شال سول ہسپتال کے مردہ خانے میں 45 سے زائد مسخ شدہ لاشیں؛دل دہلانے والی رپورٹ پر پانک کا اظہار تشویش

بلوچ نیشنل موومنٹ (بی این ایم) کے انسانی حقوق کے ادارے "پانک” نے شال، بلوچستان سے دل ہلا دینے والی رپورٹس پر شدید تشویش کا اظہار کیا ہے ۔پانک کا کہنا ہے شال سول ہسپتال کے مردہ خانے میں اب تک 45 سے زائد مسخ شدہ اور تشدد زدہ لاشیں لائی جا چکی ہیں۔ جس سے مردہ خانے کی حالت مزید ابتر ہو گئی ہے۔ ۔پانک کے رپورٹ میں کہا گیاہے کہ بلوچستان میں پاکستانی فوج کی جانب سے جبری گمشدگیوں اور ماورائے عدالت قتل کے واقعات میں اضافہ تشویشناک ہے۔

مسخ شدہ لاشوں کی موجودگی اس بات کی طرف اشارہ کرتی ہے کہ ان افراد پر بدترین تشدد کیا گیا، انھیں ماورائے عدالت قتل کیا گیا یا جبری طور پر لاپتہ کیا گیا ۔
پانک کے مصدقہ ذرائع کے مطابق حالیہ دنوں میں مزید پانچ لاشیں ہسپتال منتقل کی گئی ہیں، جس سے مردہ خانے کی حالت مزید ابتر ہو گئی ہے۔ اطلاعات کے مطابق مسخ لاشیں ایک دوسرے کے اوپر رکھی جا رہی ہیں، جس سے صحت عامہ کے لیے سنگین خطرہ پیدا ہوا ہے

رپورٹ میں مزید کہاہے کہ بلوچستان میں جبری گمشدگیاں بلوچ سماج میں ایک مستقل خوف اور اذیت کی صورت ، ایک ختم نہ ہونے والے درد کی شکل اختیار کر گئی ہیں۔

جبری گمشدگی اور جعلی مقابلوں میں بلوچ نسل کُشی پاکستانی فوج کا بلوچ شعور کے خلاف واحد ہتھیار ہے ۔کئی سانحات پر بلوچ قوم کے پر زور احتجاج کے باوجود اس حکمت عملی کو گذشتہ دو دہائیوں سے جاری رکھا گیا ہے۔
پانک نے حکومت پاکستان اور اندرونی و بین الاقوامی انسانی حقوق کے اداروں سے مطالبہ کیا ہے کہ وہ فوری اقدامات کریں، جن میں ہر لاش کی آزاد اور شفاف فرانزک تحقیقات، ممکنہ طور پر شناخت شدہ افراد کے ناموں کا انکشاف، لاشوں کو ان کے اہل خانہ کے حوالے کرنا، ذمہ داروں کو انصاف کے کٹہرے میں لانا، اور بین الاقوامی مبصرین کو صورتحال کا خود جائزہ لینے کی اجازت دینا شامل ہیں۔

رپورٹ کے آخر میں کہاہے کہ سوشل میڈیا پر جو واقعات سامنے آتے ہیں، وہ محض جبری گمشدگی اور غیرقانونی حراست سے رہائی پانے والوں کے اعداد و شمار بتاتے ہیں۔اس عمل کے نتیجے میں بلوچ سماج کی شعوری و سماجی ترقی کو جو گزند پہنچ رہا ہے اس پر گہری تحقیق اور علمی مشاہدے کی ضرورت ہے۔

اپنے بیان میں پانک نے ایک بار پھر واضح کیا کہ بلوچستان کے عوام کو انصاف، سچ اور وقار سے رہنے کا حق حاصل ہے۔ اگر خاموشی اور بے عملی کا سلسلہ جاری رہا تو اس مظلوم قوم کے زخم مزید گہرے ہوتے چلے جائیں گے، جو پہلے ہی منظم ریاستی تشدد اور بے حساب جبر کا شکار ہے۔