بلوچ طالب علم رہنماؤں زاہد بلوچ اور اسد بلوچ کی جبری گمشدگی کو 11 سال مکمل، بلوچ وائس فار جسٹس کی مہم کا اعلان

‏بلوچ طالب علم رہنماؤں زاہد بلوچ اور اسد بلوچ کی جبری گمشدگی کو 11 سال مکمل، بلوچ وائس فار جسٹس کی مہم کا اعلان

بلوچ وائس فار جسٹس کی جانب سے جاری کردہ بیان میں کہا گیا ہے کہ بلوچ اسٹوڈنٹس آرگنائزیشن کے سابق مرکزی چیئرمین زاہد بلوچ اور سابق مرکزی جوائنٹ سیکریٹری اسد بلوچ کی جبری گمشدگی کو آج 11 سال مکمل ہو چکے ہیں۔ انہیں 18 مارچ 2014 کو کوئٹہ میں ایک تنظیمی میٹنگ کے دوران ریاستی اداروں نے جبری طور پر لاپتہ کیا۔ ان کے اغوا کے متعدد چشم دید گواہ موجود تھے جن میں شہید کریمہ بلوچ بھی شامل تھیں۔ تاہم ریاست آج تک ان کی گمشدگی سے انکاری ہے۔

بیان میں کہا گیا کہ زاہد بلوچ اور اسد بلوچ کی جبری گمشدگی صرف دو طالب علم رہنماؤں کی جبری گمشدگی نہیں بلکہ بلوچ قوم کے اجتماعی شعور کو دبانے، نوجوانوں کو خوفزدہ کرنے اور انہیں تعلیم، شعور اور قومی جدوجہد سے دور رکھنے کی منظم پالیسی کا حصہ ہے۔ وہ پچھلے 11 سال سے ریاستی عقوبت خانوں میں بند ہیں، ان کی گمشدگی صرف جسمانی قید نہیں بلکہ بلوچ طلبہ، دانشوروں اور آزادی کے متوالوں کے لئے ایک پیغام ہے کہ علم، سوال اور مزاحمت کی راہیں بند کی جا رہی ہیں۔

بیان میں مزید کہا گیا کہ بلوچ نسل کشی کی پالیسی شدت اختیار کر چکی ہے۔ حال ہی میں زاہد بلوچ کے بھائی شاہجان بلوچ کو ایک وحشیانہ حملے میں شہید کر دیا گیا جو ریاستی جبر کی ایک اور خوفناک مثال ہے۔ یہ عمل بلوچ خاندانوں کو خاموش کرانے، انہیں اجتماعی سزا دینے اور خوف کے سائے میں دھکیلنے کی پالیسی کا تسلسل ہے۔

زاہد بلوچ، اسد بلوچ، زاکر مجید بلوچ، شبیر بلوچ سمیت دیگر بلوچ طالب علم رہنماؤں کی جبری گمشدگی نوآبادیاتی جابرانہ پالیسیوں کا حصہ ہے۔ قابض قوتیں ہمیشہ سب سے پہلے کسی قوم کے دانشوروں، پروفیسروں، طلبہ اور فکری رہنماؤں کو نشانہ بناتی ہیں تاکہ ان کی اجتماعی دانش، فکری صلاحیت اور قومی شعور کو ختم کیا جا سکے۔ وہ نوجوان جو سوال کرتے ہیں، جو اپنی آزادی، زمین، ثقافت اور حقوق کے لئے کھڑے ہوتے ہیں انہیں جبری گمشدگی اور نسل کشی کا نشانہ بنایا جاتا ہے مگر ہر اندھیرے کے پیچھے امید کی ایک کرن چھپی ہوتی ہے اور بلوچ نوجوانوں کی مزاحمت اس جبر کو توڑنے کے لیے جاری ہے۔

بیان کے آخر میں کہا گیا کہ زاہد بلوچ اور اسد بلوچ کی جبری گمشدگی کو 11 سال مکمل ہونے پر آج رات 7 بجے سے رات 12 بجے تک بلوچ وائس فار جسٹس سوشل میڈیا پلیٹ فارم ایکس (X) پر ایک آگاہی مہم چلائے گی۔ تمام انسان دوست افراد، انسانی حقوق کے کارکنان، صحافیوں اور باشعور لوگوں سے اپیل کی جاتی ہے کہ وہ اس مہم میں بھرپور شرکت کریں اور مظلوموں کی آواز بنیں۔