خضدار میں بس پر دھماکہ، آؤ، مذمت کریں – دل مراد بلوچ

تحریر: دل مراد بلوچ

ان سطور کو لکھتے ہوئے میرے دو معصوم بچے میرے پاس کھیل رہے ہیں۔ انہی کے شور میں میرے دل میں ایک اور شور برپا ہے۔

آج صبح خضدار میں ایک دھماکہ ہوا۔ بعض ذرائع کے مطابق پاکستانی فوج کی ایک بس کو نشانہ بنایا گیا۔
کہتے ہیں جنگ میں سب سے پہلے سچ مارا جاتا ہے اور اگر یہ کسی پر صادق آتا ہے تو وہ پاکستان ہے۔ بارہا ہم نے دیکھا کہ جہاں پاکستان کی ریاستی مشینری بولتی ہے، وہاں سچ دفن ہی ہوتا ہے۔

اس واقعے پر پاکستانی فوج، وزیر داخلہ، حکومتی ترجمان اور میڈیا چیخ چیخ کر بتا رہے ہیں کہ یہ بس بچوں کو اسکول لے جا رہی تھی، جس پر حملہ ہوا۔ وہ دعویٰ کر رہے ہیں کہ چار بچوں سمیت پانچ افراد ہلاک ہوئے۔

بی بی سی اردو سمیت چند بین الاقوامی ادارے بھی یہی بات دہرا رہے ہیں لیکن غور کریں کسی ایک بھی ادارے نے اس واقعے کی آزادانہ تصدیق نہیں کی، سبھی ذرائع پاکستانی فوج کے ترجمان ادارے کے بیانات کو بنیاد بنا کر خبریں چلا رہے ہیں یا پاکستانی فوج کی بیان ہی آگے بڑھا رہے ہیں لیکن

ہر رپورٹ میں چند باتیں مشترک ہیں:
پہلا یہ کہ بس میں چالیس بچے سوار تھے
دوسرا یہ کہ چار بچوں سمیت پانچ افراد ہلاک ہوئے
تیسرا یہ کہ بس مکمل طور پر تباہ ہو گئی
چوتھا یہ کہ کچھ اسکولی بستے دکھائے جا رہے ہیں جو دھماکے کے مقام سے برآمد ہوئے جو بالکل سلامت ہیں۔
اور پانچواں یہ کہ جائے وقوعہ اور ہسپتال جہاں متاثرہ افراد تک فوج کے علاوہ کسی کو رسائی حاصل نہیں

اب ذرا رک کر سوچیے

کیا پاکستان نے کبھی بلوچ جنگ یا کسی اور حساس معاملے میں سچ بولا ہے؟

کیا بی بی سی یا کسی دوسرے ادارے نے براہِ راست جا کر یہ تصدیق کی ہے کہ واقعی بس میں معصوم بچے سوار تھے؟

کچھ ذرائع کہتے ہیں کہ دھماکہ ایک فوجی کانوائے پر ہوا ہے لیکن فوج مسلسل اس بیانیے پر زور دے رہی ہے کہ حملہ سکولی بچوں کو لے جانے والی بس پر ہوا۔ لیکن اس بات کی فوج بھی تصدیق کر رہا ہے کہ بس مکمل طور پر تباہ ہو گئی، اس میں حیرت کی بات یہ ہے کہ بس میں سوار چالیس بچوں میں سے صرف چار بچوں کی موت کی خبر دی گئی ہے۔ اگر دھماکہ اتنا شدید تھا کہ بس محض لوہے کے ڈھانچے میں بدل گئی، تو باقی بچے کہاں گئے؟
کیسے ممکن ہے کہ ایک مکمل تباہ شدہ بس میں سے صرف چند بچے مارے جائیں اور باقیوں کے بارے میں کوئی معلومات، تصاویر یا بیانات سامنے نہ آئیں؟
اس سے بھی بڑھ کر، جو بچوں کے بیگ میڈیا پر دکھائے جا رہے ہیں، وہ تمام کے تمام محفوظ حالت میں ہیں، بغیر کسی جلے ہوئے نشان کے۔ یہ بات شک پیدا کرتی ہے کہ آیا یہ بیگ واقعی اس تباہ شدہ بس سے برآمد ہوئے ہیں یا کسی اور مقصد کے تحت منظرِ عام پر لائے گئے ہیں۔
یہ تمام تضادات اس بات کی طرف اشارہ کرتے ہیں کہ ریاست کوئی خاص بیانیہ گھڑنے کی کوشش کر رہی ہے، تاکہ عالمی سطح پر ہمدردی حاصل کی جا سکے اور داخلی سطح پر بلوچ عوام پر مزید ظلم ڈھانے کا ماحول تیار کیا جا سکے۔
بلوچستان میں "پاکستانی سچ” ہمیشہ حیرت کا مقاتم کدہ ہوتا ہے اور قوی امکان ہے کہ ایسی ہزارہا حیرتیں پاکستان کےریاستی دھوکہ خانے میں ہمارے منتظر ہیں۔

اگر سکولی بچوں کا بس نشانہ بنانا ہے تو بلاتفریق مذمت ہونا چاہئے البتہ وزیرستان میں ڈرون حملے میں پنجگور و دیگر علاقوں میں فوجی مارٹر گولوں سے ہلاک بچوں کی بالکل نہیں ہونا چاہئے۔

ہمیں یاد رکھنا چاہئے محض پاکستان کہتا ہے اور بات سچ ہو، یہ ہرگز ہرگز ممکن نہیں، جب حقائق فوجی کنٹرول میں چلے جاتے ہیں تو وہاں حقائق زندہ نہیں رہ سکتے، حقائق زندان میں قید ایک بلوچ نوجوان کی ڈرل مشین سے چھلنی لاش بن جاتے ہیں جس سڑانڈ ابل رہی ہوگی۔

اس وقت یا اکثر جنگی باب میں صبر کا دامن تھام لینا اور جذبات میں نہیں بلکہ حقائق پر نظر رکھنا چاہئے، شاید ہم سب کے لیے بہتر راستہ ہو۔