدگی کے بعد لوگوں کو ہدف بنا کر قتل کرنے کے متعدد واقعات رپورٹ ہو چکے ہیں۔

انسانی حقوق کی تنظیمیں، سیاسی کارکنان اور قوم پرست جماعتیں اس طرح کے واقعات کو ریاستی اداروں کی “بلوچ نسل کشی” کی پالیسی قرار دیتی آئی ہیں۔ ان حلقوں کا کہنا ہے کہ بلوچ نوجوانوں کو اکثر پہلے جبری طور پر لاپتہ کیا جاتا ہے، اور پھر انہیں یا تو ٹارگٹ کلنگ کا نشانہ بنایا جاتا ہے یا جعلی مقابلوں کے ذریعے قتل کیا جاتا ہے، جس سے بلوچ معاشرے میں بے چینی اور خوف کی فضا پھیل رہی ہے۔