لیاری میں بلوچ یکجہتی کمیٹی کے تحت آگاہی ریلی پر سندھ پولیس کا حملہ: ایمنسٹی انٹرنیشنل کی مذمت

گزشتہ روز کراچی کے علاقے لیاری میں بلوچ یکجہتی کمیٹی کے تحت پُر امن آگاہی ریلی پر سندھ پولیس نے دھاوا بول دیا اور مظاہرین کو تشدد کا نشانہ بنایا اور متعدد شرکاء کو گرفتار کرلیا۔
خواتین کارکنان سمیت شرکا پر تشدد کے بعد تنظیم کے رہنماء سمی دین بلوچ، آمنہ بلوچ، لالا وہاب دیگر کئی افراد کو گرفتار کرکے پولیس تھانہ منتقل کردیا تھا جہاں بعد ازاں رات گئے خواتین اور چند منتظمین کو رہا کر دیا گیا، تاہم اب بھی متعدد مرد شرکا پولیس حراست میں ہیں۔
پرامن مظاہرین پر تشدد غیر انسانی اور غیر جمہوری عمل ہے جو ریاستی جبر کی ایک اور واضح مثال ہے۔
ایسے اقدامات عوام کی آواز کو دبانے کی ناکام کوشش ہیں جو ان کے حقوق کی پامالی کے خلاف آواز اٹھا رہے تھے۔
لوچ خواتین ہمیشہ اپنے حق اور انصاف کے لیے جدوجہد کرتی آئی ہیں اور ان کے ساتھ تشدد کا یہ رویہ ناقابل برداشت ہے ۔
سندھ پولیس کا حملہ ریاستی طاقت کے غلط استعمال کی عکاسی کرتا ہے ۔ جس کا مقصد سیاسی شعور کو کچلنا ہے۔
بلوچ سماج میں خواتین کا ایک قابل احترام مقام ہے اور ان پر تشدد نہ صرف قانون کے خلاف ہے بلکہ ہمارے سماجی اور ثقافتی اقدار کی بھی خلاف ورزی ہے۔
ایمنسٹی انٹرنیشنل ساؤتھ ایشیا نے اس واقعے پر تشویش کا اظہار کرتے ہوئے ایک بیان میں کہاکہ گذشتہ روز لیاری، کراچی میں بلوچ یکجہتی کمیٹی کے پرامن مظاہرے پر پولیس کی سخت کاروائی اور مظاہرین کی گرفتاری آزادی اظہار اور پرامن احتجاج کے حقوق کی خلاف ورزی ہے۔
ایمنسٹی نے اپنے بیان میں کہا ہے کہ پاکستانی حکام نے 25 جنوری 2025 کو دالبندین، بلوچستان میں منعقد ہونے والے جلسے سے قبل بلوچ کارکنوں کے خلاف ہراسانی اور دباؤ بڑھا دیا ہے، جس میں بلوچ یکجہتی کمیٹی کی قیادت کے خلاف مقدمات بھی شامل ہیں۔
ایمنسٹی انٹرنیشنل نے پاکستانی حکام سے مطالبہ کیا ہے کہ پرامن احتجاج کے حق کو یقینی بنائیں، کسی بھی قسم کی بلاجواز گرفتاری، غیر قانونی طاقت کے استعمال، اور منتظمین یا مظاہرین کے خلاف مقدمات سے گریز کیا جائے۔