حوثی مسلح افراد کا صنعاء میں اقوام متحدہ کی ایجنسیوں کےمراکز پر دھاوا،متعدد اہلکار گرفتار

حوثی مسلح افراد کا صنعاء میں اقوام متحدہ کی ایجنسیوں کےمراکز پر دھاوا،متعدد اہلکار گرفتار

یمن: اتوار کے روز حوثی مسلح افراد نے دارالحکومت صنعاء میں اقوام متحدہ کی امدادی ایجنسیوں کے دفاتر پر دھاوا بول دیا اور کئی اہلکاروں کو گرفتار کر کے نامعلوم مقام پر منتقل کر دیا۔

ذرائع نے جرمن خبر رساں ادارے ’ڈی پی اے‘ کو بتایا کہ حوثیوں نے اقوام متحدہ کے ذیلی اداروں عالمی ادارہ برائے خوراک (WFP) اور یونیسیف کے دفاتر پر دھاوا بول کر ان کے ملازمین کو حراست میں لے لیا۔

اطلاعات کے مطابق حوثیوں نے عالمی ادارہ خوراک کے تقریباً 7 اور یونیسیف کے 3 ملازمین کو گرفتار کیا اور انہیں ایک نامعلوم جگہ پر منتقل کر دیا۔

وجوہات تاحال نامعلوم

تاحال یہ واضح نہیں ہو سکا کہ حوثیوں نے دونوں اداروں کے دفاتر پر دھاوا کیوں بولا اور اہلکاروں کو کیوں گرفتار کیا۔ اس حوالے سے حوثی ملیشیا کی طرف سے کسی قسم کا بیان سامنے نہیں آیا۔

یہ گرفتاریاں ایسے وقت میں کی گئیں جب ایک روز قبل حوثیوں نے اعلان کیا تھا کہ ان کے نامزد وزیراعظم احمد الرہوی اور ان کے کئی وزراء صنعاء میں ایک اسرائیلی فضائی حملے میں ہلاک ہو گئے ہیں۔

اس سے قبل بھی حوثی ملیشیا متعدد اقوام متحدہ کے اہلکاروں کو گرفتار کر چکی ہے جن میں سے بعض اب تک حراست میں ہیں۔

حوثی رہنماؤں نے بارہا اقوام متحدہ اور عالمی تنظیموں کے اہلکاروں پر امریکہ کے لئے جاسوسی کرنے کے الزامات لگائے ہیں تاہم ان دعوؤں کو بین الاقوامی حلقوں نے سختی سے مسترد کیا ہے.