سردار عطااللہ مینگل کے روشن چراغ آج بھی بلوچستان کو منور کر رہے ہیں، میر جاوید مینگل

سردار عطااللہ مینگل کے روشن چراغ آج بھی بلوچستان کو منور کر رہے ہیں، میر جاوید مینگل

بلوچ آزادی پسند سنگت میر جاوید مینگل نے سوشل میڈیا پلیٹ فارم X پر جاری بیان میں کہا ہے کہ بابا عطااللہ مینگل نے جو وطن دوستی اور قوم پرستی کے چراغ جلائے تھے، اُن کی روشنی آج بھی بلوچستان کے کوچہ کوچہ اور گھر گھر تک پہنچی ہوئی ہے۔

انہوں نے کہا کہ بلوچستان میں اب بھی ایسے لوگ کثرت سے موجود ہیں جو بابا کے اصولوں کے پیروکار ہیں۔ ان کے دلوں میں آج بھی وہی محبت اور احترام زندہ ہے مگر وہ آپ کا نام یا تصویر اپنے ذاتی سیاسی مفاد کے لیے استعمال نہیں کرتے بلکہ آپ کے نظریے کے ساتھ مخلصی سے جڑے ہیں۔

میر جاوید مینگل نے مزید کہا کہ آج بلوچستان کو قابض قوتیں عالمی منڈیوں میں نیلام کر رہی ہیں اور ہر کوئی گدھ کی طرح اس کے وسائل لوٹنے میں مصروف ہے۔ لیکن یہ دھرتی لاوارث نہیں، نہ ہی یہ کسی چوہدری، میاں یا پنڈی و لاہوری سیاستدانوں کی ملکیت ہے کہ وہ اس کا سودا کر کے اپنے قرضے اتارتے رہیں۔

انہوں نے زور دیا کہ اب بھی وقت ہے بلوچ قوم اپنے گروہی اختلافات کو ختم کر کے ایک وسیع تر مقصد کے لیے یکجا ہو اور دنیا کو یہ پیغام دے کہ اس سرزمین پر بسنے والے کیڑے مکوڑے نہیں بلکہ اس دھرتی کے اصل وارث اور مالک ہیں۔