غزہ جنگ میں بڑا دعویٰ اسرائیل نے حماس کے ترجمان ابو عبیدہ کی ہلاکت کی خبر دی

غزہ جنگ میں بڑا دعویٰ: اسرائیل نے حماس کے ترجمان ابو عبیدہ کی ہلاکت کی خبر دی

اسرائیل: وزیراعظم نیتن یاہو نے دعویٰ کیا ہے کہ اسرائیلی فورسز نے حماس کے مسلح ونگ کے ترجمان ابو عبیدہ کو نشانہ بنایا، اسرائیلی وزیر دفاع اسرائیل کاتز نے کہا کہ ابو عبیدہ ہلاک ہوگئے ہیں۔

عالمی خبر رساں ادارے رائٹرز کی رپورٹ کے مطابق اسرائیلی وزیراعظم نیتن یاہو نے دعویٰ کیا ہے کہ اسرائیلی فورسز نے حماس کے مسلح ونگ کے ترجمان ابو عبیدہ کو نشانہ بنایا ہے جبکہ اسرائیلی وزیر دفاع اسرائیل کاتز نے کہا کہ ابو عبیدہ ہلاک ہوگئے ہیں۔

ابو عبیدہ، جنہیں حذیفہ الخالوت کے نام سے بھی جانا جاتا ہے، فلسطینیوں اور اسرائیلیوں دونوں کے لیے ایک مشہور شخصیت تھے۔ وہ حماس کی اعلیٰ عسکری قیادت کے قریب سمجھے جاتے تھے اور تقریباً دو دہائیوں سے گروپ کے پیغامات پہنچانے کی ذمہ داری نبھا رہے تھے، جو اکثر وہ اپنے چہرے کو سرخ کفایہ رومال سے ڈھانپ کر ویڈیو بیانات کے ذریعے دیتے تھے۔

امریکا نے اپریل 2024 میں انہیں پابندیوں کا نشانہ بنایا تھا، یہ الزام لگاتے ہوئے کہ وہ القسام بریگیڈز کے ’ سائبر انفلوئنس ڈپارٹمنٹ’ کی قیادت کر رہے ہیں۔

اپنے آخری بیان میں، جو انہوں نے جمعہ کو دیا، ابو عبیدہ نے خبردار کیا تھا کہ غزہ شہر پر منصوبہ بندی کے تحت اسرائیلی حملہ یرغمالیوں کی جان کو خطرے میں ڈال دے گا۔

دوسری جانب ، قطری نشریاتی ادارے الجزیرہ کی رپورٹ کے مطابق اسرائیل نے غزہ پر حملے مزید تیز کردیے ہیں، اور صبح سے اب تک اسرائیلی فوج کے حملوں میں مزید 63 فلسطینی شہید ہوچکے ہیں۔

طبی ذرائع نے الجزیرہ کو بتایا کہ ہلاک شدگان میں 15 افراد امداد کی تلاش میں تھے کہ اسرائیل کے حملوں کا نشانہ بن گئے۔