جاوید بلوچ کی رہائی خوش آئند بات ہے ۔ ہم امید کرتے ہیں دیگر تمام لاپتہ بلوچ طلباء باحفاظت بازیاب کئے جائیں گے۔

بلوچ اسٹوڈنٹس کونسل فیصل آباد

بلوچ اسٹوڈنٹس کونسل فیصل آباد کے ترجمان نے اپنے جاری کردہ بیان میں کہا ہے کہ جوید بلوچ کی باحفاظت بازیابی انتہائی خوشی کی بات ہے۔ ہم امید کرتے ہیں اسی طرح طالب علم فیروز بلوچ سمیت تمام لاپتہ بلوچ طلباء کو باحفاظت بازیاب کیا جاۓ اور ان کو تعلیم حاصل کرنے کا موقع دیا جاۓ۔

یاد رہے کہ جاوید بلوچ کو خضدار کے علاقے بولان کالونی کے ایک دکان سے 4 مئی کے دن 10:00 بجے کے وقت تین گاڑیوں میں فورسز اور سادہ کپڑوں میں ملبوس اہلکاروں نے بنا کسی جرم اور بغیر کسی ایف آئی آر کے لاپتہ کر دیا تھا۔ جاوید بلوچ زرعی یونیور سٹی فیصل آباد کے ڈیپارٹمنٹ ہارٹیکلچر میں 2018 سے 2022 تک طالب علم رہے ۔ وہ بلوچ اسٹوڈنٹس کو نسل زرعی یونیورسٹی فیصل آباد کے سابق چیئر مین رہ چکے ہیں۔ طلباء کی جگہ یونیورسٹی ہے لیکن بد قسمتی سے ان کو زندانوں میں بند کر دیا جاتا ہے۔ کبھی بلوچ طلباء کو جبری گمشدگی کا شکار بنا کر تو کبھی یونیورسٹی کیمپسز میں ہراسمنٹ کانشان بنایا جاتا ہے۔

ہر طالب علم کو پڑھنے لکھنے اور سوچنے کا موقع دیا جائے تا کہ وہ ایک اچھے انسان بن سکیں اور اپنی قوم کی خدمت کر سکیں۔ بلوچ اسٹوڈنٹس کونسل فیصل آباد کے ترجمان نے اپنے بیان کے آخر میں کہا کہ ہم بلوچ کونسلز وفاق اور پنجاب سمیت تمام طلباء تنظیموں، سوشل میڈیا ایکٹوسٹس اور ہر وہ کردار جس نے جاوید بلوچ سمیت دیگر لاپتہ بلوچ طلباء کے لیے اپنی آواز بلند کی ہے اور اس جبر و ظلم کے خلاف کھڑے رہے ہیں ہم ان سب کا شکریہ ادا کرتے ہیں۔ اور امید کرتے ہیں وہ اسی طرح اپنی آواز بلند کرتے رہینگے۔