ڈاکٹر ماہرنگ بلوچ کی جان کو خطرات لاحق: یو این ورکنگ گروپ نے پاکستان کو لکھا خصوصی مکتوب

ماہ رنگ بلوچ کا تعلق قلات سے ہے۔ وہ پانچ بہنیں اور ایک بھائی ہیں اور سب تعلیم حاصل کر رہے ہیں۔
اان کے والد عبدالغفار واپڈا میں ملازمت کرنے کے علاوہ مزدور، قوم پرست اور بائیں بازو کی سیاست کرتے تھے۔
سنہ 2006 میں وہ (ماہ رنگ کے والد) پہلی مرتبہ لاپتہ ہوئے جس کے کچھ عرصے بعد وہ واپس آ گئے تھے۔ پھر وہ 2009 میں لاپتہ ہوئے اور 2011 میں ان کی مسخ شدہ لاش ملی تھی۔
ماہ رنگ بلوچ سنہ 2020 میں اس وقت سب کی توجہ کا مرکز بنی تھی جب صوبہ بلوچستان کے دارالحکومت کوئٹہ میں طلبا کے آن لائن کلاسز کے خلاف ایک احتجاج کے دوران بولان میڈیکل کالج کے طلبا کو گرفتار کیا گیا تھا۔
اس احتجاج میں ماہ رنگ بلوچ کو بھی پولیس نے گرفتار کیا تھا اور وہ پولیس وین میں بٹھائے جانے تک اپنے مطالبات کے حق میں آواز بلند کر رہی تھی۔
سنہ 2006 میں جب ڈاکٹر ماہرنگ کے والد لاپتہ ہوئے تھے اس وقت وہ پانچویں کلاس میں پڑھتی تھی۔ اس وقت بھی والد کو بازیاب کروانے کے لیے وہ کوئٹہ پریس کلب کے سامنے احتجاج میں شامل تھی۔
ماہ رنگ بلوچ کے مطابق ان کی سیاسی تربیت بچپن ہی سے ان کے والد نے کی۔ ’جب 2017 میں بھائی لاپتہ ہوا تو انکے اندر کا سیاسی کارکن بھی بیدار ہو گیا۔
اڈاکٹر ماہرنگ کی جدوجہد کی وجہ سے ان پر سخت پابندیاں عائد کر دی گئی ہیں۔ مئی 2024 میں ناروے کے دورے کے بعد دہشت گردی کے قوانین کے تحت جعلی پولیس کیسز، مسلسل نگرانی، اور انکی زندگی میں دیگر رکاوٹوں میں ڈرامائی طور پر اضافہ ہوا۔
اقوام متحدہ کے ایک خصوصی ورکنگ گروپ نے بلوچ یکجہتی کمیٹی کی رہنما ڈاکٹر ماہرنگ بلوچ کو ڈرانے، ہراساں کرنے، سفری پابندیاں عائد کرنے اور بے بنیاد الزامات کے تحت مقدمات درج کرنے سے متعلق حکومت پاکستان کو ایک خصوصی مکتوب لکھا ہے۔
’وائس پی کے‘ کے مطابق یہ خصوصی مکتوب اقوام متحدہ کے ورکنگ گروپ کی طرف سے بھیجا گیا۔
مکتوب میں حکومت پاکستان کو یاد دلایا گیا ہے کہ ماہرنگ بلوچ انسانی حقوق کی محافظ اور بلوچ یکجہتی کمیٹی کی رہنما ہیں، جو ریاست پاکستان کی جانب سے ملک میں مقیم بلوچ برادری کے خلاف مبینہ خلاف ورزیوں خاص طور پر جبری گمشدگیوں کے جواب میں قائم کی گئی انسانی حقوق کی تحریک ہے۔
ڈاکٹر ماہرنگ کو ورلڈ ایکسپریشن فورم (WEXFO) اور PEN ناروے نے بلوچستان میں انسانی حقوق کی خلاف ورزیوں کے بارے میں بات کرنے کے لیے مدعو کیا تھا۔
پاکستان واپس آتے ہی ان پر دہشت گردی کا الزام لگا دیا گیا۔ اکتوبر میں، انھیں نو فلائنگ لسٹ میں رکھا گیا، جس نے انھیں ملک چھوڑنے سے روک دیا۔ یہ نئی پابندیاں 2 اکتوبر 2024 کو TIME میگزین کے اپنے 100 ابھرتے ہوئے رہنماؤں میں سے ایک کے طور پر انکی پہچان کے بعد لگیں۔
مزکورہ مکتوب کے مطابق 11 اکتوبر 2024 کو ملیر ضلع کی قائدآباد پولیس کی جانب سے ایک ایف آئی آر درج کی گئی، جس میں دعویٰ کیا گیا کہ ماہ رنگ بلوچ علاقے میں تشدد کو ہوا دے رہی ہیں۔
ایف آئی آر میں مبینہ طور پر انسداد دہشت گردی ایکٹ کی سیکشن 7 کے ساتھ ساتھ بغاوت، مہلک ہتھیاروں سے لیس ہو کر فسادات پھیلانے، غیر قانونی اسمبلی، گروپوں کے درمیان دشمنی، ہتک عزت، عوامی فسات کو ہوا دینے والے بیانات کے حوالے دفعات شامل کی گئیں۔ ایف آئی آر میں کہا گیا کہ ماہ رنگ بلوچ مختلف عسکریت پسند گروپوں کے ساتھ مل کر ملک دشمن سرگرمیاں انجام دے رہی تھیں۔
مکتوب میں کہا گیا کہ ماہ رنگ بلوچ نومبر اور دسمبر2023میں بلوچ لانگ مارچ میں ایک سرکردہ شخصیت تھیں اور جولائی2024میں گوادر میں ہونے والے بلوچ قومی اجتماع میں بھی انہوں نے فعال کردار ادا کیا گیا۔ انہیں اپنے پرامن کام کی وجہ سے سخت انتقامی کارروائیوں کا سامنا کرنا پڑا ہے۔ ماہ رنگ بلوچ کی جان، آزادی اور ذاتی تحفظ کو شدید خطرہ لاحق ہے ۔
مکتوب میں ماہ رنگ بلوچ کو مبینہ طور پر ڈرانے، دھمکانے اور ہراساں کرنے کے عمل پر تشویش کا اظہار کیا گیا ہے۔
مکتوب میں لکھا گیا کہ ایسا لگتا ہے کہ یہ بلوچستان کے انسانی حقوق کے محافظوں کے خلاف ہراساں کرنے کے نمونے کا حصہ ہے۔ ورکنگ گروپ نے حکومت سے ان نکات پر جواب دینے کا کہا ہے۔
ڈاکٹر ماہرنگ بلوچ کا کہنا ہے کہ میری جان کو لاحق خطرات بہت حقیقی ہیں، لیکن میں اپنے لوگوں کے وقار اور مستقبل کے لیے لڑنے کے لیے پرعزم ہوں۔ ہماری جدوجہد پرامن زندگی گزارنے کے بنیادی حق کے لیے ہے اور اگر قانون کی حکمرانی ہو تو ان چیلنجز سے نمٹا جا سکتا ہے۔ اس کے بغیر، بدعنوانی، طاقت کا غلط استعمال، اور طاقتوروں کی طرف سے بیرون ملک دولت جمع کرنا جاری رہے گا۔ یہی وجہ ہے کہ ہم خاموش ہیں، اتھارٹی پر سوال کرنے سے منع کیا گیا ہے، اور انسانی حقوق اور انصاف کی وکالت کرنے سے حوصلہ شکنی کی گئی ہے۔