مذہب کے نام پر جھوٹے الزامات لگا کر ایک نئی نسل کشی کی بنیاد رکھی جارہی ہے ۔ بلوچ یکجتی کمیٹی (کراچی)

مذہب کے نام پر جھوٹے الزامات لگا کر ایک نئی نسل کشی کی بنیاد رکھی جارہی ہے ۔ بلوچ یکجتی کمیٹی (کراچی)

بلوچ یکجہتی کمیٹی (کراچی ) کے ترجمان نے اپنے جاری کردہ بیان میں کہا ہیکہ پاکستان میں مذہب ہمیشہ اپنے ذاتی مفادات کے لئے استعمال ہونے والی چیزوں میں سے ایک تھا جس کی کئی مثالیں ہمیں اس کے ماضی میں ملتی ہیں ۔ اسی ماضی کی روایت کو برقرار رکھا گیا اور حال ہی میں بلوچستان کے علاقے تربت میں مفتی شاہ میر کھچی نے ایک نیا طریقہ استعمال کیا ہے اس نے اپنے ساتھ اپنے چند بد معاشوں کی ٹولی لے کر آج کل پرائیویٹ اسکول کے طالب علم اور ٹیچرز کو مذہبی گستاخی کے نام پر بلیک میل کرنے کا ایک سلسلہ شروع کیا ہے ۔ مزید فیصلے کے نام پر پرنسپل اور ٹیچرز سے پیسوں کا ڈیمانڈ کرتا ہے۔

ترجمان نے اپنے جاری کردہ بیان میں مزید بتایا کہ تازہ ترین خبر یہ ہے کہ زگری کمیونٹی سے تعلق رکھنے والے بلوچ ٹیچر عبدالرؤف ولد برکت کے اوپر بھی توہین رسالت کا الزام مفتی شاہ میر جیسے مذہبی فسادی شخص نے لگایا ہے ۔ عبد الرؤف ولد برکت نے حال ہی میں لاء ایڈمیشن ٹیسٹ دیا تھا اور اپنے آئندہ آنے والے روشن مستقبل کا خواہاں تھا لیکن افسوس کہ مذہبی فسادی اور مذہب کے ٹھیکیداروں نے ایسا ہونے نہیں دیا اور ان کے اوپر توہین رسالت کا جھوٹا الزام لگا دیا۔ ہم سمجھتے ہیں کہ اس طرح کے الزامات اور مفتی شاہ میر کیچی جیسے لوگوں کا فعال ہونا انتہائی تشویشناک عمل ہے اور یہ بہت خطر ناک ثابت ہو سکتا ہے ۔ ہم سمجھتے ہیں کہ جب ریاست اس بات میں ناکام ہو گئی کہ بلوچ کو نمازی اور زگری کے نام پر لڑاۓ اور ان کو شیر و شکر ہونے نہ دے تو اس نے اپنا قبلہ بدل دیا اور منہ ایک اور جانب کر دیا کہ اب توہین رسالت کا الزام لگا کر ایک نئی نسل کشی اور مذہبی فساد کو استعمال کر کے اپنے ناپاک ارادوں کو سر انجام دے رہے ہیں۔ ہم اس بات سے بخوبی واقف ہیں کہ بلوچستان بھر میں ایسے ریاستی مذہبی ٹھیکیدار بھرے پڑے ہیں کہ جنہوں نے ہر ممکن کوشش کی ہے مذہب کے بنیاد پر بلوچ کو بلوچ کا دشمن بنایا جاۓ ، لیکن ہم بلوچ قوم کو یہ بات واضع کرانا چاہتے ہیں کہ ہوش کے ناخن لے اور اس بات کو جان لے کہ اس کو طرح طرح سے لڑانے توڑنے کی کوشش ہوئی تھی ، ہو رہی ہے اور آئندہ بھی ہو گی لیکن اس کو خود ان تمام تر چیزوں کو سمجھنا ہو گا اور ان مذہبی ٹھیکیداروں کو بھی سمجھنا ہو گا کہ مذہب ، عقیدہ ، ایمان جو کچھ بھی ہے دلوں میں ہے چھری یا چاقو سے وہ ختم نہیں ہو گی ۔
ترجمان نے اپنے بیان کے آخر میں کہا کہ ہم حکام بالا سے مطالبہ کرتے ہیں اسلام کے نام پر ، مذہب اور دین کے نام پر شرپسند عناصر کو استعمال کر نے سے روکا جائے ہم یہ بخوبی جانتے ہیں کہ یہ بھی ریاستی ہتھکنڈوں میں سے ایک ہتھکنڈہ ہے اور ہم مطالبہ کرتے ہیں کہ اپنا قبلہ درست کرے اور ہوش کے ناخن لیں اس طرح کے ہتھکنڈے استعمال کر کے بلوچ قوم کی نسل کشی ہم ہر گز برداشت نہیں کر سکتے اگر یہ جاری رہا تو ہم احتجاجی مظاہروں کا آئینی و جمہوری حق رکھتے ہیں ۔