حق پرستی کا سفر پھولوں کی سیج نہیں، کانٹوں کی ہار ہے_ الطاف حسین بانی ایم کیو ایم

حق پرستی کا سفر پھولوں کی سیج نہیں، کانٹوں کی ہار ہے_ الطاف حسین بانی ایم کیو ایم

مہاجروں کو اپنے جائز حقوق کے حصول اوراپنے ساتھ کی جانے والی ناانصافیوں اور حق تلفیوں سے نجات کے لئے کٹّر قوم پر ست بننا ہوگا۔ الطاف حسین بانی متحدہ قومی موومنٹ

‏مہاجروں کو اپنے جائز حقوق کے حصول اوراپنے ساتھ کی جانے والی ناانصافیوں اور حق تلفیوں سے نجات کے لئے کٹّر قوم پر ست بننا ہوگا۔ ہمیں تمام قوم پرست منظور ہیں لہٰذا کسی کو مہاجروں کے قوم پر ست ہونے پر بھی اعتراض نہیں کرنا چاہیے۔

مہاجروں کے ساتھ آج پاکستان میں دوسرے اورتیسرے درجے کاجوامتیازی سلوک کیا جارہا ہے وہ افسوسناک ہے ۔مہاجروں کوآج اپنےساتھ ہونےوالے سلوک کوتاریخی تناظر میں دیکھنا ہوگا۔ہمارے آباؤاجداد ہزاروں سال سے غیرمنقسم ہندوستان میں نسل درنسل رہتےتھے، یہ ایک تلخ تاریخی حقیقت ہے کہ انگریزوں نےاپنےمفادات کے تحت ہندوستان کو تقسیم کرنےکامنصوبہ بنایااور مسلمانوں میں یہ سوچ پیدا کی کہ ہندوستان میں مسلمان اقلیت میں ہیں اورانگریزوں کے چلےجانے کے بعد مسلمان متحدہ ہندوستان میں ہندوؤں کے زیراثر رہیں گے لہٰذا مسلمانوں کو اپنا علیحدہ وطن حاصل کرنا چاہیےجہاں وہ اپنے مذہب کے مطابق آزادی کے ساتھ رہ سکیں۔ ہمارے آباؤ اجداد انگریزوں کی اس سازش سے ناواقف تھے، انہوں نے اللہ ، رسولۖ اور اسلام کی خاطر ایمانداری سے تحریک پاکستان چلائی اور 20لاکھ جانوں کے نذرانے پیش کیے، پاکستان کی خاطر اپنے گھربار، اجداد کی قبریں، بزرگوں کی یادگاریں اوربچپن کی یادیں چھوڑدیں اور پاکستان کو مسلمانوں کا وطن سمجھ کر اپنے آبائی وطن ہندوستان سے ہجرت کرکے پاکستان آگئے۔ پاکستان برصغیرکے ان علاقوں میں نہیں بناجہاں پاکستان کی تحریک چلائی گئی بلکہ ان علاقوں میں بنا جہاں سرے سے پاکستان کی تحریک ہی نہیں چلی تھی ۔

آج پاکستان کےقیام کو 78برس بیت چکے ہیں لیکن آج تک بانیان پاکستان کی اولادوں یعنی مہاجروں کو فرزند زمین تسلیم نہیں کیاجاتا اور اہم قومی ایام میں مہاجروں کی تہذیب وثقافت کا کوئی تذکرہ نہیں کیاجاتا۔

قیام پاکستان کےبعد بانی پاکستان قائداعظم محمد علی جناح، پاکستان کے پہلےوزیراعظم خان لیاقت علی خان اور محترمہ فاطمہ جناح کےقتل کے بعد مختلف حکومتوں کے ادورار میں مہاجر بیوروکریٹس کو چن چن کر نکالاجاتارہا ، نیشنلائزیشن پالیسی کی آڑ میں مہاجروں کے بنکوں، صنعتوں، تعلیمی اداروں اور انشورنس کمپنیوں کو قومیالیاگیا، اس  کے بعد سرکاری ملازمتوں اور تعلیمی اداروں کےدروازے مہاجروں پر بند کردیئے گئے۔ ہردورمیں مہاجروں کے ساتھ یہی امتیازی سلوک کیاجاتارہااور آج صورتحال یہ ہے کہ کراچی میں ایک بھی مہاجر کمشنر یا ڈپٹی کمشنر نظرنہیں آتا۔ ہمارے بزرگوں نےخلوص نیت کے ساتھ قیام پاکستان کیلئے قربانیاں دیں لیکن پاکستان میں بانیان پاکستان کی اولادوں کےساتھ غیروں سے بدتر سلوک روا رکھا جارہا ہے ۔

مہاجروں کے آئینی اورقانونی حقوق کیلئے میں نےمہاجر تحریک کی بنیاد رکھی، بکھرے ہوئےمہاجروں کو ایک پلیٹ فارم پرمتحد کرنےکیلئے APMSO سے مہاجر قومی موومنٹ اورپھر مہاجر قومی موومنٹ سے متحدہ قومی موومنٹ کے سفر کےدوران آگ اور خون کے انگنت دریا عبور کیے، مجھے جنرل ضیاء الحق کے مارشل لاء کے دوران تین مرتبہ گرفتارکیا گیا، 9، ماہ قید اور 5 کوڑوں کی سزا سنائی گئی اور حق پرستانہ جدوجہد سے باز رہنے کیلئے طرح طرح کی پیشکشیں بھی کی گئیں لیکن مجھے اصولی جدوجہد سے باز نہیں رکھا جاسکا۔ جب استحصالی قوتیں مجھے خوفزدہ نہ کرسکیں اورخرید نہ سکیں مجھ پر ہینڈ گرینیڈ سے قاتلانہ حملہ کرایا گیا جس کے بعد ساتھیوں نے بے حد اصرار کرکے مجھےلندن بھیج دیا اور میں گزشتہ 33 برسوں سےلندن میں جلاوطنی کی زندگی گزار رہا ہوں لیکن میں نےایک دن کیلئے بھی تحریکی مشن ترک نہیں کیا اور ہر قسم کے نشیب وفراز کے باوجود ثابت قدم رہا۔ میں نے ایم کیوایم کے پلیٹ فارم پر متحدکرکے مہاجروں کوایسی طاقت بنادیا تھااور ایساماحول بنادیا تھا کہ کراچی سمیت سندھ کے دیگر شہروں میں کوئی اوباش کسی خاتون پر حملہ کرناتودورکی بات ہے ،ان پرجملہ کسنے کی جرات نہیں کرسکتاتھا لیکن ایم کیوایم کےخلاف باربار کے فوجی آپریشن اورتحریک کے لوگوں کی غداریوں کے نتیجے میں یہ صورتحال ہوگئی ہے کہ آج کراچی میں دن دیہاڑے خواتین کو لوٹا جارہا ہے، ان کی چادروں پر ہاتھ ڈالا جارہاہے اور ان ڈاکوؤں کو روکنے والا کوئی نہیں ہے ۔

میں نے اپنے ساتھیوں کوشروع سے یہ آگاہ کیا تھا کہ حق پرستی کی تحریک پھولوں کی سیج نہیں ہوتی بلکہ کانٹوں کی باڑ ہوتی ہے جس پر چلنے والوں کے پیر زخمی ہوجاتے ہیں لیکن جو لوگ تمام ترمصائب ومشکلات کے باوجود اپنا تحریکی سفر جاری رکھتے ہیں، کامیابی کی منزل ان کا مقدر بن جایاکرتی ہے ۔