عالمی یومِ جبری گمشدگی: بلوچ یکجہتی کمیٹی کی "یاد ہی شناخت ہے” مہم کا اعلان

عالمی یومِ جبری گمشدگی: بلوچ یکجہتی کمیٹی کی "یاد ہی شناخت ہے” مہم کا اعلان

بلوچ یکجہتی کمیٹی نے عالمی یومِ جبری گمشدگی (30 اگست) کے موقع پر ملک گیر مہم کا اعلان کیا ہے جس کا عنوان "یاد ہی شناخت ہے — یادوں کو غائب نہیں کیا جا سکتا” رکھا گیا ہے۔

ترجمان کے مطابق، اس مہم کا مقصد جبری گمشدگی جیسے سنگین مسئلے کو عالمی سطح پر اجاگر کرنا اور گمشدہ افراد کے خاندانوں کے ساتھ اظہارِ یکجہتی کرنا ہے۔

اقوامِ متحدہ نے 30 اگست کو عالمی یومِ جبری گمشدگی کے طور پر تسلیم کر رکھا ہے تاکہ دنیا کو یہ باور کرایا جا سکے کہ جبری گمشدگی صرف افراد کو غائب کرنے کا عمل نہیں بلکہ ایک پورے معاشرے کی شناخت اور یادداشت کو مٹانے کی کوشش ہے۔

بلوچ یکجہتی کمیٹی کا کہنا ہے کہ بلوچستان میں ہزاروں خاندان اپنے پیاروں کی بازیابی کے منتظر ہیں۔ ان خاندانوں کو نہ صرف اپنے عزیزوں کی عدم موجودگی کا صدمہ سہنا پڑ رہا ہے بلکہ انہیں دھمکیوں، اذیتوں اور جھوٹے الزامات کا بھی سامنا ہے۔

اعلان کے مطابق، اس دن کو منانے کے لیے بلوچ عوام سے اپیل کی گئی ہے کہ وہ 30 اگست کی شام 5 بجے اپنے علاقوں کے نمایاں مقامات پر جمع ہوں اور اپنے جبری گمشدہ پیاروں کی کوئی نشانی، جیسے تصاویر، کپڑے، جوتے یا یادگار اشیاء ساتھ لے کر 5 منٹ کی خاموشی اختیار کریں تاکہ یہ ایک اجتماعی پیغام کے طور پر دنیا کے سامنے آئے۔

کمیٹی نے مزید کہا ہے کہ عوام اپنے پیاروں کی یادوں کو فن کے ذریعے زندہ رکھیں، جیسے کہ تصاویر، شاعری، تحریریں یا قبروں پر یادگاری علامتیں رکھنا۔ اس کے علاوہ اپنی کہانیاں اور یادداشتیں کمیٹی کو فراہم کردہ واٹس ایپ نمبر (+44 7557 533805) پر بھیجی جا سکتی ہیں۔

ترجمان نے کہا کہ "ہماری پہچان ہماری یادوں اور اجتماعی جدوجہد سے جڑی ہے اور جب تک ہر جبری گمشدہ فرد بازیاب نہیں ہوتا، یہ جدوجہد جاری رہے گی۔”